Ӈэрм’ няна илена’’ хибярина поӈгана хурка ям’ нён мэ’’, ханярина я’’авлада ненэциедо’ таня’’. Хибяри’’, хуний илевамдо’ худӈганзу’ нидо’ мэс’’. Хибяри’’ харто’ ямдо’ мэнесь, харто’ манзаяха’’нато’ мэбець илевамдо’ мэ’’ ӈадо’. Тарця ненэциена танева юн’ ханяри тэворцеты.
Нюдя’ пэвдэй ирийна пудана яляхана Я’мал няд’ вэвко юнм’ намдаваць. Ӈоб’ сава теневана’’ няна’’ яӈгумам’. Тикы нява’’ Елена Григорьевна Сусой. Ямалкана саць’ сахарамбада хибярись’. Ханярина илена’’ нянэй ненэця’’ ӈод пыда нюмда ӈока’’ намдурман’ хабедось. Нянэювна янда’’хана’’ илена’’, ӈацекы’’ нянэй вадан’ тохоламбада’’ тохолкода’’ теневадось. Ӈокаювдо’ ӈацекы’’ пыда’ падвы книгамнанда’’ тенад’ тохолабидо’.
Елена Григорьевна Сусой тохолкода, почетный гражданин Ямала, кандидат педагогических наук, заслуженный учитель РФ. Нерняна товнда по’ нябимдей ирий’ самлязимдей’ толыркана сиднтет ю’’ няхар’’ пода’ пангусь. Выӈгана мюсерта’’ ненэцие’’ мякана хад’’ ёльцяӈгана ёнар’’ хасуюёнар’’ няхар’’ ю’’ няхарамдэй похона соявысь. Нюдякоходанда я’’авлавысь, хусувэй ӈамгэм’ теневаван’ харванакось, ниня’’ теневанам’ манэць хонарковада пилибт’ танесеты. Хойхана, нянэй мякана вадёвы не ӈацекы хой’ илм’ сававна теневанась. Ненэцие’’ ил’ ханзом’ илевахад’ теневадась. Илеванда ямбан нянэй ненэця’’ ватовна илесь. Илеванда ямбан тоходанась. Нерде Новый Порт’ школам’ ёльцевысь, тикахад’ Саля’хард’ маркана педучилищехэна тоходанась. Тохолкода манзаям’ торомдась Елена Григорьевна Ленинград’ маркана’ Герцен’ нювм’ нюбета институтхана тамна нерня’ тоходанась. Ленинград’ маркана 1962 похона аспирантурам’ ма’’левысь. Илеванда ямбан манзаравы не. Ӈули’’ нерде санаторно-лесной школахана воспитательӈэ’ таравысь, тикахад’ ненэця’ вада тохолкодаӈэ’ манзаравысь. Теда Ямалкана манзарана’’ тохолкоди’’ тохолкода. Ханярина илена’’, теда тоходанна’’, ненэця’ вадам’ тохолабада’’ ӈацекы’’ Елена Сусой’ падвы учебник’’мана тоходана’’. Нянэй ненэця’ образование’ серт’ ӈока’’ ныхымда, теневанамда масьтесь. Хусувэва’’, хари’’ вадам’ пэртяӈэ’, тикым’ теневава’’.
Ёльце’ хынокад’ несь. Пыда сёмда ӈока’’ я’тер’’ хибяри’’ намдурӈадось, «Сёётэй Ямал» ансамбльхана хыно’’ӈась. Ненэцие’ сём’ харвабтанась, теневанась. Хуркари’’ ӈарка’’ ма’’лёва’’ мальӈгана мэбець’ хэтвы’’ вадита’’ поӈгана сём’ ханасеты. Нянэй ненэця’ культурам’ тю’’у пэртясь. Манзараванда ямбан ненэцие’’ сё’’, лаханако’’ ма’’лабись. Нюртей ненэця’ вадавна падвы книгада «Ненецкие сказки и загадки» 1962 похона тарпыць. Тикы’ пуд сертавэда маля тянё ни’’ӈа’’, поӈгнандо’ тарця книгида «Из глубины веков», «Леонид Лапцуй. Страницы жизни и творчества ». Паднана Леонид Лапцуй вэсакодсьа, пуданда’ хаювы’’ манзаида книгаӈэ’ сертабись. Л.В.Лапцуйм’ нювм’ нюбета музей-квартира Саляхардахана таня’’, тикы’ мядм’ таневан’ ӈока’’ ныхымда Елена Сусой масьтесь. Таня’’ турта’’ хибяри’’ пилибт’ ӈока’’ ӈэсьты’’, «Лапцуевской чтения» яля’’ мальӈгана ӈацекы’’ урокдо’ паднана музейкана мэцьты’’.
Елена Григорьевна мэёвна илевы’’ хибярись, хусувэй сертабада серканда ив’ ер сыртась. Хари’’ тенз’ хибярида нерня’ пэртясь, хари’’ ямда саць’ сахарамбадась, хари’’ вадамда, культурамда тю’’ури’ пэртясь.
Ӈарка’ пэвдэй ирий’ няхарамдэй’ толыркана Елена Григорьевна Сусойм’ Саляхардахана сюрӈадось. Ӈарка’ сарпям’ хаевы нява’ тенеӈгува’’!
