Нейко Максимовна Янгасова Саля’хардахана илена не. Пыда – тохолкода. Илеванда’ ямбан харта вадамда сахарамбась’ иле. Тарем’ ӈока хуркари лаханако’’ ма’’лавысь, тикахад’ мал манзаида книгаӈэ’ сертавыдась. «Ненецкие сказки и эпические песни сюдбабц’’, ярабц’’» книгада сидя ёнар’’ нюртей похона тарпыць. Тарця книгахад’ мэвы’’ вадако’ пелям тюку яля’ толара’’.
Тет нямд пай’ ханя мимбато’ ӈод’’ хадридо’ миӈа. Ялям’ ним’ тола’’, пим’ ним’ тола’’. Мерцярив миӈа. Тет нямд пай ӈамгэ’ пирка’’на янимя’’. Халырмаханандо’ хадырцеты’’, ва’’анваханато’ ва’’ансеты’’.
Нарэйӈэ хая. Тарем’ мэнаханда та’ няӈэӈэ хая. Та’ ямбан’ хадырмаханандо’ хадырцеты’’, ва’’анваханандо’ ва’’ансеты’’. Ти ӈани’ сырэйӈэ хая. Сыра’ ямбан’ ӈэдалёрӈам’. Тас поӈэ хая. Тас по’ ӈэсоӈгана си’’ив юд’ пир’’ мяд’’ ӈадимя’’. Хано’ малувна тет нямд пай миӈа’’. Мяд’ сиӈгана няхар’’ хасава ӈамдёвы’’. Ӈопойдо’ тюнда мал ӈобт’ петиӈа, нян ялъй, ма’’нив’: – Нямд Пай вэсаком’ хадабаб’’на’’ тет нямд пай ӈадьбяндо’ яӈговынё’’. Ӈамгэ мэ’’мыданё’’. Тедахав’ мань ня’’амаӈгун, мэтын.
Тарцям’ намдась мэта иням’ нэкалӈав. Тюрав тэхэ’’н ни тэвор’’. Хан’ недецям’ токадтам’. Тет нямд пай ӈопойдарев’ санэйд’’. Пуний хан’ тёндеркад хасава хадарида выркада’’. Мань хав ялэлам’. Пыда мамонда: – Тяхакуна ня’’амбан тарась.
Ӈани’ ӈамгэ’ пиркавана тет нянд пай янемя’’. Хадырпато’ хадырцеты’’, ва’’ансеты’’. Тарем’ тас по’ ӈэдалёрӈам’. Тас по’ ӈэсоӈгана самбляӈг ю’’ мядм’ хом’. Хано’’ мало’ ед’ тет нямд пай ӈэваридо’ яры’’. Мядо’’ нерняӈы хано’’ малувна пэрӈадо’. Хано’’ малахана си’’ив хасава хасавады’’, ӈопойдо’ тюда лабне. Сюрбахая лахана, ма’’нив’: -Нямд Пай вэсаконд нюнда ню то. Ня’’ма тара. Тет нямд пайм’ мань мэтын.
Тэ’’н иням’ нэкалӈам’, тюрав недецяӈг’’ токадтам’. Тет нямд пай ӈопойдарев’ санэйд’’. Хасава си’’ми ня’’ма пубта. Пуня’ ярэйв’’. Хасава ниня якада ӈэвамда хадепи.
Ӈани’ сыра’ ямбан’ ӈэдалёрӈам’. Тет нямд пай хадырпато’ хадырцеты’’, ва’’анбато’ ва’’ансеты’’. Ӈамгэ пирка’’на нерни’ няна ӈоб’’ ӈарка мя’’. Ӈоб’’ ӈарка мякана ӈопой хасавады. Тет нямд пай хурёди’’ пыян’ нулъяд’’. – Тет нямд пай харто’ то’’, ӈамгэхэв ӈацекэцям’ тавы’’. Няни тарем’ маӈгая яда. Тэн иням’ сятаняю’ нэкалӈав. Ханаан недецям’ ӈани’ токадтав. Тет нямд пай лерёдадрев’ санэйд’’.
Хасава’ пуняӈы тёндермана хадарида выркада’’. Пыда мамононда: – Вэн, тяхакуна нивэв манэс’’. Миндяханда ня’’ма тарась. Тад хэбани ӈани’ тас по’ ӈэдалёрӈам’. Тыни’ хадырмаханандо’ хадырцеты’’, ва’’анаваханандо’ ва’’ансеты’’. Ӈамгэ’ пирка’’на ӈани’ ӈоб’’ ӈарка мяд’ нимня ӈадимядм’. Ихинян мадм’: – «Сеня’ ӈопой ӈарка мякана си’’ми ня’’амван харваць. Ӈани’ тарця ӈарка мякав нинякы ӈа’’, хадри’ манэтанакэв.» Ӈани’хаям’. Тет нямд пай ӈабцато’ хурёди’ пыяха’’ ӈэваридо’ яры’’.
Пой ӈутокана хыбяхарт яӈгу. Тад хано’’ малан’ тэвыв’’. Лыӈгарёвы хасава санэй’’, мэта инями ня’’мада. Тадахава ханав мер’ сярада. Си’’ми сёбяцяхадан ня’’ма. Хананда няна нюдерць хана. Наронда ӈылад сябарць тыбкамда тюхалӈа. Ӈэвав сапада, пыя’ вэч пирахарт ни’ ха’’м’’. Ӈэвав сапасетыда, ӈобтикы яханда ӈани’ ӈомзеты’’. Пэвсюмя’ ямбан’ си’’ми сапапи. Нё’ си’ няна си’’ми хана. Пи’ ямбан’, няхар’’ яля’ ямбан’ си’’ми сапапи. Няхар’’ яля’ ӈэсоӈгана мят’ тёрэй’’: – Не’’, падыда’’ тада’’! Пады’ ед’ сапатав.
Малда ни’’ӈа’’.
