Пихина вэва нум’ выварӈа. Сата мерця сюдарць мя’’на’’ хэвувна сюра посарӈа, еяна’’ ӈадпи’’.

Нюдякоӈэ ив таӈга

Лате’’э мякэйнанов’’,

Сядэй сюдбабцамэй

Ӈари’’ ханабатов.

Сейковэй, сейхавав

Ӈод’’ нянаӈэй’’ мэю.

Тарця вадахана сёнзяков хыно’’ӈов, ихинан мань ӈани’, хад пухуцякоход пинвав тарця сёхона ӈаха’’, хэвня ӈэдарамбив.

Хад сюдармахана мя’’на’’ ӈу’’ харто’ хынабцямдо’ мэ’’ӈа’’, теневана музыкантна’’ ӈуда’’ сибицювна рояль’ клавиш’’мана хад пухуця’ ӈарка хынабцам’ сянакутнарха. Мяканана’’ иба, ихинана’’ ӈо’’ нянов’’ ӈули’’ сава. Еся тодабцова’’ ӈарка тухуна паны, пякуцида сававна лэйна’’, ӈарка едва’’ ӈамза’ ӈабтакосавэй’’ пина, сяйникна’’ ӈод’’ сюдарць хыно’’ӈов’’. Мань пинвав ӈули’’ яӈгу, мякан’ енадм’. Хуркари’’ нумгад сидна’’ ӈэдаӈгу. –Нуӈгов, пили’’ тарем’ ӈахат ӈась, – вэсакорка’’ ирин сюдбабцан’ инзеле’’, ма’’. Ӈоликари’’ макудан’ ӈэвана’’ илсетына’’, луца’ вадавна масьтыва’’: – Господи, благослави. Тикы ӈани’ луца вада. Ехэрана вадам’ школан’ хэ’’мяхадан тохолаӈгув. Мя’’на’’ ӈацекы’’ каникулха’ тобто’ луца вадавна мал лахана’’. Ёнеко тидекав Малнана ӈэ нюмдембив, саць сававна тикы вадахана лахана. – Хад пухуцява’’ няна’’ сацей нены ню’’. Няна’’ пон невамда парпи! – меретава’’ма. Мунзи’’лабт Ульяна хакэва’’ тяха’ ханада: – Харвабта мяканана’’ ида вэва нява’’ танядакы, харвабта хибякохова няханда нендакы? Маня’’, ӈацекэ’’ӈэ, сэв’’ ялкадарць, няха’’на сырць ӈобкана манзь ханава’’: – Яӈгов! Яӈгов! – тарцяна’’ мякнана’’ яӈгу’’. Ванерабтё ӈарка нина’’ мунзи’’ вадава’’ няда, вэтла’’. Хадакэна’’ ихина вадава’’ сейханда сававна тебы’’: – Хад пухуцяр сидна’’ нёя хонарку’’! Вы’ ява’’ нерняри’ нубта, тына’’ седа’’мана хадырма таняб’’, нядэйкодо’ сэр’’ тоӈгана лехэбтёва’ ӈэсонд’, тарем’ ӈобнзер’’ тяха’ илеӈгува’’. Янамбовна вадамда ӈани’ сермана ханада. – Тюсам’ тю’’уку илаб’’ сава ӈэдараха? Мерцямда несэйвана нэкалтархада, хувыкохона хадкова’’ хасерты’’. – Нянов’’! Нянов’’! Сёнзякодов Хад пухуцяконов’’ нянов’’ вэбтый, мэю. Си’’ив яля, си’’ив пи’ ямбан юндарма ваданда малм’ ӈатевы. – Теда’ ӈацекэку’’, теневада ненвам’, вэва им’ мэць ни’ тара’’, валакада нясъюмба, нина’’ сахарамба ныхытава’’, мэюва’’ ӈэӈгува’’, – ибета хадакэва’’ ма.

Пухуця Хад хасертаны’’, ея’’ мале ни’ ӈадпю’’, вэнеко’’ мад’’ хахая со’’, тикы сава нумам’ пэрӈа’’. Мякна’’ мэнаха’’ тэ’’на мэна товам’ хонра’’.