Маня’’ яханана ненэця’ вадам’ минрена’’ тохолкодина’’ няхар’’ яӈганя школахана манзара’’. Мал’’ пыдо’ манзаидо’ сававна теневана’’, хари’’ минрена манзаяхандо’ ив’ ер сырта’’. Хусувэдо’ ӈацекым’ хари’’ вадаханда тохолаван’ харвада. Ӈацекына ӈод харвась’ тоходана’’.
Ты’’ саполана ирийна самлязимдей яӈганя яляхад’ сиднтетимдей толыр’’ ӈэсонд Няръяна маркана «Профессионал года 2016» региональный конкурс педагогического мастерства миӈась. Округна тохолкода’’, воспитатель’’ сян номинацияхана манзараць. «Ненэця’ вада тохолкода» номинациява ӈод танясь. Тарця номинациям’ хамадабвахана ӈарка манзаям’ Людмила Яковлевна Талеева сертась, тикы нява Центр образования методистӈэ’ тара, ненэця’ вадам’ минрена’’ тохолкодина нядабадава’’.
«Ненэця’ вада тохолкода» конкурсан’ тюку по’ тет’’ тохолкодава’’ падродо’ ӈэдаравыць. Мал’’ нина’’ округна ӈэсыхына манзара’’. Сидя тохолкодаха’ Саляхад’ товэхэсь – Людмила Соболева няби Наталья Талеева. Краснойхад’ тюкумэвахана ныхымда’ хормась Валентина Хатанзейская товысь, Андегхад’ ӈани Эльвира Ардеева. Тарця конкурсхана жюри манзарась. Тохолкодина’’ сян’’ яля’’ ямбан манзаидо’ манэ’’лабтабиць. Ӈули’’ нертей яляхана хусувэй тохолкода ненэця’ вада урокм’ манэ’’лабтась. Хусувэдо’ ив’ ер манзаямда минредась, ӈацекы’’ ӈод сававна манзараць’, хари’’ вадавнандо’ харвась лаханаць.
Тикахад’ хусувэй конкурсан’ товы тохолкода визитной карточкамда хамадавысь. Харто’ ӈэсындо’, харто’ школандо’ нямна лаханаць. Тикахад’ нянэй ненэця’ ембдяр’’ манэ’’лабтамбиць. Тохолкодина’’ Ӈарка, Нюдя, Канин’ я’ тер’’ паны’’ мэць ӈадимяць. Хусувэй товы паныда няхаданда яӈгась, ханзер’’ яӈгвамда тохолкодина со’’ теневадо’. Тохолкода тикы’ поӈгана хыно’’ӈаць, тараць. Конкурс’ няхарамдэй яляхана мастер-класс’ ваерась. Тикахана хусувэй тохолкода харта манзаравамда ваде’’ӈась, манзаянда хусувэй несэй’ таневамда тэврась.
Тет’’ яля’’ ямбан ӈока’’ манзая’’ манэ’’мыць. Тохолкодина’’ пэдова’’. Хусувэдо’ манзаямда мэнена, теневана тохолкода. Малӈэ’ тохолкодина маля ӈахакуд’ ӈацекы’’ тохолаби’’. Тет’’ тохолкодахад’ сямянд’ мэбетамдо’ тэрабась тоенаркась. Хибядо’ «Учитель родного (ненецкого) языка» номинацияхана нерня’ тарпвам’ ӈобкарт’ хибяри пудана яля’ ӈэсонд’ ехэрадась.
Ваеравы си’’ив маттамдэй яляхана «Арктикам’» нюбета мякана тохолкова’ серкат’ перена’’ хибяри’’ ма’’лыць, таняна тохолкоди’’ Региональный
Конкурсхана недевы’’ нина’’ нюмдебиць. Ненэця’ вадам’ пэртя’’ нина’’ конкурсхана нюртейӈэ’ Людмила Александровна Соболева хаясь. Саляхана манзарана тохолкода, ӈацекэхэ’’на хасую’’ по’’ ямбан манзара. Тюку по’ нюдя пэвдэй ирийхана пыда манзаямда Всероссийский конкурсхана манэ’’лабтабаӈгуда. Нябимдейӈэ’ хэвы Наталья Геннадьевна Талеева ӈобтарем’ Саля’ тер’’ ӈацекы’’ тохолкода, маля ӈахакуд’ манзара. Тикахад’ Валентина Ивановна Хатанзейская Краснойхана манзарана тохолкода, пыда урокха’’ната хуркари’’ тэнз’ мэта ӈацекы’’ харвась ненэця’ вадава тохолабидо’. Ханярина ӈацекыда пэдава’’ ӈэсьты’’!
Эльвира Иосифовна Ардеева Андег’ ӈэсыхы’ школахана манзара. Луца’’ӈэсы ӈэбнанда’ ӈод ӈацекыдо’ ненэця’ вадан’ тохолабидо’. Тохолкодадо’ ӈод ив’ ер манзарана тохолкода.
Тамна ӈопой тохолкоди’’ конкурс’ ваера. Всероссийский конкурсан’ хэвндя тохолкодина’’ нюмдейна’’. Ненэця’ вадам’ минрена’’ тохолкодахат’ ӈарка вадам’ Людмила Яковлевна Талееван’ хэтбидм’. Пыда ӈокавна тохолкодина няюв’ манзара, нида’’ нядабадава’’.
