Округханана хусувэй ӈэсыхына ӈарка хибярина’’ иле’’. Мал’’ пыдо’ хари’’ яхананда соясь, илевандо’ ямбан манзараць. Теда, варёмдо’ мэць илевамдо’ минредо’. Тарця хибяри’’ Индига ӈэсыхына тянё ни’’ӈа. Ӈопойдо’ Зоя Алексеевна Двойникова. Тиман яхана соябэй, нюдяко ӈэванда мальӈгана ӈока небянда, нисянда няюв’ вымна мюсерӈась.
Индиган’ тэворман’ мальӈгана ӈармбэй хибяри’’ няюв’ лаханакурӈамась. Зоя Александровна тюку по’ март’ ирий нюртей яляхана сиднтет ю’’ ӈопой пода’ панысь. Маля ӈарка хибяри, тарем’ ӈод пэдова’’. Харданда хэвхана хусувэй танеда манзаямда харта’ пэрӈада, илан’ маймбась иле. Индигахана маля ӈахэт’ иле. Нян’ тарця вади’’ мэ’’ӈась: - Ӈахэт’ тюкона илем’. Теда юрав’ маля ӈамгэ похона деревнян’ товэва’’ ӈэбна’’. Хойхана илеваць. Нисяв Алексей Николаевич Двойников, небяв Анна Александровна тюкона маля яӈгумась. Нисява тэна’’ манзарась. Няюн’ Зинаида Алексеевна, Демьян Алексеевич. Няхармаць, теда маля ӈахы’’ яӈгумбэй. Ӈань тюкона илець, тюку’ хардана пеляна илець. Тикахад’ хасава няв’ пухуцянда ня Няръяна март’ мадараць, таняна харад’ тэмдаӈась. Таняна илеӈахась, таняна яӈгумась. Не нюди’ Елена Демьяновна маркана иле.
Мань’ нюдякодан’ хануйкомась, школана ӈопой по’ тоходанамась, тикахад’ тарем хаимась. Тикахад’ нимась’ тоходан’. Нябяв’, нисяв’ тюконя илеӈахась; мань ӈод’ хэвхананди’ илемась. Совхозхана, мехпошивхана сэдорамась. Манзая’’ пилибт’ танесеты’’. Ханя’’ ханда, таня хантан’. Тамальӈгана хибяри’’ тянё’’ ӈэсам’, ӈамгэсам’? Ханярина манзараваць. Теда ти’, ӈацекы’’ хибяри’’ манараван’ ни’’харва’’. Тамальӈгана манзая’’ ӈока’’, хибяри’’ нидаць’ тэвор’’. Клепиков председательӈэ’ манзарась, ӈобмэва сюв’ конторан’ хаӈась, ман’ нив’: - Сенокосан’ нин’ хант? Ӈув’ хосегодахана нядагось тара. Таня хаям’. Таня’ тось, юнрам’: ханзер’’ хосенгось тарада, манэ’’лабтара. Пыда ма’’нив, тухуданэй, манзара. Тарем’ харн’ тухумась. Сидя ирий сенокосхана мэмась. Тикы’ пуд ӈань’ сэдорась’ мастерскойхана пявась, харн’ пэрмы манзаян’ тэвыв’. Тикахад’ ӈэсынана клуб’ сертабиць, таняна ӈобтарем’ нядагось тарась. Таб’ тэвобась’ тарась, ямы’’ сабкабиваць сивахана. Ныхыр’’ таняя, нёя мал’’ пэрӈаваць. Манзараваць. Нисьтыва’’ ман’’: ним’ хант’, тарця манзаям’ пэрць ехэрам’. Тара, хантан’, сертагур’. Хуркари’’ манзаям’ тохоласьтыва’’. Марья Рубцова,Тоня Коскова тикена манзараць, мал’’ клубва’ сертабвахана нядагуваць.
Мехпошивхана манзаранаӈэ’ ӈокаваць, сидя ю’’ хибярись. Надурцетыва’’, сэдорасьтыва’’. Ей’’ тагутак, ей’’ ӈань’ сэдорпасьтыва’’. Ненэця’’ мякандо’ хэбнандо’, иба’ ӈэбнанда. Хойхана мюсертина мякана иле’’ ним’. Нока еям’ сэдаваць, сулурӈаваць. Еям’ сэдась сяӈок ныхы’’ тара’’. Еям’ сэдбавахана ӈока хобам’ нацьтыва’’, тикахад’ сэдбагур’. Сыра надурцетыва’’, та’ ний хэван’ хамандёбнандо’. По’ яляхана сэдорагун’. Тарем манзараваць, тарем и пенсиян’ тарпынаць. Манзая’’ пилибт’ танясь. Хуркахарт’ манзаяхад’ нисьтыва’’ хаюр’’. Хурка манзаям’ нянд’ тата’’, тарцям’ тохолагун’, сертабагур’.
Теда харданат’ тодагун, ӈамгэгунда яляр’ ваераӈгу тарем. Яля’’ мер’ хаюрӈа’’, по’’ ваераныд’. Тарем илева. Нин’’ няюв’ пилибт’ харна’’ вадавнана лаханасьтыва’’. Нацекы’’ пили луца вадаривна лаханасьты. Хари’’ вадам’ юрбая’’ вани’’ӈа’’. Невхы вадава, хари’’ вадава, иринана, нисянана вада. Сян’ вадам’ теневась ӈани саванё. Хари вадако пили’ тара’’, юрбая ни’’ӈа’’. Манзьван’ хыноць ехэрадм’. Невхэна хойхана мэбнана ӈарка хибярина хыноцеты’’, вадако’’ вадецеты’’. Маня’’ инзелеӈгува’’.
