Ся’’ня ӈэбта ӈод’’, я’ сяр’ ниня ӈопой вэсако илевы. Пыда няхар’’ нюдя ӈэвы. Илевандо’ ямбан’ ханедам’ пэрӈа’’, халям’ хадаби’’. Хуркари’’ – хараси’’ тарем’ иле’’. Вэсакохоют нюди’ ӈарма’’. Вада’ саир’’ малда ямбава. Ӈобаӈгуна вэсакор пухуцяханда манзь ханада: – Пухуця’, теда’ нюни’ ӈарка’’нё’’. Ӈарво’’махадандо’ хусувэдо’ харта сехэрым’ илаӈгана нив’ мэт’’. Тикы’ е’’эмня, мань тюку’ яля’ нюху’’ни ӈопой хобцоком’ хэтаӈгудм’ ханяӈэндо’ инда ӈу’’ таняри.

Вэсакор тарця вадита пуд нюта няна хая. Няхар’’ хасава нюда ӈобкана мэвы’’. Хусувэдо’ харта инда сер’ манзаравы. Ӈаркадо’ мирӈа, нюдядо’ есьта, ёнэйдо’ ядэрӈа. Вэсакор нюхута сырӈа. Нюда мал’ манзара’’, хусувэдо’ харта ӈамгэмда сертаби. Ида ядэлы’’. Пон’ нись мы’’ нюхута тёрей’’: – Хасава нюӈэ, таляӈгахарӈада’’! Няхар’’ хасава нюда харто’ помнандо’ няхато’ сылыд’’. Нисяхандо’ ялъяд’’. Хусувэндо’ яда ядэрӈа. Ӈобт’ ӈамдыд’’. Вэсако сябярте’’мя ӈудахата ма’’ла. Ӈаво’’ пирка’’на пэвдёком’ хо, нюхута вахалъй’’: – Хасава нюӈэ, пыдара’’ няхала’’, ӈопой вадами нянда таня. Ханяӈэра’’ мань хобцакоми хорида. Теканда’’ инда ӈу’’ танява. Тикы вадита пуд пэвдёком’ харахананда сян ян’ лядӈада. Нюхута ма’’нив’: – Пэвдёком’ лядӈаванё’’, сырӈада’’ма. Теда’ пыдара’’ мардэйда’’. Ӈопой нёда’’ паромбю’’. Неры мэ’’мы вадини нёда’’ юр’’. Ӈарка нюда пя’ таесм’ ня’’мада ермнянда маляда. Тикы’ пуд ерь хасава нюда няханда сыраць ӈани’ маляда. Ёнэй хасава нюдя пя таесм’ пон’ ня’’амбида, ида ядэртакы, нисянда вади сабе сававна тас’’ла я’’мыда. Ня’’амбавы пямда ӈани’ ермнанда маляда.

Вэсако хасава нюта сяк’’ сылы’’. Пон’ нись мы’’ манзь ханада: – Тедари’ пыдара’’ илам’ сабе сававна манэ’’мадавэра’’. Хобцокони хара сабе ӈаркахав нись ӈа’’. Мадамзянё’’, иӈу’’ тара. Пэвдё’ таесм’ мал’ мардара’’нё’’. Теда’ тюку пэвдём’ неренда’ тотрев’ маляда’’. Таминда пэвдём’ ӈарка нюхунда ми’’ӈада. Ӈарка хасава нюда ня’’мада, маля я’’мада. Таддикахад нюдя нюхунда ми’’ӈада. Няби ӈод’’ пэвдём’ сян малиба пясетыда ӈоб’ я’’мада. Нюдя нюхунда ми’’ӈада. Ёнэй хасава нюдя сян’ малибабта ӈод’’ ӈобтарем’ выдара. Вэсакор пэвдём’ нюхутата ханада. Идя ядэрӈа, манзь ханада: – Илаӈгана ня’ танява сава ханя ӈа’’. Ӈадьбято’ ӈарка’’ ненэця’’ манзеты’’: – Ляда’’мы пэвдё мардамбаб’’ нензел’’. Наӈэдя пэвдём’ маля я’’маӈгур. Нер’ мадамзяне’’, иӈу’’ тара. Хобцокор ма’’нив’,тикар ила’ табеко. Сянари няр ӈэбата ӈод’’, нид нёд юрыбю’’. Сэхэ’ яляхана нид сит нядаӈгу. Ӈопориӈэ ӈамгэхэрт серм’ Нин сертаӈгу’’. Ӈокахаваӈэ мэбет’’ нидам’. Ӈопой иӈу – иӈу вуни ӈа’’. Ӈока иӈудм’ мэць ханяӈэхэна нямдо’ пуняку’ таб’’лаӈгу’’. Вэсэймы ненэця’ иӈут инзеле серо’’ӈа.

Пыдара’’ ӈод ӈобанзер’ илебта’’ вадара’’ минта. Пэртя манзаяра сяхаринда минаць минда. Хибяхарт нянда’’ вадам’ ни мэт’’, ни лаханаӈгу’’. Вадмбой’’ илебата’’ харта’’ помнанда’’ поёмбаба’’нанда’’ пя’ таес’ тотрев’ хибяри’’ сидада’’ мардаӈгу’’. Текада илаӈгана ӈули’’ та’ ед’ ни ӈа’’. Харта’’ таслахарӈара’’. Мань табекоми сабе вэва ни ӈа’’. Мале илаӈгана манэ’’мэми. Ирината’’ табеко тамна тяха’ тенебата’’ сава.

Та’ малда.