Вы здесь

Ӈарка падтаӈгода ненэць’

Хаювы манзаида’ ӈока’’

Харта’ ямда’ мэневы, харта’ илевамда’ нерня тидхалембавы хасава, падтаӈгода ненэць’ Николай Апицын Индига’ ӈэсыхына илесь’. Тиман’ выӈгана мюсермы’ ненэця’ ню. Несяда, небяда илеванди’ ямбан хойхана илеӈахась, таняна хасава нюкцяди’ соясь.

Николай мякана вадюданась, нюдякоданда хой’ илм’ мэнел’’ӈадась. Евакоӈэ’ нивы ӈэбнанда’ хаю’’, харвабнанда хойхана илеӈгусь, сава тэхэ’’на мэнаӈэ’ тараӈгусь. Валакада, ил’ тарця ӈэ’’нив’. Ханяӈэхэна’’ маня’’ нерня илевава нядана’’ нисьты’’ пере’’. Хибяри’ со’’ямахаданда илевада ханзер’’ сюрхалты, хибяхарт’ ехэрасьты. Тю’’уна таславы сер’. Тарем’ ӈод, Николай со’’яманда мальӈгана хибяхарт’ нивакы’ ман’’, сян по’’ ваерась хасава ӈацекы евакоӈэ’ хаюда. Нисяда, небяда мер’’ яӈгумахась. Евакоӈэ’ хаювы ӈацекым’ Няръяна март’ евако’’ ӈацекы’’ хардан’ тэврадось. Си’’ив потаӈэ’ хэсь тоходанвась’ Ненэцие’’ школа-интернатан’ тэвыць. Нюдякоця, еникэця ӈацекэӈэ’ вадюданась, ӈокавна ниня’’ лаханана. Нюдякоданда’ падтаӈговам’ харвабтадась. Ӈодь’ хасенась ёльцянда’ тось, пыда маля ӈамгэкоцяхавам’ падтаӈгу. Хой’ ил, нянэй мя’’, тэкоця’’ сямянд’ харвась манэ’’лабтабавыда, маймбась нянэй ненэця’ илм’ падаркана манэ’’лабтабидась. Пыда няюв’ тоходанвы’’ ӈацекы’’ ӈод няндо’ манзаи’’ маниесь, маймбасьты. Пыдо’ ӈод ихиньдо’ мято’ ха’’амась’ пэртакы, ӈокаювдо’ ӈобтарем’ хойхана вадюданвы’’ ӈэ’’ним’. Николай школахана тоходанванда ямбан падтавы манзаида ӈокаць. Тохолкодида’’ ӈока’’ пыда манзаида’’ хуркари’’ конкурсха’ ӈэдтабсетыдо’. Таняна ӈод’ маня’’ яхадана товы’’ манзаи’’ сямянд’ саваӈэ’ таславы’’ ӈэсьты’’.

Школамда ёльцесь Николай харта ӈэсыхында илелъяць, нерня тоходанвась’ нисвыць’ ӈэдала’’. Падтаӈгова серта’ сяхарт’ нидась’ хаембю. Илеванда ямбан падтавы'' манзаида маля ӈока’’. Индига’ ӈэсыхы’ школахана пыда манзаида таня’’, ӈэсындо’ культура’ мякана ӈарка панно ӈыдары’’. Тарця манзаямда падтаӈгода’ хасава Победа ӈарка ялян’ падвэдась. Сайнормы ненэцие’’ е’’эмня сертавы манзая’.

Николай Апицын пудана’’ пода Индигахана мэйдась, культура’ хардахана харвась манзарась.  Ӈэсынандо’ илена’’ хибярита ихиня’ сава хибяриӈэ’ хаи. Николай я’ ниня валакада няхар’’ ю’’ самляӈг по’’ илесь. Мер’’ яӈгумась, сейда неняӈг ирий’ сиднтетимдей яӈганя яляхана нулъяць. Пуданда ӈарка сарпя’ хаи’’, пыда падвы’’ манзаида пилибт’ илеӈгу’’. Хибяри’’ ихиня ӈод’ Николай Апицын пон’ тамна илеӈгу.