Округна толаӈгова’ хардахана ӈэрм’ тер’’ ненэцие’’ отделкана манзарана нина’’ ӈарка манзаям’ сертамби’’. Манзарась’ лохондо’ ненэцие’’ хуркари’’ ихид хамадавы’’ мероприятияха’ ма’’лабсетыдо’.
«Толаӈго книга» нюбета клуб’ таняна манзара. Маля по’ ямбан ненэцие’’ нина’’ тарця клубан’ ма’’лёсьты’’. Лимбя ирийхана клубан’ турта’’ хибяри’’ нюртей помда ядабтаць. Тикы яляхана ненэцие’’ лаханако’’ нямна вадидо’ мэ’’ӈаць. Ӈэрм’ ненэцие’’ лаханако’’ хуркари’’. «Ӈэрмний’’ яндер’’ вадако’’» – толаӈго’ хардахана манзарана’’ нина’’ тарця ма’’лёвамдо’ тюкумэвахана таремъюв’ нюмдедонзь. Вадам’ минренаӈэ’ Надежда Талеева тарась. Пыда ма’’лёвам’ нэбвананда мась: – Мань’ тарця харвабцоми’ таня. Ненэця’’ вадава ханярина собнанда. Вадам’ теневанина’’ лаханабнандо’, вадам’ ехэрана’’ ӈани’ вадава намдурпато’. Тикахана ӈани’’ тенз’ хибяри’’ вадава намдуртадо’, тумдабаӈгудо’, торомдаӈгудо. Маня’’ паднанина’’ стих’’ телевидениехэна собнандо’ ӈани’ сава ӈэӈгусь. Маня’’ клубхана ма’’лёбнана стих’’ толабасьтыва’’, тикы сава сер’.
« По’ ямбан сертавэва’’ тянё ни’’ӈа’’. Хусувэй ирийхана клубва’ манзарасьты. Алексей Пичков со’’яма ялян’ ихиня сомбой мероприятием’ хамадаваць, тикахад’ сайнормы ненэця’ Николай Ледков нямна хамадавы’’ лахарёва танясь. Тикахад’ таӈы’ ирийхана ныланана’’ ӈацекына ма’’лабасьтыва’’, книга’’ выставки’’ сертабасьтыва’’, хуркари’’ устной журнал’ танесеты’’, хар’’на яна’ нямна хамадавы’’ вадина’’ мэцьтыва’’, – тарця вади’’ толаӈго’ хардана отдел Севера нерм’ пэртя Зоя Ивакилева хэтась.
Тюкумэвахана хамадавы ма’’лёвахана ныланавась’ товы’’ нина’’ ненэцие’’ фольклор’ нямна лаханаць. Невхы’’ ярабц’’, сюдбабц’’, хынс’’, сё’’ лэтбась’ тара’’; невхы’’ сё’’ теневанахат’ ма’’лабась. Хибярина тарця сер’ нямна ӈока вади’’ мэ’’ӈаць, ханяӈыдо’ хыно’’ӈаць. «Голоса забытых кочевий» – тарця книгам’ Валентина Артемьевна Ханзерова падась, таняна хуркари’’ невхы’’ хынабц’’ ӈобт’ ма’’лавы’’. Тикы хынабц’’ Ирина Ханзерова «Ямб’то» общинахана илена’’ ненэцяӈгат’ ма’’лавыдась. Валентина Артемьевна хусувэй хынсан’ инзелесь, вадида падарт’ падвыдась. Ненэця’’ ханяӈы’’ хынсадо’ саць ямб’’ ӈэ’’ним’’. Ӈокаюв’ хойхана вадюданвы’’ хибярина тарця хынсаӈга’ мякнандо’ инзелевы’’ ӈэсьты’’. Тарця хынс’’ Валентина Артемьевна ӈока’’ небяхаданда намдурӈась. Пыда небя’ хасада хынокад’ не ӈэвысь, ӈока’’ хынс’’ теневавысь.
«Илебц» театрхана сянакода’’, «Ханебцё» фольклорный группахана хынота’’нина’’ «Ӈэрмний’’ яндер’’ вадако’’» ма’’лёвахана хыно’’ӈаць. Ӈока сеян’ мэёвна еримберта сё’’ соць. «Я’’авлада не» сём’ Анастасия Помылевахад’ намдаваць, «Сихиртя» сём’ Фаина Ледкова мэ’’ӈась; Федосья Кауц, Нина Баркулёва, Федосья Шамсутдинова хыно’’ӈаць.
Тюкумэвахана ма’’лёвахана ӈарка хибяри’’ поӈгана ӈацекы’’ тянё ниць’ ӈа’’. Пыдо’ ӈод харто’ тенз’ ненэцието’ хынсха’ мунзпой’’ инзелець, ихиняндо’ савась. Тикахад’ ӈацекына Прокопий Явтысый падвы стих’’ толаць.
Ма’’лёва’ пуданахана Валентина Тайбарей ненэцие’’ округна Гимн’ мэ’’ӈась.
Тамбир’’, хусувэй хибяри’’ ихиня сомбой ма’’лёва округна толаӈго’ хардахана ваерась. «Толаӈго книга» клубва’ манзара. Теда таняна манзарана’’ нина’’ нерняна’ товнда ирийхана ваеравнда ма’’лёян’ маля хамяку’’.
