Округханана Выучейской нювм’ нюбета ӈэсыкоця’ таня’’, ниня’’ ӈарка ӈэсы’. Ӈэсынандо’ юр’’ вата’’ хибяри’’ иле’’. Ӈокаюв’ хибяри’’ тикы ӈэсыхына со’’ямахадандо’ пилибт’ иле’’, тикахана манзара’’. Хибяри’’ харто’ ӈэсымдо’ ёльце’’ мэнедо’, тикада хусувэй серкана ӈади’’.

Ӈэсыдо’ нюдякоця, сомбой, яда’ саць сава. Хусувэй хибяри харта’ харданда’ хэвхана огородда’ таня’’, та’ ямбан вадёвы’’ ӈаворидо’ вэба ириян’ тэвась ма’’лабгудо’. Выучейскоян’ мань’ пилю’’ ирийхана тэворӈамась, ӈэсымнандо’ сими’ Татьяна Николаевна Канева ядэлась. Ӈэсымда, таняна илена’’ нида мэнена некоця тарця вади’’ хэтась: - Маня’’ ӈэсыва нюдякоця, сомбой, паской. Тюкохона илена’’ хибяри’’ ӈод сава’’, хусувэй туртам’ сава ихиня’ ядтабсетыдо’. Хусувэй хибяри тарабнанда сит’ нядаӈгу. Ӈэрм’ яхана ханярина тарця хибяри’’ ӈэван’ хабе’’. Ӈэсынана ниня’’ ӈарка школава’ таня, школа-сад. Ӈацекына’’ ӈока’’ ни’’ӈа’’: садикхана юд’мян ӈацекэва’’ ӈэдакы, школаханана самляӈг-си’’ив ӈацекым’ тохолабива’’. Сидя классва’, сидя тохолкодава’. Школана’ харад’ едэй ни’’ӈа’’, сидя по’ тяхана сулурӈадось. Сава’’, иба’’, яля’’. Теда ӈэсынана культура’ харад’ сертаць, валакада нэӈгудо’. Маня’’ ныланава’’ яля’’хана тикахана ма’’люртава’’, ныланаӈгува’’. Культура’ хардава пон’ ӈатеваць, по’ ваера’’ ханзер’ невхы’ хардава’’ таладось. Хибярина маймби’’, ханяӈэна турцеты’’, ваде’’цетыдо’: ханзер’’ тикахана манзарабнана’’, хурка’’ мероприятиям’ культура’ харад’ нэбва мальӈгана сертась. Маня’’ ӈацекына’’ е’’эмня ӈока мероприятия’’ сертабасьтыва’’, ӈацекына’’ турцеты’’. Ӈарка’’ хибярина’’ ӈод ма’’лабсетыва’’, харвась пыдо’ турцеты’’. Нерняна’ товнда ирийхана ӈармбэй хибярина’’ хэбидя яля’ танеӈгу’’, тикахана ӈарка ненэциена’’ е’’эмня ныланавам’ хамадаӈгува’’. Не’’ яляхана нина’’ ма’’лабсетына’’, Победа яля’ саць ӈарка яля’- сававна ваерасьты’’. Едэй пом’ ӈэсыхына илена’’ хибярина’’ ӈобкана ядтабсетыдо’, культура’ хардан’ турцеты’’. Ӈацембой хибярина’’ таравась’ турцеты’’. Та’ мальӈгана хусувэй си’’ивхана сидямэвна дискотека’ танесеты’’. Сыра’ мальӈгана ӈэсынана хибярина ӈока’’ нисьты’’ ӈа’’, таӈы’ мальӈгана сидямэвна хибярина толыр’’ вадюсеты. Ханярид’ турта’’ мядонда’’ ӈока’’ ӈэсьты’’, сава ӈэсьты’’.

Корр: Сян хибяри’’ пилибт’ ӈэсынанда илена’’?

- Пилибт’ тюкохана илена’’ ӈока’’ ни’’ӈа’’, юр’’ – юр’’ няхар’’ ю’’ хибяри’’ ӈэдан’ хабе’’. Падар’’мана маниесь ( пропискавна)  сидя юр’’ мян хибяри’’ ӈэдакы’’. Пилибт’ тюкохона илена’’ ӈокаювдо’ маля пенсияхана мэна’’. Манзарана’’ хибярина’’ ӈока’’ ни’’ӈа’’. Лавкахана манзара’’, школа –садхана сян’ хибярива’’ манзара’’, тикахад’ почтахана, лекарь’ мякана, клубхана манзара’’, тикахад’ мэсь’’, ӈани’ манзая’’ яӈгу’’. Тыбэртя’’ хибярина таня’’, пыдо’ манзарана’’, ӈокаювдо’ «Индига» СПК самлязимдей ӈэсыхы’ тыбэртя’’. Пенсияхана мэна’’ тэхэ’’на’’ манзаравы’’ хибярина ӈэсынана иле’’, ханяӈэхэна пыдо’ хоян’ ядэрцеты’’, кораль’ мальӈгана нядагосьты’’. Тюку по’ хойхана манзарана’’ хибярина’’ е’’эмня  ты’ ялям’ Явтысый Андрей Петрович хамандась. Пыда нида’’ хойхана ма’’лась, маня’’ тарана’’ аппаратурам’ ми’’ӈаваць. Тикы е’’эмняна саць ӈарка яля’, тыбэртя’’ хибярина нисьтына’’ юрбю’’. Ныланава ялу’’ хойхана манзарана’’ хибярина’’ е’’эмня сертабасьтыва’’. Сянакови’’ хамадабсетыва’’, конкурс’’ сертабасьтыва’’, концерт’ танесеты’’. Ӈэсына’’ ялям’ хусувэй по’ мэцьтыва’’, неняӈг’’ ирийхана ма’’ласьтына’’. Хибярина’’ харвась’ турцеты’’. Ӈацекы’’ тоходанвась’ хан’’ӈа’’. Ӈэсынана сававна илева’’, е’’эмняна маня’’ ӈэсыдана’’ саварка я’ яӈгодарха’.