Округханана хусувэй по’ ненэцие’ паднава сер’ нямна таславы ялуна танесеты’’. Тюку по’ тарця ялуна’’ нюдя’ пэвдэй ирийна маттамдэй’ яӈганя’ толыркад’ миӈа’’. Ненэцие’ паднава сер’ нямна ӈарка лаханавава’’ мэта’’ ирийна сиднтетимдей’яӈганя толыркана маркана ваераӈгу’’.

Тарця серм’ хамадабвахана манзарана’’ тянё ни’’ӈа’’. Тюку по’ округна ӈэсы’’на’’, ханяна нянэй ненэця’’ иле’’, ненэця’ вада нямна хамандавы’’ мероприятия’’ миӈа’’. Школахана, садикхана хуркари’’ конкурс’’, викторина’’ миӈа’’; классной’ сясхана ненэця’ культура’, вада’ нямна лахана’’. Ӈацекы’’ харто’ вадамдо’ ханярина намдурӈадо’. Хусувэй хамадавы серкана харто’ лаханаӈгу’’.

Няръяна маркы’ ненэцие’ школа-интернат Антон Петрович Пырерко’ нювм’ мэ’’ӈа. Тикы’ школахана тоходанна’’, таняна манзарана’’ те’ няна ихиня’ сомбой ма’’лёвам’ хамадаць. Юнета ненэць’ нямна ӈацекы’’ лаханаць. Хурка хибяри Антон Пырерко ӈэвысь, ханяна соявысь, ханяна вадюданавысь, тоходанавысь ӈарка’’ учёной, тохолкода илм’ сценахана манэ’’лабтадось.

Мэта’’ си’’ивна самлязимдей яляхана этно-культурный центр’ мякана ӈацекы’’ е’’эмня «Вадава’’ лэтрахава’’!» конкурс’ ваераӈгу. Толаӈгова’ мякана манзарана’’ ӈацекына вадакохо’ инзелевась самлязимдей’ яӈганя яляхана ӈатейдо’, «Ӈани’ торова вадако!» мероприятием’ хамадаби’’. Толаӈго’ мя’ Ӈэрм’ ненэцие отделкана манзарана’’ нина’’ тохолкода, ненэця’ вада учебник’ падбада не Елена Михайловна Талеева ед’ выставкам’ хамадаць. Тикы не’ Нюдя яхана сиднтет ю’’ по’’ тяхана соясь, Ямалкана илеванда’ ямбан манзарась, теда ӈод таняна иле. Округна тохолкода’’ сававна теневана не. Мэбе’’манда мальӈгана

ӈока’’ тохолкодина’’ семинар’’кана’’ манзарасьты’’. Пыда е’’эмнянда хамандавы ма’’лёва ӈани’ танеӈгу’’.

Округна ӈэсына’’ ӈод’ тюку по’ ненэцие’ паднава сер’ нямна мероприятия’’ ваераӈгу’’. Тарем’, Саляхана илена’’ хибяри’’ паднана’ нява Прокопий Явтысый тензебтеӈгу’’, ненэця’ вада нямна сертавы манзаида ваде’’та’’. Красной’ ӈэсы’ школахана ненэця’ вада нямна вади’’ мэта’’, «Ёхобэй вада’’» ма’’лёва ваерагу. Тикы’ ӈэсы культура’ мякана ӈармбэй ненэця’’ ма’’лёва танеӈгу, «Невхы вада’’ ӈокам’ хэтаӈгу’’» тарця мэкад’, тарана ма’’лёвам’ нина’’ хамадаби’’.