Сидя тосандаха’, сидя пебясаха’ илевэхэ’. Сидя тосандаха’ ялэ’’ ханеӈаха’.Сидя тосанданда ӈоб’’ не няди’. Некахаюта ханеб’’, нябахаюта няна хаюрӈа.

Ся’’ны ӈэбта ӈод’’ нябахаюда лаханако пэйха’: – : – Нявэ’’, ӈамгэвна ир ядэрӈа? – Ими ни ядэр’’. – Не ӈацекэ’’я тарцяню’: савари тосо’’ хоб нянда пэрцетыню’’. Хадавы ӈэя. Пыдар ха’’маӈан?

– Мань тарем’ тасламбив. Ненэй ӈуда’ есям’ тун’ мохоми’. Сидя тосандахают не ня тюсерта нив’ ӈыдаӈгу’’. Мани’ нянда ниним’ манд’’: -Мя’’ма’’ якэхэма, тюсел ӈыдахар’’? Тосанда’ не ня тюсерта нидав’ ӈыдаӈгу’’, нив’ манд’’: -Сидя не нябав, тюсели’ хурка? Мани’ маньини’: – Тюсел мяд’ мюд нянд си’ няӈгарахая манэт. Мокоданда син’ нянда сим’ хортелабтахая ни’’им’ сылаӈгу’’. Мани’ тухуд тюхулмы ӈуда’ есям’ нянда син’ моими’.

Тарем’ тасалко’’махаданди’ не ӈацекэн’ тёреяха’: – Не ӈацекы, тур пятахар’’. Тум’ пята. Мяд’ мюй якэхэма. – Мя’’ма’’ якэвонда, тюсел ӈыдахар’’. Не ӈацекы’ тюсерм’ ӈыдабаван, ненэй ӈуда’ есям’ тун’ моди’. – Сидя не нябан, тюсели’ хурка. – Мят’ тю’’, харт манэт. Не ӈацекы мят’ тю. Нянда си’ няӈгара макоданда син’ сырӈа. Нябахаюда нянда син’ морёмы ӈуда’ есям’ паромба моди’, хурна хая. Не ӈацекы тэри хава. – Некахаюта тоб’’, тарем’ маньини’: – «Не нянди’ ӈэва’ едяхана ӈэдарабтами’.»

Нув’ пэвсюмзь ламбити’ хырна сованонда. Пой’ ӈухот’ нултаванонди’. Тарем’ маманонди’: – Не ӈацекы, тосод хосая’’. Сидя не нябада мякад пирас’ вахалъяха’: – Не нямди’ ӈэва’ едяхана ӈэдарабтаминзь. Сидя тосандар ниванонди’ пунрю’’: – Хадавэри’ ӈэванӈгабя. Не нянди’ ханан’ хабте’’эям’ подермонди’. Сидя тосондар тарем’ маманонди’: – Ӈуда’ хадавы ӈэб’’нанда – ӈуда’ хадавэхэ’’ханад. Ӈа хадавы ӈэб’’нанда – Ӈа’ хадавэхэ’’ ханад. Хабте’’э ханамда нэкалӈа.

Сянд’ мимба’’нанда ӈод’’, нерняна ӈока’’я мядо манэ’’ӈа. Еркы мяд’ хэван’ нултада. Мякад пухуцяко тарпы’’: – Нюни хэвкод мара’’ тонёв’’, сидя тосондаха’ не ня ӈэдараханю’’. Нюхунда маси’’: – Недар товы! Мякад хасава ӈадимя. Не ӈацекым’ мят’ тюледа. Едэй мэвы нен’ нив’ ман’’: – Еддами пире’’. Тосандаха’ не ня’ намдортада яӈгу. Хасава нерцилы’’. Тосандаха’ не ням’ сюдэхэта питарӈада. Не ӈацекы’ пуй’’ ян’ пудамъяд’’. Ненэй ӈуда еся нянда сивна ӈурна то. Хасава ма’’нив’: – Ӈуда’ хадавэн ӈэвэнаню’’, ӈуда’ хадавэхэ’’ хань’’. Халмер немда хаеда.

Малда.