Ямалкана со’’явы, вадювы, тоходанвы, ӈока по’’ ямбан манзаравы паднана не Нина Ядне иле. Тюку ирий сидя ю’’ нертей яляхана си’’ив ю’’ помда ядтась. Таӈок по’’ ямбан я’ ниня иле, сертавэда, манэ’’мэда тянё вуни’’ӈа’’.
Теда Нина Ядне Надым маркана иле. Со’’яма ялямда Саля’хардахана мэ’’ӈадась, округандо’ музей мякана теневана нида’’ ма’’лавысь. Хусувэй мядоманзь’ товы няда паднана няханда ихид’ миндя’’ вади’’ тэвравысь. Нина Ядне ӈод харта нямнанда вади’’ мэ’’ӈась, пудана сян’ по’’ ямбан падвы манзаида тэвравысь. Ӈопой тарця манзаяда луца’’ вадавна таремъюв’ нюмдевы «Вкус морошки». Выӈгана вадюданна’’ ӈодяхат’ мараӈга сямянд’ харвабтана ӈодякода ӈэвы. Падвэнанда Нина Николаевна харта мэ’’мы иланда нямна падна.
Нина Ядне паӈгуда тыбэртяхат’ пере. Нисяда, небяда хойхана мюсерта ненэця ӈэвыць. Ся’’ня Нина соявы? Небянда, нисянда вадахат’тенева: сайнорма ваера’’махад сидя по’ ваерась, ты ниць ёльць ӈэвысь. Тикахад таслась, ёнар’’ хасуюёнар’’ тет ю’’ си’’ивумдей похона’ соявы ни’’ӈа, ты ниць ирийхана. Нисяюда, небяхаюда тазовский выӈгана мюсерць илевыць, Нинади’ ӈод хойхана соявы. Тазовскийхана школамда ёльцесь, тикахад’ тамна нерня Ленинград маркана тоходанась, луца вада, литература тохолкодаӈэ таняхад’ тарпвыць. Тикы’ пуд маля сян тохолкодаӈэ манзаравысь. Хой’ тер’’ ӈацекы’’ тохолабвысь. Нянэй не, хари вадавнанда лаханана, хой’ илм’ сававна теневана маля сидя юкад’ вата по’’ ямбан Надым маркана иле. Тыбэртя не ню илеванда сер’ паднава серм харвабталась. Ӈэрм ненэцие ил’ нямна паднась пядась. Ханзер нянэй мякана ненэця иле, ханзер’’ выӈгана мюсерта нида’’ манзаидо’ пэрӈа, тэкоцидо’ ханзер’’ мание’’, нюкцидо’ вадаби’’. Хари’ янда нямна падвы манзаида маля тянё ни’’ӈа.
Нина Николаевна луца’’ вадавна падна, тикахад’ нянэй вадавна паднавамда ёльце харвабтада. Ёнар’’ хасуюёнар’’ сиднтет ю’’ сиднтетимдей похона нюртей рассказм’ падвысь – «Мрна». Си’’ив по’’ ваерась ёнар’’ хасуюёнар’’ хасуюр’’ самлязимдей похона нюртей книгада «Я родом из тундры» ӈадимясь , ханяна нюдякоданда ханзер’’ вадюданвамда падась.
Тюку по’ сие ниць’ ирий сидя ю’’ нертей’ толыркана Нина Николаевна Ядне си’’ив ю’’ помда ядтась. Нерняна сертавнда манзаида тамна ӈока’’, луца’’ вадавна манзь: планда ӈарка’’. Ӈоб’ нерня паднана нява минаць ядая’’, сенз’ ӈэя’’, сава ихиня хусувэй товы ялямда ядтамбая’’.
