Округна школахана тоходанвы’’ ӈацекы’’ теда маля ирий ямбан ныланавидо’ мэ’’ӈа’’. Школамдо’ ёльцембада’’ ӈацекына ӈани’ маӈгты ирийна ямбан экзамендо’ мипиць.

Хасуюдимдей классм’ ёльцевына’’ ваеравы си’’ив пудана яляхана нерня тоходанва нямна таславы падродо’ ня’’амаць. Ӈобянганя классм’ ёльцебадина ӈод’ пудана экзамендо’ мипи’’, школамдо’ ёльцева нямна тарана падродо’ ня’’амби’’. Тюку ирийна сиднтетимдей яӈганя яляхана Няръяна маркана школамдо’ ёльцембада ӈацекына е’’эмня «Марад’ сейм’» нюбета площадьхана ӈарка ныланава ваерась. Тикы яляхана школахана  ӈоб’яӈганя по’’ ямбан сававна тоходанвы ӈацекы, хуний аттестатханандо оценкидо малӈэ’ самляӈг ӈобкана ма’’лыць. Тарця ӈацекы’’ ед ӈока сава вада’’ соць. Округханана ю’’ ӈацекы’’, хуний тюку по’ золотой медальм’ ня’’амвы, таӈок  ӈацекэхэд’ пелядо’ Искатель ӈэсыхы’ школахана тоходанавы’’. Сидя медалиства’ округна ӈэсыхы’ школат’ тарпыдаць, Красной’, Шойна’ ӈэсыхыд’.

Тюку яля’ мальӈгана ӈобяӈганя классм’ ёльцевы’’ е’’эмня ханярина выпускной бал’’ миӈа’’. Ӈокханда сидя юр’’ няхар’’ ю’’ ӈацекы’’ школамдо’ ёльце’’. Ӈокаюв’ маля нерня тоходанва серудо’ таславы’’, пыдо’ тенева’’ маля хурка специальность нянандо’ тара, ханя нерня тоходанвась ӈэдалаӈгуд’. По’’ ваерась тюку по’ школамдо’ ёльцевы харвабнанда манзаравась яхандо’ тута’’. Ӈарка илан’ тарпутана’’ ӈацекына нерняна ӈод’ хусувэй серудо’ саваривна миӈая’’, харвась тоходаная’’, мэёвна ӈэто’ ниня нуя’’.