Вы здесь

Хибя’’ сямянд’ мэре’’ӈа’’

  Тюку по’ сямянхат’ меретаӈэ’  Андрей Явтысый нюмдець

Хойхана илевандо’ ямбан мюсерта’’, ӈока по’’ ямбан манзарана’’ хибяри’’  малӈэ’ меретаӈэ’ нюмдеба’ пир’’. Мал’’ пыдо’ харто’ манзаидо’ тенева’’,  мал’’ пыдо’ не’’ ӈэя’’, хасава’’ ӈэя’’ тэна’’ мерець ӈэдалёрць’’ мян’’ӈа’’.  Пыдо’ хой’ илм’ мэнена’’, пыдо’ ямдо’ теневана’’, пыдо’ тэкоцидо’  сахарамбада’’. Пыдо’ ныланавам’ ехэрась, хуркари’’ нумгана манзаидо’  нерняри’’ пэръядо’. Иб’ ӈод илевадо’ тоенанарха’, недбидо’ нюдя’’  ӈэдараха’’. Тыто’ хадырць я’ тянёмдана. Тарем’ ӈод хойхана мюсерта’’  нина’’ харто’ илевамдо’ мэнесь, тэкоцидо’ пэрць мюсерӈа’’. Ханяӈы’’ яхана  не’’ ӈод хасавидо’ нядабась нянэй мякана иле’’, мяд’ ибам’ лэтби. Тарця  нина’’ похона ӈопой ныланасьты’’, ты’ яляхана таславы яхана ма’’ласьтыд’.  Тикахад’ Няръяна маркана хусувэй сидя по’’ ваерась «Сямянхат’ мерета»  сянакова танесеты’’. Тюку по’ «Сямянхат’ мерета» сянаковава Россияна  национальный календарь событий’ мю’’ таславы.  

Мэта’’ ирийна нябимдей’ толыркана Няръяна маркана «Сямянхат’ мерета»  ваерась. Тюкумэвахана округна еркы’ март ныхыдо’ хормась самляӈг ю’’  ӈопой хибяри’’ ма’’лэйдаць. Хойхана мюсерта не’’, хасава’’ поӈгнандо’  пирдырӈаць. Тыбэртя’’, хойхана мюсерта’’ не’’, хуний «Ерв», «Харп» сельскохозяйственный производственный кооперативхана манзара’’, «Вы ту», «Ялумд», «Нерута» семейно-родовой общинахана тыбэрӈа  харто’ тыдо’ мэць март’ товыць. Тарця сянакован’ хойхана илена’’ нина’’ харвась’ тэворцеты’’. Хусувэйдо’ ихиняндо’ тэхэ’’та’’ енасьты. Валакада тарця пирдырмахана нердева ӈока’’ ӈамгэхэд’ нив’ пере’’.

Тэхэ’’на’’ ӈэдалёрмахана сямянд’ нердевы Андрей Григорьевич Явтысый, пыда тюку по’ ваеравы пирдырмахана хасава’’ поӈгана сямянд’ меретаӈэ’ нюмдевы. Мядонзэйӈэ’ снегоход’ ня’’амась. Андрей Григорьевич тенад’ хойхана манзара, неда’ Ольга Владимировна «Вы’ ту» семейно-родовой община серу’’ таслабдаӈэ’ тара. Андрей Григорьевич манзаямда теневана ненэця’: - Мань’ школан’ пуд хойхана манзарась’ пявась, тарем’ маля тэхэ’’на’’ няхар’’ ю’’ си’’ив по’’ ямбан манзарадм’. Нисяв’ Григорий Иванович, небяв’ Октябрина Никифоровна тэхэ’’на мэбэйха’, пили’’ хойхана мюсермэхэ’. Мань’ хойхана вадымась, теда манзарам’. Тюку яля’ «Сямянхат’ мерета» ӈани’’ сидна’’ ма’’ла’’, тэна’’ ӈэдалёрӈаваць. Нертейӈэ’ томась, ихинян’ сава, маймбим’ тарця серт’. Маля сян’’ по’’ турӈадм’, тарця пирдырмахана сяӈгова няхарамдэймась, тикахад’ нябимдейӈэ’ турӈамась. Ти’, тюку по’ нердем’. 

Не’’ поӈгана нердевы Екатерина Егоровна Ледкова, хойхана мюсерта некоця «Еврхана» манзара. Пыда ӈод’ едэй буранхана мяканда  ӈэдалэяць.

Хусувэй «Сямянхат’ меретахана» ныхыда хорпавы хибяри мядонзэйм’ ня’’амась, хусувэдо’ сава ихиня мяканда ӈэдалэяць. Хойхана илена’’ нина’’ маць: - Нерня ӈод' тарця пирдырман’ тына’’ хамадабгуна’’, тамна туртава’’. Тюку по’ нерня нивы’’ тарпвы’’ ненэця’’ тарця вади’’ мэ’’ӈаць: маня’’ ялява ниван’ хабесь ӈа  ӈодьбянда тарем’ еримя. Нердевы’’ нина’’ ед’ маймбива’’.