Маня’’ илесь яханана’’ тыбэртя’’ хибярина хусувэй выӈгана тамна мюсерӈа’’. Тыбэртя’’ ненэця’’ харто’ манзаидо’ ханярина минре’’, не’’ тамна хасавидо’ нядабась вымна мюсерӈа’’.  Юр’’ сиднтет ю’’ ёнар’’ мян’ ты’’ нядэй явнана хадырӈа’’. Хойхана мюсерта’’ хибярина, хой’ манзаям’ минренина’’ нина’’ манзаяндо’ хэбидя яля’ таня. Ӈарка хэбидя ялядо’ – Ты’ ялядо’. Тарця хэбидя ялям’ хусувэй по’ мэцьтыва’’, ӈатесетыва’’.

Тюку по’ ӈод ты’ ялява танеӈгу. Тарця яля’ сававна ваерава’’ е’’эмня, хусувэй сер’’ сававна таслась’ теда маля’’ тара’’. Тикы е’’эмня оргкомитет’ манзара, таняна манзаи’’пэртя’’  ты’ ялям’ хамдабидо’. Хойхана илена’’, манзарана’’ хибярина хэбидя яля сававна ваерава е’’эмня хусувэй ӈамгэ’’ ёльцьхананда’ таславы’’ ӈэбнанда’ тара’’. Хаювы яля’’хана оргкомитет’ нертеймэвна ма’’лысь. Таняна таславы сер’’ маля ӈокаць.

Маня’’ округханана Ты’ ялява маля ёнар’’ хасуюёнар’’ няхар’’ ю’’ нябимдей поход’ мэ’’ӈава’’. Хойхана мюсерта’’ хибярина’’, тэхэ’’на’’ манзаранина’’ тарця яляхана ныланавась таславы’’ яхато’ ма’’ласьтыд’. Ӈобкана ма’’лась нина’’ по’ ямбан’ манзаравидо’ таслабсеты’’, поӈгнандо’ пирдырцеты’’, нидо’ манэць маймбасьты’’. Теда ӈод’ тарця ӈэсьты’’. Округханана тыбэртя’’ сельскохозяйственный кооператив’’ поӈгнандо’ пирдырӈа’’, ханяна серудо’ сямянд’ сававна хаювы’ по’ ямбан миӈаць, нарэй просчетдо’ ёльцяндо’ ваераць’ тикахад’ манзаравидо’ таслагу’’. Хурка СПК нерня тарпыд? Тикым’ ты’ яляхана нюмдеӈгудо’, сававна манзарава е’’эмня няхар’’ нерня тарпвы’’ кооператив’’ еся’’ нядмам’ ня’’амгу’’. Тикы е’’эмня няхар’’юр’’ си’’ив ю’’ самляӈг юр’’ еся’’ таславы’’. Еся’ нядмам’ тамна няхар’’ сямянд’ сававна манзаравы’’ ӈэсы’’ ня’’амӈгу’’, пыдо’ нюбедо’ маля таславы’’. Тюку по’ сидя хасаваха’, хуний илеки’’ ядпавыць, ӈобтарем’ есяком’ ня’’аӈгуху’.

Ты’’ ялям’ мэ’’мась хоян’ тиртя’’ ӈано’’ хибяри’’, тарана’’ ӈавори’’ тэвраӈгу’’, тикы е’’эмня тюку по’ еся’’ тянёмдевы’’. Валакада си’’ив рейс’’ сертаӈгу’’.