Маня’’ тыбэртя’’ яхана илева’’, тына’’ явнана пилибт’ хадырӈа’’. Невхы похот’ иринана, хадунана тэкоцидо’ пэрць мюсерӈаць. Тыбэрма сер’ тюку яля’’ ӈэсонд’ тэвы’’. Теда округханана юр’’ сиднтет ю’’ ёнаркад вата тэва’’.

Тыбэртя’’ хибярина Нюдя’, Ӈарка’, Канин’, Тиман’ выӈгана тыдо’ пэрць манзара’’, ханяӈы хойхана не’’ӈод хасавидо’ нядабась мюсерӈа’’. Тэхэ’’на’’ мэна’’ ненэциена илевадо’ ханяӈэхэна тоенась миӈа’’, недбидо’ нюдя’’. Тарем’ ӈэбнанда ӈод’ хибярина хойхана манзара’’, тыбэрӈа’’. Хусувэй по’ ӈэрёйӈэ’ хэсь тыдо’ хабарпавась пясьты. Забой манзая’’ няхар’’ ирий ямбан яндаха’’на минзьты. Тюку ялян’ тэвась забойка’ яханана ёльцевы’’. Сямянд’ пуданаӈэ’ ты’’ хабарпава манзаидо’ СПК «Индига» ёльцейдась. Хадавы’’ тыто’ ӈамза’’ маля март’ тэвравы’’.

Округна хусувэй СПК, ханяна забой’ манзая’’ миӈаць, тыто’ ӈамза’’ таславы’’. Тикахад’ нина’’  есям’ хомби’’, тикахад’ нерняна илевадо’ переӈгу’’. Тюку по’ хадавы’’ ты’’ хэвдо’ сава, ӈодьбянда хусувэй ӈэсыхыд’ тавы’’ ӈамзидо’ вэва ни’’ӈа’’. Ӈамзина’’ ӈани’ по’ ты’’хабарпава ёльцянд’ тэвӈгуд.

Хойхана мэна’’ нина’’ теда нарэй мюсерць’ яхато’ хэванзь’ ятна’’. Нерняна ты’’ ниць ирий’ тута’’, нина’’ ӈани’’ тэтнаӈгу’’.