Маня’’ яханана хусувэй по’ харта нюмда танесеты’’. Теда’ товы сидя ёнар’’ самлязимдей’ яӈганя пова’ округханана ӈацекы поӈэ’ таславы’’. Ӈацекына яханана хусувэй по’ сояӈга; ӈацекына сававна вадюданва’’ е’’эмня хусувэй ӈамгэдо’ танедарха’.

Нюдякодандо’ садикан’ ядэрӈа’’, тикахад’ школахана тоходана’’, школамдо’ ёльцесь тамна нерня тоходанвась’ хан’’ӈа’’. Округна ӈэсыхы’’на’’, маркана хусувэй по’ едэй школа’’, садик’’ мимби’’. Спортивной мя’’ сертамби’’, культура’ хардаха’’на ӈацекына е’’эмня хуркари’’ мероприятия’’ танесеты’’, музыка’ серм’ ӈацекына тохолаби’’, спортм’ мэнена’’ ӈацекына яханана таня’’. Ӈацекы’’ пудана яханана илевнда, пыдо’ нядандо’ переӈгу’’ – по’’ ваерась округва хурка яӈэ’ ханта’’. Пыдо’ сава хибяриӈэ’ вадювандо’ е’’эмня теда ервуна’’, небя’’, нися’’ ибедорӈа’’.

Маня’’ яханана мэбета’’ ӈацекына тянё вани’’ӈа’’. Ӈацекы’’, хуний теда маля илан’ мэёвна сырта’’. Пыдо’ школахана савовна тоходана’’, хусувэй ӈамгэм’ теневаван’ харва’’. Тоходанвандо’ хавна тарця ӈацекы’’ хуркари’’ внеклассной мероприятияха’’на’’ нердесьты’’, кружокха’’, клубха’’ ядэрӈа’’. Хуркари’’ ӈани’’ яханана танеда’’ ма’’лёваха’ тэворцеты’’. Спортхана ныхыта’’ ӈацекына’’ таня’’; музыкам’ мэнена’’ ӈацекына яндамна ӈэдалёрцеты’’. Тарця ӈацекы’’ хуркари’’ тенз’ мэта хибяри’’ поӈгана таня, поӈгнандо’ ненэця’’ ӈацекы’’ ӈод тане’’ним. Округна хусувэй ӈэсыхына мэбета’’ ӈацекы’’ иле’’. Тарця ӈацекына теневабна’’ тара. Пыдара’’ илесь яхананда тарця ӈацекыта нямна вадида’’ газетахана падбида’’. Хурка’’ мэкад’, сава сер’’ илесь яхананда садикхана, школахана, культура’ хардахана ваераӈга, тикы нямна ӈод’ паднада, сидяӈганда танябнанда ӈэдарамбида’’. Ӈацекына илм’ теневабна’’ тара. Тарця сер’ нямна по’ ямбан паднаӈгува’’.