Маня’’ нина’’ хуркари’’ манзаяхана манзара’’. Ервуна поӈгана ӈод’ ненэця’’ нина’’ таня’’. Тюку’ ирийхад’ округханана Уполномоченный по правам человека манзаям’ нерня пэртяӈэ’ Александр Егорович Белугин манзараӈгу.

Тикы нерцю сян по’’ ямбан округна Собрание’ депутатов депутатӈэ’ ӈэвамда манзаяӈэ’ мэ’’ӈадась. Пудана тэраӈгова мальӈгана пыда ӈани’ округна депутататӈэ’ хаясь, валакада тюкумэвахана недбям’ тарця манзаям’ пэрманда е’’эмня ни’’ нямарпю. Нява сян’’ ирий ямбан недбям’ нись’ нямарпю манзаямда пэрӈадась. .

Теда депутатӈэ’ тараванда поӈгана тамна несэй манзаям’ пэрманда. Округханана илена’’ хибяри’’ хуркари’’ серкана нядабаӈгу’’.

Хибя’’ тамна ехэра, Александр Егорович Белугин маня’’ округханана соявы ненэць’, Индига ӈэсы’ тер. Тикы ӈэсыхына школам’ ёльцевы, школам’ ёльце’’махад нерня тоходанвамда Санкт-Петербург маркана мэ’’ӈадась. Ӈарка маркана Полярной академиям’ ёльце’’махаданда Няръяна март’ тось, тикы похот’ округна еркы маркана пилибт’ иле, манзара. Тамна Александр Белугин общественной манзаяхад’ нисьты’ хадю’’. Маля сян’’ по’’ ямбан «Ясавэй» нюбета организацияна нерм’ пэртяӈэ’ таранава’’. Тарця манзаямда минреван’ ӈод ив’ ер сырӈа. Ӈэрм’ тенз’ ненэцие’’ нядабава е’’эмня ӈадимдевы’’ организацияна манзаяда тянё ни’’ӈа’’. Тарця организация’ яханана маля сидя ю’’ самляӈг по’’ ямбан манзара.