Хор’’ ирийхана тамна ӈопой ӈарка яля’ таня, луца’’ вадавна хэтась – День работника сельского хозяйства и перерабатывающей промышленности. Тюку по’ ӈод округханана тарця ялям’ мэ’’ӈаць. Няръяна маркана сельской хозяйствона манзаранина’’ ӈарка яляндо’ ед хамандавы ма’’лёвамдо’ мэ’’мась культурно-деловой центр’ мякана хор’’ ирийна ӈоб’ яӈганя толыркана ма’’лыць.

Маня’’ яханана ӈокаюв хибярина’’ ӈэсыхына илена’’, пыдо’ сельской хозяйство’ манзаи’’ минре’’. Округханана хасую’’яӈганя сельскохозяйственной производственной кооператив’’, ханяна хибярина тэхэна’’ манзара’’, хорови’’ пэрӈа’’, халям’ ня’’амарпи’’. Тикы’ хавна си’’ив семейно-родовой община. Таняна ӈокаювдо’ ты’’ пэртяӈэ’ манзара’’. Сельской хозяйствохона манзаранина’’ сидна’’ ӈавламби’’. Ты’’пэртина ӈамзадава’’ таби’’, хорови’’ пэртина молокахана, юркана’’ сидна’’ ӈаволаби’’, ёртина’’ халям’ ня’’амарпи’’. Маркана ӈарка теплицава таня, таняна манзанина’’ ӈаворта ӈамдэдо вадаби’’ тарця ӈавортахана’’ сидна’’по’ ямбан ӈавлаби’’, хуркари’’ паской ӈамдэд’ таняна вадаби’’.

Маня’’ округханана сельской хозяйство’’ нерня манзарава’’ е’’эмня целевой программа’’ манзара’’. Няхар’’ яӈганя сельско-хозяйственный кооперативхана тыдо’ пэрӈа’’. Округханана Ӈарка, Нюдя, Канин, Тиман выӈгана, Холговхана ӈокханда юр’’ си’’ив юр’’ ёнаркад’ вата ты’’ хадырӈа’’. Сямянд’ ӈарка ты’’пэртя’’ хозяйство’’: «Ижемский оленевод и Ко», «Ерв», «Путь Ильича», «Харп», «Колгуев», «Канин» ненэцие община’’. Таняна манзарана’’ хибярина’’ иринато’, хадунато’ илм’ мэць вымна мюсерць тэхэна’’ мэ’’, ханяӈыдо’ нянэй мякана иле’’, нюдо’ хэвханандо’ школан’ хэвандо’ ӈэсонд пэръядо’. «Ямб’ тохона» илена’’ нина’’ харто’ тыдо’ пэрпато’ ӈод тыто’ ӈамзам’ Няръяна маркы ӈамза’’ комбинатан’ маля сян по’’ ямбан тэврабидо. Пыдо’ ӈод яхана сава нядаӈговам’ тэврамби’’.

Округханана сидя ёнаркад’ вата хибяри’’ сельской хозяйствохона манзара’’. Ты’’пэрма’’, животноводство’ сер’ хавна тамна халям’ ня’’амарпадина таня’’. Пыдо’ манзаямдо’ Ненэцие’’ рыбакколхозсоюз’ минрейда. Ёртидо’ яв’ халям’ тэвода’’. Похонанда юкад’ вата тонна’’ тарця халям’ ня’’амарпи’’.

Округна ервуна яханана сельской хозяйствохона манзарана’’ хибярина манзарава’’ сававна мима’’ е’’эмня идо’ пилибт ядэрӈа’’. Ты’’, хорови’’ пэрма’’ сер’, халям’ ня’’амарпава нерня вадюданва е’’эмня манзара’’; ӈэсыхына илена’’ хибярина манзаядо’ пилибт’ танябнанда тикы ӈани’ ервуна ибедорма’’. Хэбидя яляхана ваеравы ма’’лёйкана хуркари’’ манзаяхана манзаранина’’, ӈэсыхына иленина’’ ӈока’’ ихид’ миндя вади’’ намдаць. Округна администрацияхад’, депутат’’ собранияхад’ сававна манзаравы’’ хибяри’’ грамоты’’ ня’’амаць.

Тюку яля’ хусувэй ӈэсыхына иленаха’’, теда таняна сававна манзаранаха’’, невхы похо’’на манзаравы’’ ӈарка хибярихи’’ ӈарка вадам’ хэтбива’’. Пыдо’ минрена’’ манзаидо’ сибиць ни’’ӈа’’. Хуркари’’ нумӈгана ненэциена тыдо’ пэрӈа’’, халям’ ня’’амарпи’’, хоровидо’ вадаби’’; ӈэсыхына илена’’ хибярина хусувэй манзаямдо’ сававна пэрцетыдо’. Тарця енава’’ таня, по’’ тута’’ ся’’ня сельской хозяйствохона манзарана’’ нина’’ недбидо’ ӈарумда, манзаядо’ хусувэй ӈэсыхына илена хибяри танеӈгу. Ябда иледа’’, сензда ӈада’’, нерня илевамда сава ихиня минрера’’.