Сян яля’’ ваерась хэбидя ялям’ мэтава’’. Ты’’ саполана ирийна сиднтетимдей толыр’’ – я’сяр ниня’’ не’’ яляӈэ’ таславы. Тарця ялям’ ханярина илена’’, хуркари’’ тенз’ мэта хибяри’’ ӈатедо’. Тикы яляхана сейхад’ минда’’ вади’’ не’’ намдгу’’ – хада’’, небя’’, нябако’’, не’’ ню’’.

Маня’’ ӈод округханана илена’’ нехэ’ сямянд’ сава вади’’ мэ’’ӈава’’- товнда ӈарка ялямда сава ихиня ядабтара’’, тикы яляхана сававна нылэйда’’, ихинянда сомбой вади’’ намдада’’. Нюда’’, нюта ню’’ мяканда тоя’’.

Маня’’ яханана не’’ хуркари манзаяхана манзара’’, харто’ нюдо’вадамби’’. Ӈокаювдо’ сава вадам’ намдувнда. Хаювы си’’ивна пудана яляхана Краснойхана мэдамзь’, таняна илена’’хибяри’’ ненэцие’’ культура’ нямна хамандавы ялямдо’ мэ’’ӈаць. Культура’ харад’ хэвхана нянэй мя’ нусь, таняна сидя нехэ’ мядонди’ ядтабихись. Хусувэй товым’ сяйлабтабихись, евэйхана ӈавлабихись. Тамара Васильевна Зевакина хой’ илм’ теневана не. Мякана варёмда мэць манзарась. Пыда няюв’ лаханамась. Тамара Васильевна тарця вади’’ хэтась: – Мань’ мяд’ манзаям’ сававна теневав’. Ханзер’ ехэраӈгув’? Мякана соявэдм’, вадювэдм’. Небяв’, нисяв’ илеванди’ ямбан хойхана мюсерӈаханзь. Небяв’ Бобрикова Марина Прокопьевна, маля ӈарка не, илеванда ямбан хойхана мюсерӈась. Нисяв’ маля яӈгумбэй. Пыда илеванда ямбан ӈокавна манзарабэй, войнана мэсь. Невхэна «Россия» колхоз’ танясь Канинхана, таняна небяв, нисяв манзараӈаханзь. Пыди’ ю’’ ӈацекым’ вадаӈаханзь – хасава’’, не’’ӈацекы’’. Тедахова мал’’ маля ӈарка хибяри’’, харто’ мято’ терсавэй, харто’ манзаидо’ пэрӈа’’. Харто’ харданато’ мал’’ иле’’.

Мань’ харн’ тензув Бобриковась, хаюпа’ хэсь тарця тенз’ мэ’’ӈадм’. Красноян’ ханзер’ еримяманзь? Мань’ школам’ ёльце’’махадан’ Няръяна маркана ГПТУна тоходанамась, тикахад’ сими’ Красноян’ ӈэдараць манзаравась. Лавкахана манзарамась, тедахова маля пенсияхана мэм’. Ӈарка яля’ мальӈгана нядаӈгось’ тарабнанда, нядаӈгосьтыдм’. Тюку яля’ нянэй мякана хибяри’’ ядтабинись.