Писяко хаерад’ няӈы яля’ няюв’ сядоць пидянда ниня ӈамды. Нюкцида ваӈгутанда малахад хахатато’ сякалпа пин’ тэвавыда. Тикы тарця ӈэб’’ ӈод’’ нарэй саво’ и’’ тю’’уняри’ миӈа. Писяко’ пидя уэсь ям’ яхан’ ӈыхытана ӈом’ саво’ и’’ павэнда нямна мале сэхэвэда.

Писяко’ пидя саво’ ид’’ ерня хаи. Яха’ салаба манзада’’махад писяко’ пидя’ ед’ ӈоб’’ ӈо сэр’’ теда’ тям’ тона. Писяко иланзяламзь пидянда нимня и’’насавэй’ саналы’’. Ӈо сэрм’ хынумба пя: – Ӈо сэре’’эй, пинякумна хань’’, нюкцяини хадаӈгун.

Ӈо сэръ’’я ся’’ня намдаӈгу, ид’ ендад минрена нив ӈа’’, писяко пидя ӈэсянд ӈом’ ясавэй тынылӈада. Писяко’ хани’’ ӈопой и’’надо’,маламбой ха’’. Тикы’ пуна писякор ӈо сэръ’’ям’ тэдорпа пя: – Ӈо сэръ’’яхаваӈэ, ӈарданд ӈарка ӈэб’’ ӈод’’ хаерад’ сит юдава’ сер’ тэри сисюӈэ хэсетынанё’’. Хаер’’ ман’’ма: – Ӈэда мань сяха’ ӈо сэрм’ юдабасетыв. Писяко ман’’ма: – Калей, ханзер’’ ӈэда хаер’’ ӈэса. Вэва янд тер’’ манзеты’’нё’’: – Тиред посыба пяб’’нанд тират помна яӈгэй сэвахана ва’’лортасетынанё’’. Тарць’’ харахана ӈобтарем’ ӈаркар яӈгусенё’’. Ӈамгэ пирка’’на тир’’ вахалъяд’’: – Ханзер’’ ӈэда писяко ӈэса, сяха’ маня’ помнана’’ хаер’’ сырцеты.

Писякор ма: – Калей, тамна лахана’’, Ӈэрм’ хоранда сидда’’ посыба пяб’’ нуво’’ няби тахаӈгана нэлортасетыда’’нё’’. Ӈэрм’ хорар ма: – Сяха’ мань посма’’хадани тир’’ нуво’ тахаӈгана нэлортасеты’’? Писякор ма: – Пыдар ӈод’, Ӈэрм’ хораӈэ, ӈаркар яӈгусенё’’. Тиред посыба’’махаданд маня пэнд’’ ни’ пэдюрць ӈамдасетынанё’’.

Маня пэ вахалъй’’: -Писяко, ӈамгэ е’’ни тарем’ лаханан, сяха’ Ӈэрм’ хора нини’ пэдюць ӈамдасеты’’. Писякор ман’’ма: – Хабинд янде’’э сит вомдахая хаесетынё’’. Хаби янде’’э ман’’ма: – Ӈамгэ ненадо яляхана пэм’ вомдасав. Писякор ман’’ма: – Хаби янде’’эхэваӈэ, нена’’ нерцякабтвонор. И’’насавэй’ Неру вану’’ ӈыламна си’’ми пюсь сабканортаханд пыянд тынам’, тэвамд таси’’ ӈэдарасетыранё’’. Вэнекор мунзялма. Писякор ӈэванда сери ядалъй’’. Тарем’ яданаханда мяды’ тири’’мана ӈадимя. Мяды’’ тирка’’на нельня’’ мя’ хаёвы’’. Писякор ма: – Нельне’’мяокцяи’’, тикахана тароси’’ юсида’’ хаёвэда’’нё’’, сидда’’ нелавы няра’’ тароси’’ сидда’’ тикан’ моё’’мынё’’, илеван’ харвахавабта нянани тода’’. Ӈока харанда яӈго ӈобт’ ядалъяд’’. Тарем’ миндахандо’ ӈоб’’ неро яхам’ нярахала’’. Пыдо’ недам’ минре’’. Мюсена’’ ненэця’’ нацдэй’’ нимня яхам’ мадавэдо’. Писякор ман’’ма: – Ӈамгэ ӈылека тюкон’ сидда’’ ит’ тэвара, харта’’ ялаханда’’ пыдара’’ тюкона хаӈгуда’’, нянани тода’’. Яха’ тяханяӈы таныкана подер’’ ныкалавы, подер’’ таня хаёвы. Пияскор ман’’ма: – Подерпэй’’ тю’’уня’ ӈа’’ хэхэва’’.

Тамна миндяхандо’ неда’ мюня нехолцавэй пэхэнабць’ хаёвы, ютнабця’ пэ хаёвы. Пыдо’ мал’ ӈокахандо’ ядалъяд’’. Тарем’ миндяхандо’ ӈоб’’ пя’ пия’ яӈгом’ хо’’. Тикы яӈгохона ӈоб’’ пия икахаданда тарку. Писякор яӈго’ тебкабтавы’ пиям’ пирбяхананда тю’’у’ илада. Яӈгоход ха’’мвы пияко наӈэдя яляхав ӈопой яхана сюра, тарем’ мэнаханда ӈахат мирканда ха’’мы. Пия’ яӈгом’ сертаба’’ма яхананда хасава парэнда таня хаевэда. Пияскор маси’’: – Ӈацекые’’, тамна нерня’ хандава’’, яля ӈэваханда тюку хэд’’ ненэцям’ ӈули’’ тэвахава’’.