Ламдик’ Ларар ерь ӈарка мят’ тю. Мякы мякана сярна ӈадибелыд’’, вэя лохолыд’’. . юдя юдяохор Ларамда ня’’мада, пыди’ пёлъяха’’. Пёданаханди’ пихиня хаяха’. Тарем’ мэнаханди’ Ларда ян’ тада. Сидя ӈэда, ӈудахаюда ян’ тадаӈаха’, паряӈэ хая. Ядувнанда ханта’ вэн ӈанзапидо’.
Сидя Нохоми’ хан’ ни хураӈахаюн. Тиканда маня’’ тетӈэ мякана’’ хаява’’. Мякани тэварэйн. Пуняӈы мяк’’ ӈани’ ӈэдалэйв’’. Ламдик Ларми тамна тадамбавы. Си’’ив яля’ тады.Ӈавэ’’ пирка’’на манзь ханада: – Си’’ми хоӈгас’’. Тикы е’эйӈэ тыни татадм’, не нями таидм’.
Мань мунм’ нидм’ соя’’. Ӈани’ си’’ив яля’ пыда тадамби. Ӈобо’’ манзеты: -Лары’ сядотам’ не нями таидм’. Няхар’’ юр’’ тым’ ӈули’’ татын.
Няхар’’ тарем’ ма. Мань ӈани’ мадм’: -Ненэся ваданд ӈэб’’ мяканд манэтав? Недко сядотам’ нив ӈыдаӈгу’’?
Пыда маси’’: – Тюкохона хахадм’!
Ӈэдалёванда мюмня хаядм’. Тэвыв’’. Яха’ танабць’ саляхана ӈоб’’ ӈарка мя’’. Тэхэвада няхар’’ юр’’ хабт. Ханами сяра мят’ ядадм’. Мякы мякана не сэдоравы. Пелей’ нямна мань хаядм’. Мань тарем’ мадм’: – Няр таня?
Вахалманда сер’’ нянда варан ту’’ есада’’: – Сяха’ си’’ми ӈыдаӈгун? Няни ханяна мэвахад ниннё’’ ехэра’’.
Сэв’’ сэйвы’’. Сэвани ӈадимзь юрка пяв, си’’ивахав яля’ хамбвэ’’рахадм’. Неры мя’’ми тайку’ ӈэсовы. Ихинян мадм’:- Ӈани’ манэкав. Нянтерта савась.
Мят’ тэва мят’ мятюдм’. Ӈани’ ӈопой вадада. – Хыӈгарте’’э Саля’ паӈган’ сяха’ си’’ми ӈыдаӈгун?
Сэвани ӈани’ сэйвы’’. Сэвани ӈадимзь тарем’ сырпа’’ни, мя’’ тайку ӈани’ ӈэсовы. Мят’ ӈани’ ядадм’. Лары’ сядотам’ тарси’’ хов. Мят’ тюхуя ӈани’ хонарав. Вахалманда сер’ пе’’эм’ ту’ ӈар’’ ту’’ ӈани’ енсада’’. Сэв’’ сэйвы’’. Сэвани ӈадимя’’. Пыхыдами ӈоб’ манзабта я’’амав. Тад’ манэ’’ӈав тет саркодами вандако’ ни’ сяравы’’ ӈэвы’’. Тикыни ека мят’ ӈани’ ядадм’. Тю’’мяхадани ва’’ав’ ни’ ӈамдыв’’. Мань ӈани’ тарем’ мадм’: – Ӈамгэ си’’ми хадабин?
Пыда маси’’: – Харт хонараӈгананё’’.
– Ӈамгэ си’’ми сярасан? – Ӈамзадм маторпа выдара’’махаданда ӈэдалёда сит сярась. Нюмда Сусой Парико.
Тиканда едам’ пире. Едами ӈамав. Тикани’ пуд си’’ивахав яля толими вэӈгалы. Немами малесь мань тарем’ мадм’: – Ларыко’’я, едадами пире’’. Сусой Париком’ пуданда пяӈгув.
Едам’ ханя пире’’. Едами ӈамадм’. Ембакая пин’ тарпыв’’. Тет ладсэр’’ нито’ варахана яӈга хадырць нинзярӈа’’. Хабтони сярын. Няхар’’ юр’’ хабт хадо варувна Сусой Парико’ ӈэдалёвам’ хов. Тикахавад тад нёдалмани няхарков’ яля’ ӈу’’лимда нёдадм’. Ӈавэ’’ пирка’’на хораӈэ тэмзавы’’. Паӈг сотэ’ ни’ тэва лембя ӈута тэвра. Тамна тяха’ хэ’’мя ӈута ханяхартана яӈгу. Хэ’’мямда та’ ё’’ӈав. Мякани тэв’’махадани си’’ив яля’ хоныдм’. Немами мале’’мяхадани, едами’ ӈаво’’махадани тет ладсэрм’ подер’’ нинав’. Лары’ сядотан’ мань тарем’ мадм’: – Харт илеин. Мер’ нидам’ тут’’. Тюку яхаданд ханяхарт нён хань’’. Сяха тоб’’ни ӈод’’ хар’’ тутадм’.
Малда тамна ни’’ӈа. Ӈани’ яляхана пелямда толаӈгура’’.
