Теда’ товы ирийва’ та ер ирийӈэ’ таславы. Ӈэрм яханана ӈод’ сямянд’ ядембада ирий’. Тюку ирийхана неняӈг’’ ӈока’’, нибярёр’’ маля тэри’’ я’’авлы. Ты’’ паде’’, хибирихина’’ ӈод’ саць ядембада яля’’ сава ни’’ӈа’’.

Ханя’’ маля хантава’’, нум тарем’ таславы нив’ ӈа’’. Неняӈг’’ ӈани’’ тарана’’. Халя’’, тиртя’’ ӈавар’’ ним’ ӈа’’. Хойхана теда тиртя’’ мун’ нарэйнда’  тотрев’ сацьри ни’’ со’’. Пидякудо’ ӈамталбама ёльць ваера, синзевкудо’ вадаби’’. Вадюданна’’ тиртякуто’ ӈавраха’ тэваби’’. Те’ ёльцяӈгана выӈгана хуркари’’ нувм’ панзе’’ ӈока’’, малӈэ’ тиртяко’’ ӈавраӈэ’ серо’’ӈа’’. Таӈы’ ямбан’ тиртя’’, илека’’ хибярихит’ нылана’’. Вымна сарвырта’’ нюкцидо’ вадаби’’, ӈамзито’ хэв’ вадаби’’, хобакудо’ нялирӈга’’. Ты’’ ӈод хобдо’ теда сацьри сава ни’’ӈа’’, нялирӈга’’.

Неняӈг’’ ирий’ сямянд епьда ирийӈэ’ ха’’мурӈа’’. Тюку по’ маниесь, сян яля’’ ненянӈг’’ ирийхана илева’’, нумда тэри’’ ядемби’’. Те’ ёльцяӈгана мунота’’ танесеты’’. Ненэця’’ манзьты’’: мунота сарё’ пуд нувм’ пан’ ӈэрм няӈэд’ ӈадимбата нумда’ сава ӈэӈгу; пон’ ӈадьбата вэвко нум’ ӈэӈгу. Сарё мальӈгана нумӈгана няхар’’ нувм’ пан’ ӈоб’пирувна ӈадимбато’ сян яля’’ ямбан сарё ӈэӈгу. Ӈэрм’ я’ тер’’ ненэця’’ таӈы’’ мальӈгана халядасьты’’, ябемда яляхана ӈамы’’ пиркоця халям’ ня’’амарпи’’. Ӈарка ненэця’’ масьты’’: поӈга нимня ӈока’’ халэв’ тирпато’ парумбась тара, поӈган’ еримы’’ халяр’’ тянё ни’’ӈа’’. Халя’’ икад’ санарпато’, сарё ӈэӈгу.

Неняӈг’’ ирий яля’ няби пеля’ пуданахана хаяр’ саць паранабнанда, мунота’’ ӈэӈгу’’. Епьда яляхана хаяр’ намдёданава мальӈгана нумда тасеярка ӈэсь, сарёӈэ’ ханта.  Хувы’ сава нумгана хаярта няръябта – нумда вомда. Та’ ёльцяӈгана хаяр’ намдутава мальӈгана нумда ӈэрм’ няӈэд няръябнанда- ӈэрм ялянэ’ ханта.