Сидя ёнар’’ маттамдэй яӈганя похона нябимдей ирий’ илева’’. Маля яра ириян’ тэвына’’. Валакада, сенз’ ӈэва сер’ нарэйӈэ’ ханта. Яра ирий’ нямна Таймыр няна илена паднана нява Раиса Яптунэ’ тарем’ падна.
Хурина выӈгана яра ирыхана соховахнанту хад марыбиду. Тарем мале иры еркана вымна ӈэдалёва сер пирця седе’ ниня яра’ няби’ё вэт ӈарханту ӈадиберӈа. Яра’ седи’ ниня хоркыця хуна’ таня ӈамторӈа яра пэкоцяхна’ пирциёду сабыби. Хурина ӈоляко’ ӈацекэко’ хорки пирцико мюд тикы пэкоця’ сянакоданту малабсятыду. Тюку ирыхана мале хаерта тю’уна нув панхад хэвы. Иб тарця ӈэбта ӈод яра иры ӈоб тарем сыранта ерӈэ толю нив ненэй ненэцяи’’ яля падаркана.
Хоркы манталмана вымӈгана тирӈа’, тоту’ сяхрёры нябия вэт со. Ӈэрмода тамна саӈа хаерта иб тю’’уна мале хэб’’ӈод.
Хэвхи ненэця’ лахрёхна яра ирыхына яляда хорки ӈоб еӈган ямбу’’ворӈа. Иры ӈэвана хаер яля ер’й ельцянт нибта падер нарма няна ихлад’ мер ӈадимта’. Хурина нумта мин иба сей няад пилипон мипбнанта – танта саре ӈэӈгу, ханзо ӈэӈгу. Яра иры ерь’й ёльцянт пилипон хад ӈэбнанта ӈоб тарем ханзо там’ пэрӈа. Пэвсюм ня’ана нумгы’ ясаварб, нум няра талм ӈэб – ху’ няна хадумта. Сава яля пэвсюм няна мантырта’ нумгы’ манэб – ӈэрм хад’ӈэ ладаӈгуда, мерцямта нумта.
Хурина тэхнату’ еня’ ненэцяи илеванта тикаӈэ савовна пунум’’тавы сер’ ӈы ним. Пэвсюм няна нумт сомбовна тад сылаб нумгы’ ӈолькоцявна ӈадяб – тебтад няна хад ялям пэрӈа. Нумгы пэвсюм няна нум няра тахмана вули ялкадартарп ӈоб тарем вэва нувм пэрӈа. Мантырта нумгым нув нярахана манэб – теб’’таад няна мерцямта. Минюй иры сомповна сюрибцяваӈэ ӈадимб ӈод тарем нув мерцямам пэрӈа. Иры сэракояӈэ ӈадимб ӈарка хад яля’’ ӈадеда’’.
Хурина сава яля ирт ты’ лакри харту ӈэсонту туда’’ яха’ лядорць пэвнанту – тебта’’ад няна нумта хадумта. Хурина яра ирыхана етри ӈэрманта ня’’ад мерця мимб ямбтэй сырам пэрӈа. Хаерад нув пенёнан лакри явна минзя хад пэвнанта няхар яля ямбан нумта вэва ӈэӈгу.
Яра иры еркана мале хаерта тю’’уна тобенав ӈод, нарэйта ёльцянт тамна хубта ӈы нив. Вымна ӈэдалёда ненэцяи хан ханзад ӈылад хорки’ тари пыдабтырӈа. Пыдду’ хадырта’ ты’ хоба ӈылад хуркари ӈодякоця’’, ӈувокоця’’ тылэби’. Латрёдо’ няби ё’ вэкна со’. Хурка сыранта ер’й тамна ӈэбта ӈод, мале ну ялэ тебта нумта нарма няю сюрхалмада мале сэван ӈади. Яра иры сырэйн’’та пуданаӈэ толю нив. Тад ӈадиманта, саполана иры нарма няю пом сюрхалебю нидав. Тюку иры ямбан пилипон хад мырыбида тамна, тецьда’’ яля’’ ну ялэ’ тебта миӈа. Паднана ненэця яра иры’’ ед тарем падна.
