Толанзёва ӈарка сер’. Хари’’ вадавна толанзёдан’, вадамд’ теневаӈгун’, лаханагун’. Тюку яля’ «Есьтана поп вэсако» лаханако’ пуданам’ толара’’. Тикы лаханаком’ Ямал’ тер не Нейко Янгасова падвы.

Ядэрманда сер’ сундукам’ манэ’’ӈа. Маӈгабада вэсако’ нюдя ню тосалъй’’. Ихинянда ма: - Ханзеркав ӈэвандаха’ ӈэдараха’. Хунувндаха’ нибтим’ ӈа’’. Сундук’ мю’ лыӈгараб'’ савараха. Сундук’ мю’  хонаравы’’. Инзелебта сундукам’ миневонди’, тарем’ мамонди’: - Тюку сундуками тарси’’ саӈгово’’мы. Тедари’ ӈаворкани. Маси’’ сибимда. Поп вэсако сундукамда тад нэда, маӈгабада вэсако’ нюдя ню тикахана хонёвы. Сэвада няӈгарпа ма’’нив’: - Ӈавортава’’?

Пухуцяха’, вэсакохо’ няхати’ тэри сырӈаха’. Поп вэсако ма’’нив’: - Ет’ ӈаворкаво’’. Ханзер’’ ӈэӈгува’’, пэвсюмянё’’. Ӈаворӈа’’. Ӈаворць малесь ӈани’ ялъяд’’. Ӈамгэ’ пирка’’на немдо’ то. Нумда пилибт’’ пэвсюмя. Надо’ сюмб’’ ни’ та’ хонэйд’’. Ваӈг’ няна вэсако’ ню’ хан’’ман’ тарем’ таслади’: - Пуна пыда надо’ вар’ няна хонёи. Хонара’’махаданда надо’ӈыл’ тирцедеир.

Маӈгабада вэсако’ нюдя ню ваӈг’ няд ӈоб’ инзеле. Хонэйд’’. Няхаюда пон’ се’’нэрмонди’. Тахав’ хонарэйха’. Няхаюта’ понд юсибтэй’’. Пухуця надо’ ня’ еремя. Поп вэсако нянда ма: - Няр тяха’ тирцидед! Пухуця’’я’ тёррида хая. Юрк’’махаданди’ няди’ яӈговы. Сидяриӈэ хаихи’. Поп вэсако вэсако’ нюн’ ма: - Пухуцями  ӈамгэ хадар?   Ӈамгэ надо’ ӈыл’ тирцидер? Вэсако’ ню масьнё’’: - Харт манзянё’’, няр тирцидед! Тад’   ӈо’ ӈэсь ӈо’ няхани вэва вадам’ мэ’’мандани’ нинизянё’’ӈа’’.

Поп вэсако ӈопойриӈэ хаи. Маӈгабада вэсако’ мяканда хая. Ся’’ны ӈэбта ӈод’’ сидя солдат параӈода’ няд товэхэ’. Пыди’ тарем маӈаха’: - Маӈгабада вэсако’ нюдя ню параӈода сит хаӈа. Ет’ вэва ӈэ’’нив’. Параӈодахандо’ няхарӈэ хая’’. Танянандо’ тэвыд’’. Сер’’ тарця’’ ӈэвы’’: есьтана поп вэсако, параӈодан’ падарм’ падвы. Тарем’ падвэда: - Маӈгабада вэсако’ нюдя ню нюми, пухуцями хада. Судевы ӈэя! Параӈодада падарм тарем’ толада. Вэсако’ ню тарем ма: - Сер’ тарця’’ ни’’ӈа’’. Поп вэсако харта вэвась. Нюданда пэртяда харта си’’ми хадаба пясь. Тикахад пухуцянда ня’ харти’ си’’ми хадаванзь таслаӈаханзь. Хонаравани сер’ надо’ ӈыл’ си’’ми тирцидеван’ харваӈаханзь.

Параӈодаӈэ теда’ савовна инзеле’’: - Мань нумгад ядэртадм’. Ӈари’’ теда маӈгабада вэсако’ нюдя нюм’ нумд’ ханавась. Пыда теда’ хэвэхэми ти. Ӈабцата поп вэсако вэвавна иленя. Ӈока ненэцям’ нельтесь. Нюданда вадетада хунорта, ӈани я’ луца. Параӈода тад нянда сырӈа, ӈоб’’ ю’ маӈгабада вэсако’ ню’ ня’ сидибты нити’ то’’олахаха’. Тарцям’ намдахава, манэкава параӈода тарем’ ма: - Ненэся вадар ӈэвы.

Поп вэсако манм’ ни соя’’. Параӈода сидя солдатаханда манзь ханада: - поп вэсаком’ тяха ханари’, нён си’ сидя хэван’ тебарӈари’. Тикахавад та’ пя’’аларади’. Нум’ яханда хая. Параӈода маӈгабада вэсако’ ӈарка нюм’, няби ёнэй нюмда марцяхэданда мэӈахаюда. Вэсако’ нюдя ню поп вэсако’ илебцом’ мэ’’ла’.Попӈэ хая. Та’ илелъяд’’. Маӈгабада вэсако илебям’ пэртяӈэ хая.

Та’ малда.