Та’ мальӈгана хынокад’ хибяри’’, тарана’’ хибяри’’ харто’ хамадавы’’ программыдо’ манэ’’лабтавась’ ӈани’ яха’ тэворцеты’’. Ӈани’’ яхана, ӈани’’ маркана танеда фестивалька’’на’’ харто’ манзаидо’ манэ’’лабтабасьты’’. Тарем’ ӈод хынокад’ нява Фаина Харитоновна Ледкова Архангельскан’ тэвормысь, таняна нита’’ няюв’ манзаравысь. Тарця сер’’нямна пыда няюв’ тарця лахакурмав’ танясь.
Корр: Фаина Харитоновна, пыдар’ маля ӈока’’ по’’ ямбан хыно’’ӈан’, невхы’’ похо’’на «Маймбава» ансамбльхана таранась. Теда маркана илесь, ӈопой яхана ӈани’’ нин’ хасена’’. Манзара нибнанд’ ӈод сертабада манзаид’ пилибт’ танесеты. Пыдар’ сит’ маля тенева’’, хыно’’манзь’ сит’ ханяри’’ ханьзьты’’. Та’ ёльцяӈгана ханяхова тэворӈанась, тикы серу’’ ваде’’каран’: ханяна мэсан’, ханзер’’ таня еримзан’, хибя сит’ таня’’ хаӈась таняюв’ хэвась?
Ледкова: - Архангельск’ маркад «Баренц секретариат» сими’ товась’ хаӈась. Шалев Андрей Александрович таняна манзара, пыдо’ няюв’ мань’ маля’’ ӈэдалёрӈамась. Таняна «Летнее солнцестояние» нюбета фестиваль’ миӈась, нюмда луца вадавна хэтась тарем’ со’’. Тарця фестиваль’ Арктикахана илена’’ хуркари’’ тенз’ хибяри’’ е’’эмня сертавысь. Маня’’ ненэцяӈэ’ ӈоб Ӈэрм’ я’ терва, Арктикахад’ перева’’. Таняна саам’’ таняць’, сидя хибярихи’ Норвегияхад’ товэхэсь. Ӈани’’ яхад’ тобэй саамка’ сабе’’ ни’’ хынос’’, пыда вадако’’ падби, вадако’’ ваде’’ӈа’’. Пыди’ Тромсё маркана илеӈаха’, таняна харто’ вадамдо’ нерня’ пэрӈаха’. Олстен ӈани’’ харто’ инструментханандо’ сянаку, харто’ сертавы ӈамгаринато’ сянаку, тикахад’ мун’’ ӈадиберӈа’’ – музыка. Пыди’ специальной образованияди’ яӈгу, тарем’ ӈод ёльце’’ мэбэтаха’.
Корр: Пыдара’’ ханяна концерт’ сертабидаць, Архангельскар’ нив’ ӈарка’’ мар’ӈа’’?
- Нюртей’ мероприятия’’ гостиной дворка’’на’’ миӈаць, «Белоствольной палатана» мань’ хыно’’ӈамась Тим Дорофеев «Арт» группа’ няюв’. Пыдо’ сянакуць, мань’ хыно’’ӈамась’ ненэця’ вадавна. Хибяри’’ сидна’’ ёльце со’’ ядтабиць. Тамна не танясь, пыда Норвегияхад’ турта. Пыда Няръяна март’ ты’ саполана’’ ирийхана турӈась, маня’’ округна музейхана выставкам’ нэбись. Тикы не Канин’ выӈгана по’ пеля ямбан мюсермысь, ненэцие’’ поӈгана илесь. Нянэй ненэця’’ поӈгана илевамда ёльце’’ саву’’ӈада’’, ёльце’’ сававна ваде’’ӈада’’. Масьты: ханзер’’ таняна иледата’’, мань’ выӈгана мюсерман’ ёльцяӈгана пилибт’ хантадамзь’. Тамбир’’ тецьдам’ илеван’ ямбан нидамзь’ манэс’’. Хибярида’’ ӈани’ ёльце’ сава’’. Вадам’ ехэрая’’ поӈгнандо’ саць пон’ илемась. Хуркари’’ сидяӈг’’ сертабавысь, хуркари’’ поделки’’ сутугахад’ сертабавысь’. Ниня’’ тарана ӈамгарихит’ паской манзаяко’ тэри’’ сертаби. Манзаякуда ниня’’ мэсанако’’, ниня’’ ӈарка’’, ёльце сомбой’’. Хойхана илевы, ӈока’’ мэкад’ ӈамгэм’ манэ’’мы.
Корр: Тамна ханяна программамда манэ’’лабтабираць?
- Программава’ саць ӈаркась’. Талагахана ӈамдёда’’ ӈацембой ӈацекэхэ’ тэворӈаваць, таняна хыно’’ӈамась, Поморской районхана ӈарка хибяри’’ е’’эмня концерт’ манэ’’лабтаваць. Ӈамдёда’’ хибяри’’ сею’ маймбтейна’’, ихиняндо’ савархась’. Ӈокаювдо’ маня’’ хынсана’’ нертеймэвна намдыдось. Маня’’ культурава ехэрадо’, нянандо’ мэкадась. Мань’ ярабц’ мэ’’ӈамась,тикахад’ теда мэта’’ сём’ ханамась. Саам’’ нин’’ вадакудо’ хэтбиць, харто’ инструментханандо’ сянакуць.
Корр: Тарця’’ ӈэдалёрма ихинянд’ хурка’’ ӈэдарахада?
- Сацей’’ савов. Тикы е’’эмня «Баренц секретариат» манзаранаха’ ӈарка’’ вади’’ хэтбим’, Няръяна маркана Вокуев Андрей, Шалёв Андрей Александрович Архангельскхана. Пыдо’ сим’ таня хаӈаць. Саам’’ ма’’нисям’: маня’’ культурына’’ ӈобняку’’ ӈа’’, ембдярона’’ ӈоб’ серо’’ӈа’’, нойхад’ мал’’ сэдбэй’’. Саам’’ сёдо’ ӈоб’ маня’’ сёна’’ то’’олха’’. Ӈобкана ӈэдалёрмава’’ сававна ваерась. Нерня’ ӈод’ тарця ӈэдалёрмина’’ харвабнанда’ танеӈгу’’. Тэри’’ савась.
