Округханана тыбэртя’’ ненэциена ханяримна мюсерӈа’’, хусувэй выӈгана ненэця’’ тыдо’ сахарамбась иле’’. Харто’ тыдо’ пэртина таня’’, кооператив’ ты’’ пэртя’’ манзаидо’ минре’’, Нюдя яхана нина’’ теда тыдо’ семейно-родовой общинахана пэръядо’.

Канин’ выӈгана ӈод’ ненэця’’ пилибт’ ты’’пэрӈа’’. Тарця паской явна мюсерта’’ хибярина теда ӈод’ мяд’ терсавэй хой’ илм’ минре’’. Тыдо’ пэрӈа’’, нюкцидо’ нисянато’, небянато’ хэвхана вадюдана, харто’ вадамдо’ мэ’’ӈа’’. «Канин» нюбета ненэцие’’ община ёнар’’ хасуюёнар’’ хасуюр’’ няхарамдэй похона ӈадимясь. Тамальӈгана тыбэртя’’ колхозхад’ тарпыдаць, несэювна ты’’пэрма серм’ миресь пядось. Сидя ю’’ нюртей по’’ ямбан «Канинхана» ненэця’’ тыдо’ пэрць иле’’, вымна мюсерӈа’’. Таӈок по’’ ямбан хуркари’’ сер’’ таняць. Ханяӈэхэна саварка ӈэвакы, ханяӈэхэна саць тоенана сер’’ ӈадибермакы. Тарем’ ӈод нина’’ тенад’ манзара’’, невхы похот’ танеда манзаямдо’ пэрӈадо’. Небой по’ «Канинхана» несэй серм’ пэртядамдо’ тэраць. Тэхэна’’ мэна’’ хибяри’’ тэравы няхандо’ пунры’’, ена’’ тад’ нерня хойхана мюсерма серудо’ тю’’у минда’’. Иван Поликарпович Латышев хойхана мюсерта ненэцие’’ мякана соявы, тыбэртяӈэ’ манзара. Серм’ теневана хибяри. Иван Латышев ӈуда’ ӈылӈэ’ теда тарана Владимир Ардеев. Пыда Канинхана вадювы хасава. Паӈгуда тыбэртяхат’ пере’’. Нисяда илеванда ямбан тэхэна’’ мэнаӈэ’ тара, ты’’пэрма серкана тет ю’’ няхар’’ по’’ ямбан манзарась. Небяда ӈока по’’ ямбан хойхана мюсерӈась, мядм’ манзаям’ пэртяӈэ’ манзарась. Тедахова ӈарка хибяриӈэ’ хэсь пыди’ хардахана илеӈаха’. Теда выӈгана нисянди’, небянди’ манзаи’’ нерня минренаӈэ’ нюди’’ тараӈаха’. Володяди’ ӈарка манзаям’ пэрӈа’’, тыбэртя’’ нида’’ нядамби’’. Теда СХПК « НО «Канинхана» хойхана пилибт’ юр’’ сидя юкад вата хибяри’’ иле’’. Хасава’’ тыдо’ пэрӈа’’, не’’ мядм’ манзаям’ минре’’. Хасавидо’ хусувэй серкана нядамбидо’, нюкцидо’ вадамби’’. Мяд’ е’’эйӈэ’ таняна мюсерта’’ хибярина палатки’’ мэ’’ӈа’’. Та’ ёльцяӈгана хибяридо’ ӈадя’’ ӈакамзеты’’. Тоходанва по’ ямбан хардахана илевы’’ ӈацекы’’ каникулдо’ мэ’’манзь хоян’ паромбасьты’’. Нисянато’, небянато’ хэвхана сян ирий’’ ямбан варёмдо’ мэць илеӈгу’’, нядаӈгода’’.

Ненэця’’ тыдо’ синдтет бригадахана пэръядо’, тыто’ толыр’’ мат’’ яӈганя ёнар’’ мян’. Хусувэй бригадахана нерм’ пэртидо’ таня, мядм’ манзаям’ пэртидо’. Хойхана илена’’ хибярина илевамдо’ харто’ тидхалембидо’. Нерняна товнда ирийхана ӈарка ялямдо’ мэта’’.