Я’ мидахана вэсакохо’, пухуцяха’ илевэхэ’. Нюди’, хибяхартади’ яӈговы. Поӈгнанди’ лаханакурпати’ манзетвэхэ’:

- Нум’ нюдами’ таван’ ни харва’’. Ӈамгэ тарця?

Пухуцяюм’ мамы:

- Хадри’ ӈэя, теда’ мале мани’ вэсэймани’, нюм’ лэтамба ныхыми’ яӈгу.

Вэсакоюм’ ма:

- Ню’ е’’эйӈэ сядэйм сертаб’’ни сава ӈэдараха. Сяхари’ ӈод’’ хаб’’нани’ я’ тер ненэця’’ тюку сядэйми хэхэӈэ мэтадо’.

Пяхад вэсако сядэйм’ сябарӈа, панэхэна’’ серибтеда, си’ ня’ ӈабтада. Сянад – хунат илебати’ ӈод’’ сава яля еркана вэн’’ мадлыд’’. Пухуця пин’ хая, я’ сид ян’ саномда н ӈэдара. Таминда мят’ тю, ма:

- Ӈоб’’ ядана миӈа. Хибя ӈэдакы?

Вэсакоюм’ ма:

- Такэхэв нум’ няни’ ӈэдаравы ӈацекы. Мани’’ нюми тодакы!

Ядана ненэць’ мят’ тю. Вэсакохо’, пухуцяха’ ӈавалади’. Ӈаворманда сер’ ма:

-Такы си’ няна ӈэдари’ ӈамгари’?

Вэсако ма:

- Мани’ нюсини’. Ӈадьбяни’ сядэйм’ ӈацекэдрев’ сертаминзь.

Мядонда ма:

- Илеван’ харвабати’ сидди’ табэдаӈгудм’. Хуняна сава яля ӈэнгу. Ӈули’’ ядембаӈгу. Паркаси’’ пин’ хэиди’.

Ядана ненэць’ хая. Вэсакохо’ мер’ хонаяха’. Хуняна юркаяха’. Турмы ненэця’ вади’’ тотрев’ пихиня ненэся ӈод’ ӈули’’ сава яля ӈэвы. Ядембавы. Вэсакохо’, пухуцяха’ паныди’ мал’ екэйди’. Паркаси пин’ тарпъяха’. Хаерад няюв’ сыраць ӈамдъяха’. Тарем’ ӈамдёдаханди’ ӈарка ту’ сарёӈэ хая. Ӈайти’ тар’’ тэри вэлкада’’. Вэсакохо’, пухуцяха’ нумд’ пу’’лаяха’. Тю’’уй нумгана нумгыӈэ хаяха’. Вэсакоюм’ хубтыхы ялэмдад’нумгыӈэ хая. Пухуцяюм’ пэвсюма’ няны ялэмдад’ нумгыӈэ хая. Няхати’ хонаркуху’:

- Хаёвы нюкцями’ я’ тер’’ ненэця ӈаволкосьӈэ мэцакэдо’.

Теда’ сяхари’ нумд’ сырап’’, сидя нумгы ӈадьбяти’ ӈаркаха’. Тикаха’ вэсакохо’, пухуцяха’.

Та’ валакада