Ӈэрм’ яханана паднана’’ ненэциена хуркари’’ тенз’ поӈгана таня. Мал’’ пыдо’ харто’ вадавнандо’ падна’’. Ханяӈы паднана’’ манзаидо’ ӈарка хибяри’’ е’’эмня таславы’’, ханяӈы яӈга ӈацекы’’ е’’эмня падна’’.

Ханярина илена’’ паднана’’ ненэциена ханяӈы’ мэвахана харто’ ма’’лёвадо’ мэ’’мась ма’’люрцеты’’. Ӈобт’ тэвась минрена’’ манзаито’ нямна лаханасьты’’; нерня манзаравидо’ таслабсеты’’. Тюку по’ нерняна товнда ирийхана финно-угорский тензхад’ перена’’ паднана’’ ма’’лёва Ямало-Ненецкий округхана ваераӈгу’’. Теда тарця яляха’’ Саля’хардахана илена’’ хамяковамдо’ мэ’’ӈа’’. Товнда хибярито’ толыр’’ тасламби’’, тикахад’ паднана’’ ханяна илевам’ таслась’ тара. Луца’’ вадавна хэтась – конференциян’ товнда’’ хибяри’’ сян яля’’ ямбан манзаравнда’’. Сямянд’ таславндидо’ ӈэрм’ тенз’ ненэцие’’ паднава сер’ нямна ӈэӈгу’’. Тамбир’ ӈарка ма’’лёван’ товнда хибяри’’ хуркари’’ яхад’ танеӈгу’’. Ӈысма’’ республикахад, Мордовияхад’, Карелияхад’, маня’’ округна хибяри’’ ӈод’ тарця ма’’лёвахана манзараӈгу.

Тюку ялян’ хэтась: финно-угорский тенз’ мэта’’ паднана’’ ма’’лёян’ маня’’ яхадана Лукерья Валей хэван’ хамяку. Лукерья Александровна маля ӈахы’’ похот’ паднава серм’ минреда, няхар’’ вадавна падна. Пудана’’ похо’’на едэй ӈадимы’’ манзаида тянё’’ ни’’ӈа’’. Паднаван’ харвана’’ ӈацекы’’ няюв’ ӈод Лукерья Валей ив’ ер манзара. «Суюкоця» манзаям’ пыда нерня минреда. Паднана’’ ма’’лёван’ маня’’ паднанава харта вадамда тэвраӈгу.

Хибя’’ тамна маня’’ яхадана тарця ма’’лёян’ ӈэдалаӈгуд’? Тикым тэдари’ хэтась я’’амав’. Валакада хэтгув’- паднана’’ ненэцие’’ ма’’лёва манзаямда нюдя пэвдэй ирий’ сидя ю’’ си’’ивумбей толыркана Саля’хардахана нэӈгуда. Хэвхы округ’ еркы маркана ӈэрм’ яхад’ товнда нина’’ тет яля’’ ямбан манзараӈгу’’.