Илевахана тоходанава ӈарка сер. Хусувэй хибярир’ си’’ив пода панась школан’ тэворӈа, тикахад’ сян по’’ ямбан таняна тоходанасьты. Маня’’ яханана хусувэй ӈэсыхына, округна еркы маркана школаха’’на ӈацекына манзаямдо’ теневана’’ тохолкода’’ тохолабидо’.
Няръяна маркана Антон Пырерко нювм’ нюбета школава таня, тикы ненэцие’ школа-интернат. Тюку по’ тикы школава юбилееямда мэта. Сян’ ю’’ по’’ тяхана тикы мят’ хойхана мюсерта’’ ненэця’’ ӈацекы’’ тоходанвась’ тэврабиць. Хой’ ӈацекы’’ нисянадо’,небянадо’ нянэй илӈгана варёмдо’ мэць илець, тыдо’ пэрць выӈгана илевамдо’ минредось. Ӈацекыдо’ ӈани тоходанва по’ ямбан маркана тоходанаць, интернатхана илець. Тарем’ ӈока хой’ ӈацекы’’ тоходанаць. Ненэцие школа-интернат ёльцевы хибяри’’ теда ӈод’ яндаха’’на иле’’, хуркари манзаяха’’на манзара’’. Хуркари’’ луца’’ манзаяха’ школандо’ пуд тоходанвы хибярина ӈокаювдо’ школа-интернатхана тоходанвы. Нюртей тиртя’, ту’ ӈаном’ мэтина, нюртей геологна’’, нюртей тохолкодина, нюртей лекарьна, нюртей паднанина’’ малӈэ’ тикахана тоходанвы’’.
Няръяна маркана школа-интернатм’ ёльцевы’’ ӈацекы’’ март’ турцеты’’, ӈобкана ма’’люрцеты’’. Тюку по’ ӈод школандо’ ӈарка со’’яма ялян’ тутнакы’’. Тохолкодидо’ манэта’’, тохолкова подо’, тоходанась ня’’амы нидо’ тензебтеӈгу’’. Ваеравы по’ вэба ирийхана маркана школа-интернатхана тоходанвы’’ хибяри’’ ядтамась. Юд’ мяндо’ ӈэвакы. Маркы’ сехэрэмна ядасумбиць, поӈгнандо’ теневана нин’ таневыць. Тикы ӈобкана тоходанвы хибяри’’ ӈэвыць. Пыдо’ няхар’’ ю’’ синдтет по’’ тяхана маркана школа-интернат ёльцевыць. Тедахова таӈок по’’ ваерась маля ӈарка хибяри’’, хусувэндо’ харта илесь яда, харта манзаяда. Анна Явтысая (Мальгина) Вельскхад’ товысь, Ольга Ардеева Архангельской областьхана иле, Любовь Михеева теда Питеркана илена, Харутахад’ Мария Ледкова (Рочева) товысь, Хонгурейхад’ Надежда Ардеева (Канева), Краснойхана Александр Вылка иле, Холговхана Диана Соболева , Няръяна маркана Анна Талеева (Колыбина), Вера Ледкова, Алексей Ноготысый, Василий Лагейский иле’’. Ӈобкана ма’’лась, нидо’ манэць индо’ ватоць, маймбиць. Пыдо’ ненэцие школа-интернат ёнар’’ хасуюёнар’’ си’’ив ю’’ си’’ивумдей похона ёльцедось. Тамальӈгы похо’’на хойхад’ товы’’ ӈацекы’’ няюв манзаравы’’ тохолкода’’, воспитатель’’ ӈокаць. Школа ервотаӈэ’ таравы Попов А.А., Тельтевский С.Н., тохолкода’’ манзараць Дерюгина А.Н., Петина Е.М., Антипина М.И., Латышева А.В., Ушакова А.П., Широгородская Л.Г., Ушаков Е.М., Витязева А.А., Алсуфьева Н.В., Явтысый П.А., Скачков Ю.И., Белов А.Н., Хатанзейская Е.Е.
Невхы похо’’на школа-интернатхана тоходанвы хибяри тикахана илевамда, тоходанвамда сава ихиня тенеда. Тамальӈгана манзаравы’’ хибяри’’ хойхад’ товы’’ ӈацекыдо’ тоходанва’ хавна, илӈгана тарана’’ ӈамгэн’ тохолабидось. Ӈацекы’’ харто’ хардахандо’ иленархаць. Мал’’ тикым’ ӈока по’’ тяхана тоходанвы’’ хибяри’’ тенедо’. Тарем’ еримбнанда харто’ школахандо’ харвась’ турцеты’’, маркана мэбнандо’ харвась школандо’ мят’ тюӈсеты’’. Тюку по’ӈод школандо’ со’’яма ялян’ харвась ма’’лаӈгуд.
