Тохолкова по’ ямбан округна школаха’’на хуркари’’ ихиня сомбой сер’’ ваеранаць. Школа-интернатхана манзарана’’ тохолкода’’, воспитатель’’ ӈацекыто’ е’’эмня манзараць. Ӈопой тарця сер’ нямна вадам’ тохолкода’ Матрёна Ивановна Талеева падась.
Варӈэ’ ирий’ пуданаха’’на яндавна иленя’ хибяри’’ яна’’ ялям’ мэцьты’’. Яндер’ хибяри’’ хамадамбидо’ ява’’ ӈопой, ӈадьбянда саць мэне, сянзь, лэтрамба тара. Хусувэй я’ ниня иленя’ хибяри сомбой, илебядёда, систой, хаерцавэй ян’ маймбаӈгу. Ява’’ илебядёда, илевахана сава, сиби ӈэӈгу.
Вы’ яханана’’ сывыда пон’ ӈэсьты. Хибяри’’ тецьдан’, япда мертясавэй яляха’’, хадха’’ малесетыд’’. Нарам’, иба яляко ӈателта’’. Варӈэ’ ирий’ пуд’ хаерэко ям’ юдамба пяӈгуда, варё’’ ӈармданӈгу’’, лэ’’морако’’ малнаӈгу’’, нюртей сую’’ сояӈгу’’. Яхако’’ лохорта’’, то’ вархана ид’’ ӈадимда’’. Маренуй тиртя вынд’ вэрна пяӈгудо’. Ты’ пэртина’’ мазъидо’ ӈокамда, таңодалма’ яхато’ мюселътыд’’. Хусувэй яля суюдо’ ӈокамданӈгу’’, саць сававна нюдякоця су’’лякоця лэтмба тара.
Маня школаханана’’ тикы ялям’ хусувэй по мэцьтыва’’. Теда’ школана внеклассной манзаям’ минрена Пиналей Наталья Витальевна, школаханана’’ едэй по’ пуд манзара пяда. Пыда школа-интернатхана ӈоб’’ яӈганя классм’ ёльцесь. Харта сояма, вадёма’ яда’ Усть-Кара’ ӈэсы, педучилищам’ ёльцемахаданда харта ӈэсыхынанда ю’’ по тохолкодаӈэ манзаравысь. Ӈарка яляна’’ программам’ пыда сававна таславыда, мэкадась. Ӈацекы’’, воспитатель’’, тохолколкода’’ мал тикы’ серкана манзараць, ханяӈы’’ « Нарэйне’ пирибтя’ » сценкахана сянакуць, ӈани ӈацекы’’ «Зарница’» сянаковахана пихина сянакуць. Хусувэй класс мэкад сянаковахана ва’’лёй ӈэвамдо’ няха’’то’ манэ’’лабтамбиць, пирдырӈаць. Интернатхана иленя’’ ӈацекэхэ’’на тарця сянакова саць тара, сава сер’’, пихина сюрберта’’. Ӈацекы’’ ӈобнзер’’ ӈэда серм’ талебаӈгу’’, нидо’ нядамба тоходангу’’, нидо’ тамна тохолкодидо’ сахарамбаӈгу’’. Тохолкода’’, воспитатель’’ ӈацекыто’ хэвхана ӈобтарем’ сянакуць.
Тарця ӈарка ялян’ школахана’’ мядоманзь округанана’’ юнета ансамбль «Хаяр’’» турӈась. Сидя ӈарктадо’ Талеева В.И. няби Шелыгинской Г.В. ӈацьмбой наны’’, пирибтя’’ тарась, хыноць тохоламбиди’, мале ӈока по’’ нясъюмба тарана серм’ минреди’. Тарана’’ поӈгана маня’’ школахана’’ тоходанбэй’’ таняць: Лаптандер Егор, мале ӈокарка по «Хаяр’’» ансамбльхана тара, «Сава сё» конкурсхана хыно’’ӈась, Нельмин’ саляхана юнета «Маймбава» ансамбльхана тарась, Тайбарей Сергей хаювы по школава’’ ёльцесь, теда’ НАЭТхана нюртей по тоходана. Вероника Талеева, Вера Захарова ӈобтарем’ школа-интернатхана тоходанбэйха’, теда’ культура’ манзаям’ минреӈаха’. Сояма ямда хусувэй хибяри сахарамббата тара, якоцяхадана’’ илевава миӈа, вы’ ява’’ сенз ӈэбта, тына’’ сенз’’ ӈэӈгу’’, я’ ни ӈодя’’, тудаку’’, нядэй’’ вадёданӈгу’’. Выӈгана иленя’’ сармикэця’’, тиртяко’’ харто’ яханандо’ илеӈгу’’.
Тецьбата ӈод, сывыда пон ӈэбтаӈгод’’, няданда саварка я яӈгу. Яберена хаер’’ та’ мальгана ява’’ юдаӈгуда, ӈамдэ’’ вадёда, мараӈга няръмидеӈгу.
Ӈэрм’ ява’’ – хар’’на’’ ява’’! Хусувэй понда вато вындерха’’на майбцо.
