Сайнорама по’’ мальӈгана ӈацекы’’ ӈэвы’’ хибярина хусувэй ӈэсына иле’’. Саляхана тянё ни’’ӈа’’. Тарця хибяри’’ Роза Ивановна Канюкова саю’’ по’’ нямна хонрамбидась, пыдо’ хэтвы’’ вадидо’ газетахана тэврэйдась. Тюку яля’ Клара Петровна Талеева’ лахарё’ толара’’.
– Тетъю’’ нябимдей тетъю’’ няхарамдэй поход илебцув сававна тенев. Тенев, небянана’’ хантанӈгу’’, ту сибям’ мэӈгу’’, ма’’лаӈгу’’, сяйникм’ масьтеӈгу’’. Ӈацекэӈэсь сяймазь ӈамдба’’на сяйкова’’ мале ханзебей ӈэсьты. Няньком’ та’’вагува’’. Ханяӈэхэна нянькова’’ ханюй ӈэӈгу. Тум’ яебтамба няна’’ нисьты’’ тамбю’’. Тум’ лэямдамба ватова’’ тамна яӈгусь. Хурка по ӈэвамда нив тене’, Микола ирикэв ӈэдалё тось, ма’’нисяв: «Си’ нэмам’, си нэпдадув хосеям’» (Та’ мальӈгана синяна мяд панм’ илбасеты’’, нэмбсеты’’). Анна хадав ӈэдаравангабядась. Манзарана’’ не’’ ӈацекыдо’ ханзеркава мякнандо’ хаебабто’ ни’’им тара’’. Талра’’так, хибяхавана хаеба нив тара’. Хадахан тэвыв’. Володяв сайнорма’ по’’ ямбаха’’ хан’ тёндеркана хэвханан ӈамдысь. Сянакосетыва’’, едейкосетыва’’. Колоколковской школахад каникулка’’ тосьты’’, тикэхэвана ӈарка’’ ӈацекы’’ сидна’’ сянакултабсеты’’. Ӈамдтаӈгу’’. Малемкосьтыва’’. Нюдякоӈэ тамна ха’’лина’’ тарем’ сянако я’’маваць. «Ханавэйхана» сянакоб’’нана’’ сидна’’ нёракуцеты’’. «Хабэвко» сянако ӈэбта, хабэвко ханийкуда лэтбаӈгу. Ӈацекы’’ хэ’’мяд тецьхамясь. Ти ирикэв си’’ми хадан мят’ ёртяха’’на ханась. Сидя сыра’ таняна илемась. Няби ирив ӈацекыда школахана мэвахана Хонувейхана мэ. Ирин ханесэйда ӈокаць, халяда ӈокась. Карточкыда таняць. Пыда сахарта ӈо’ танесь. Мань маниеба’’н, нохода ёльце ӈока ӈэсьтэй. Хадан ня’ яля’ ямбан’ хобдо’ хабарпасетыни’. Хадав масьты: «Мяд няби няю’ нэкалпад. Сатакувна вэӈгаладэй.» Вада’’нанда нядаӈгумась. Нохоко’’ туса’’ пиндяха’ ханимда’’, ти мань сянакун-тэкоцин хамады’’. Пета някав танесь, сэвда вэваць, нись тоходан’. Сянакодув сертаба ме’’лаць. Тюр, ханако, наӈэдя мюдм’ сертасеты. Мяд мюня нюдякоця’’на сянакосьтыва’’, пихиня ӈаркамбойха’’на. Юхунав танесетыда. Ӈухуку масьтеӈгумда. Ӈухукодув Ока сэдбись ӈанихи’’на хар’’н ӈамдсетыв’. Ханакун мэёць. Мядикун танесетыта, ӈопориӈэ сянакосьтым’. Няби мякана хасава’’ ӈацекэриць. Небянодо’ нядаӈгодаӈэ ханасетыдо’. Волочагам’ нюхулембасеты’’. Не ӈацекэӈэсь ӈопоридм, «си’’немям’ нэбим’». Сэдора хадав тохолась. Мынакохот сэдорамась, тохоця яӈгодархась. Ӈамгэв ёльце сэдбасетым’. Сёбям’ сэда пон’’ вуни ӈа’. Сидябёй хэвкэцям’ сэдӈгув, сёбя. ӈэкцядамда паркӈгумда, сэдалтам’. Паныкоцям’, мальцяком’ парксетым’, сэдсетым’. Тэкоця’ пусхад ебцм’ сертасетым’. Сёярта пякоця ӈэсьты. Пахана неро яӈгусь, яӈгутейхана илеваць. Валакада мань сэдвын пуд ёльце писянзеты’’. Хамада я’’мавась, ихинян масьтым’: «Мань сэдъин хамзэйдо’.» Вадидо’ Нин хамадамбю’, хадав ирин ня’ ӈысма вадавна лахана пясьтыди’. Хунвейхана харад’’ таняць. Таняд няӈэна’’ наваӈгам’ хосеясьты’’. Наваӈгарэй, маниеб’’нан ӈарка мя’’алха парумдэӈэ ӈадьсеты. Хамбала яӈгусь, Нерута’ няӈэна ӈэвангабясь. Маня’’ наваӈгарись. Тосьты’’, наваӈгам’ хурасетыдо’, няпойӈэ Табседен’ ханасетыдо’. Маньхаван небярин товам’ ӈатесетым’.
