Тюку яля’ « Петров луца’ вадавы – Вэра’ ӈацекы.» ярабц’ тамна ӈопой’ пелям’ толада’’. Тикы ярабцм’ паднана ненэць’ Няю Вэнго хэвхы округханана ненэцие’ вадавна ӈадимберта газетахана манзара. Хари’’ яхананда илена’’ ненэцяӈгат’ ховы’’ ярабцада’’ маля тянё ни’’ӈа’’. 

Хора няк хэвамбовнани’ ихина то. Няби манахад мань ня’’мав. Хора няк пиняри’ нюта. Сидя хэвхана хамбари’’ нарылы’’. Петров луцам’ няби ӈудаханани’ ӈудахаданда ня’’амбив. Ӈамгэ’ пиркана Петров луца манзь ханада: - Нён ӈодокуко’, пэдахаенакэн?

Ӈудамда нянзав, салик’ савак’ пуня’ матидев. Петров луца’ намдортада яӈгу. Хора няк’ манам’ пили’’ ня’’мада. Ня’’амванда сер’ няк’мана ныклы. Мананда ныклахава хора няк тэринда юху. Манзьвани’ ӈани’ ит’ лямборъяни’. Петров тарем’ ма: - Някми’ савась.

Мань тарем’ мадм’: - Салик’ савак’ сит матидембидамзи’, няк’ манам’ ӈамгэ ня’’мар?

- Мань ма’’нисядам’ ӈудар пэданакы’? Ӈани лаханана ӈани’ тарем’ ма: - Хора ӈарти’ ханар тэвы’’. Тедахарт’ нёя хань’’!

Хора ӈарти’ нямнани’ ихина то. Няби манахаданда ӈани’ ня’’мав. Тад нюталманда наӈэдя си’’я’ хамбари’’ нарылы’’. Петров луца манзь ханада: - Ӈудар пэдэй’, няби ӈудахана манамда мань ӈани’ ня’’амхав. Хора ӈарти’ манам’ тад ня’’амванда: манада  ӈани’ ныклы. Ӈартими’ тэри юху. Ныклавы манам’ няби сеп’ мю’ паклев. Ӈани’ ит’ лямборъяни’. Ӈамгэ’ пиркана ӈод’’ лаханана пыда тарем’ ма: -Вэра’ ӈацекы, ӈанор ӈани’ тям тода! Теда’ ӈэдабтанами’ хора тивтей нёя хань’’! Хора тивтей  хэвувнани’ ихина то. Няби манахад ӈани’ ня’’мав. Ня’’аммахадани’ хора тивтей’ сидя хэвувна сисёри’’ харабты’’. Петров луца ма: - Сидя’ си’’ив яля’ ӈудар пэдэй’’. Тивтей’ манам’ мань ня’’амхав. Салик’ савак’ матидесетыв – намдортада яӈгу. Ӈудам’ ӈэдара, хора тивтейм’ манахаданда ня’’мада. Ня’’амванда сер’ тивтей’ манада ныклы. Петров тарем’ ма: - Манада ӈани’ ныкла еремя, мара’ сававна миӈанинзь. Мань тарем’ мадм’: - Ся’’мэй ӈудахананд ха’’манзь ня’’мар?

Луца ха’’мамана, тивтей’ манам’ няби сеп’ мю’ паклев. Хора тивтей’ тэмзахава, ит’ ӈани’ лямборъяни’. Ӈамгэ’ пиркана сэв’’ сэйвы’’. Сэвни’’ ӈадимзь Ид’ Ерв’ пелей’ няна мэвэдм’. Петров луца няби ӈудахадани’ тамна си’’ми’ ня’’амбавы. Ӈамдбани’ ӈод’’ сея’ хэвхана хора няк’’я таня мэвы. Няби манада яӈговы. Сепни’ мю’ ӈударими’ хая. Хора няк’ манам’ нянда мов. Манада яханда талкада, невхы ӈыхында наӈэдяӈэ ха’’мы’’. Нянда хэвхана хора ӈарти’ таня мэвы. Няби манада ӈобтарем’ яӈговы. Сепни’ мюд ӈартини’ манам’ тюхалӈав. Манасядан’ мов. Ӈани’ ӈобтикы яханда талкада. Хора тивтей ӈани’ таня тикахана мэвы. Манамда ӈани’ нянда мов. Мэлва яханда талкада. Ёндар’ масьнё’’: - Яханди’ хаяди’. Хора тивтей, няхаюд яханди’ ханахаюн. Петров луца тивтейм’ нёмда ня’’марпю’. Ӈудада ся’’мэй.

Малда ни’’ӈа.