Хусувэй по’ Москва маркана «Сокровища Севера»  нювм’ нюбета выставка-ярмарка яндахат’ товы’’ ненэцие’’ ма’’ламби’’. Тюкумэвахана тарця ма’’лёвам’ ӈэрм яхад’ товы’’ хибяри’’ «Сокольники» конгрессно-выставочной центрхана мэтадо’.

Ӈэрм яхана ӈокханда тет юкад вата хуркари тенз’ мэта хибяри’’ иле’’. Хусувэдо’ харто илесь ядо’, хари’’ манзаидо’ пэрӈа, харто’ вадамдо’, культурамдо’ мэць яханандо’ иле’’. Хуркари’’ тенз’ мэта ненэця’’ маля юкад’ вата по’’ ямбан Москва маркана ма’’люрцеты’’, таняна выставка-ярмаркам’ мэцьты’’. Ӈэрм яхана илена’’ хибяри’’ харто’ мядудо’ мярбасьты, харто’ яханандо’ сертабада ӈавар’’ тэврабсеты’’, хари’’ сёдо’ мэцьты’’, харто’ тарабцодо’ манэ’’лабтавась турцеты’’. Тарця серт’ ӈарка маркана илена’’ хуркари тенз’ мэта хибяри’’ ӈод маля торумы’’. Пыдо’ «Сокровища Севера» выставкам’ ӈатесетыдо’.

Тюку по’ тарця ярмарка-выставка манзаямда мэта’’ ирийна сидя ю’’ маттамдэй яляхад’  ты’’ ниць ирий нябимдей толыр’’ ӈэсонд минреӈгуда. Яндахат’ товнда хибяри’’ тянё ни’’ӈа. Маня округхадна хэвы’’ нина’’ ӈод таня манзараӈгу’’. Тикы’’  мел’’ нина’’ Наталья Латышева Несьхад’, Лилия Тайбарей Краснойхад’, Галина Артеева няби Александр Ледков Няръяна маркад’, Тикахад’ «Вы’ ту» семейно-родовой община нерм’ пэртя Ольга Явтысая. «Кочевье Севера» фестивалькана ненэцие’’ сё’’ Екатерина Тайбарей мэта’’, тикы не’ Краснойхана иле, «Ненэй сё» фольклорной группа’ манзаям’ нерня минренава.

«Сокровища Севера» тюку по’ едэй яхана ваераӈгу’’, нина’’ несэй яхана манзаидо’ минреӈгу’’. Таняд’ то’’омахадандо’ нядандо’ вадам’ намдгува’’.