Округна гимн’
Ненэцие’’ автономной округ’ харта я’ ненадумд сёда ( гимнада ) таня. Вадида паднана’ не Инга Артеева падвы, сёмда Татьяна Артемьева сертавы. Гимн’ вади’’ луца’’ вадахад’ ненэця’’ вадан’ Роза Ивановна Канюкова падвы.
Ӈарка Россияна’’ енабцэй
Округӈэсь, сит хынтабива’’!
Таӈгана мэбета яхана
Ӈэрмва’’ пилибт’’ илея!
Мэёвна перена форпоства’’ –
Российской Державана’’ сюдбя.
Мэнена сое’’ма яна’’ ед
Сава илебцва’’ миӈая!
Ӈэрм яхы маня округвов’’,
Сямянхат юнета ява’’,
Тисьдева саву’’ламбадава’’
Ӈоб’’ нерня’’ вадёдан’’.
Ненэцял, луцарэй, ӈызмарэй ӈод’’
Ӈахат ивъерэй манзара’’.
Ӈобкана мэта ӈэрм хардаханов
Хусувэна’’ мэта яда таняӈов.
Ялумбэй Ӈэрм харпорма серэй
Сейкуна’’ мал’ ӈобнзер’’ ла’’нарӈа’’.
Ӈэрм яхана хибярир нятнарха,
Ӈадьбята малмбой ӈэрмдерараха’’.
Ӈэрм яхы маня округвов’’,
Сямянхат юнета ява’’,
Тисьдева саву’’ламбадава’’
Ӈоб’’ нерня’’ вадёдан’’.
Тюкона я’ инд’’, я’ тебтар ӈока.
Выӈгы тэрэй ӈобтарем’ ӈоков.
Халя нямзэхэ’’, поӈган’ еремга.
Ӈани тенз я нянна’’ ни тара’’!
Россияна’’ енабцӈэ мэтаӈэсь,
Ненэця округ, сит хынотамбивов.
Сюдбя Россияна’’ енабцӈэсь,
Мэнена Ӈэрмва’’ тяха’’ мирнаёв.
Ӈэрм яхы маня округвов’’,
Сямянхат юнета ява’’,
Тисьдева саву’’ламбадава’’
Ӈоб’’ нерня’’ вадёдан’’.
Паднава серм’ Матрёна Ивановна Талеева маля ӈахакуд’ минреда, падвы’’ манзаида маля тянё ни’’ӈа’’. «Мэнена небяв» падвы манзаяда сеян’ мэёвна еримберӈа. Толара’’, небякуда тензебтеда’’; небянда’ таняб’’ нянда лаханада’’.
Мэнена небяв
Мань маймбим’: небяв таня!
Ту’ ӈанохана теда’, тедахава’
Вадё’’ма яхан’ ятналъюв’’.
Небяв сырӈа, пили’’ ӈатена.
Си’’ив нюм’ вадаб’’ сибиць вуни’ ӈа’’.
Вы’ илебцам’ торумда’’махад
Харад’’ ил’ маймбоца яӈгу.
Ханяхэвна сэримы не
Яля манзара, пи сэдора.
Луца’ манзая’ малда ни’ ӈадю’.
Недкуда нюда ила ни’’ым тара’’.
Халям’ пэлаван та’ хэсьты ӈод’’.
Ӈопой енабц ихинанда ӈа:
– Нин ӈармда’’ – сава илелтына’’!
Ню’’ ӈармдана’’, пыда пухумдана
Ӈока манзаям’ манэ’’мы ӈуда
Вэва нум’ нерад нензаласьтыд’’.
Тикы илелхана сава ялякоӈэ
Нюта ню’’ таня’’ – Ӈарка маймбабцо!
Туцякомда мэӈгу, ӈани’’ сэдораӈгу.
Сэдорава сер’ сём’ ханаӈгу.
Мер’’ яӈгумы нюта’ нисяко
Вы’ нямна инда ха’’амбата.
Ида лата не сэвха’’ната.
