Вы здесь

Ненэцие’’ ма’’лёвахана

Яханана ханярина илена’’, хуркари манзаяхана манзарана’’ хибяри’’ манзарась’ тенева’’, ныланась’ тенева’’. Культура’ серкана манзаранина’’ хибярина ныхыдамдо’ ма’’лава’’ е’’эмня хуркари ныланави’’ хамадабсеты’’.

Пудана’’ похо’’на таремъюв’ хамандавы’’ ныланава’’ тянё нисьты’’ӈа’’. Нись’ ӈакуна’ тамна « Енава мюд’» фестиваль’ ваерась, мел’’ хибярина сертавы’’ сянако’’ манэ’’ӈаваць. Хор’’ ирий’ тось Красной’ ӈэсыхына финно-угорский тенз’ мэта хибяри’’ ӈани’ ӈобкана ма’’люрӈаць. Тюку мэвахана «Заполярная финно-угория» таремъюв’ нюмдевы ма’’лёва хуркари’’ тенз’’ ненэцие’’ ма’’лась. Ӈоб’няд перена’’ хибяри’’ яля’’ тюку по’ ӈысма’’ е’’эмня хамандавыць.

Краснойхана илена’’ хибяри’’ тарця ялу’’ ӈатейдось, хусувэй хибяри мядонди’’ ӈатесь. Ти, «Заполярной финно-угория» Красноян’ тэвыць. Тикы яляхана нумда сацьри’ сава нись’ ӈа’’, хувэхэд’ сарёсь, мерцяда са’’ӈась. Тарем’ ӈэбнанда ӈод’, хибяри’’ ӈарка ялям’ мэ’’мась ма’’лэйдаць, хусувэй таняюв’ товы хибяри ихиня тарця яля’ савархась. Ӈэсыхы культура’ харад’ хэвхана нянэй мядм’ ӈамтаць. Мядм’ манзаям’ пэртя не’’ ядембада сяйхана нидо’ сяйлабтамбиць; ӈамнелада евэй’, ты’ ӈамза ( запах) пихиня’ сось. Хусувэй хибяри мят’ тюӈгась.

Финно-угорский тенз’ ненэцие’’ ялу’ мэ’’манзь тюку по’ маня’’ яхана Сыктывкаркад’ товы’’ мядонда’’ таняць. Тарця ма’’лёвам’ нэвахана Заполярный районхад’ товы’’ ерв’’, «Приморско-Куйский сельсовет» серм’пэртя вади’’ мэ’’ӈаць. Тикы’ пуд мал’’ хибяри’’ пихид’ культура’ хардан’ тюць. Таняна танясь ӈамгэм’ манэць! Выставка декоративно-прикладного творчества танясь. Краснойхана илена’’ хибяри’’, ӈани’ ӈэсыхыт’ товы’’ мел’’ хибяри’’ сертавы’’ манзая’’ ӈокаць. Хуркари’’ манзаи’’ сэвхана маниесь’ савархаць. Сямбир’ и’’ӈудота хибяри’’ яханана иле’’, пысабцось. Тюку’ мэвахана хибяри’’ тамна хуркари’’ ӈавар’’ тэвравыць. Харто’ пиревыдо’, сэртавыдо’, тыртавыдо’, ябцавыдо’ мирдапиць. Харвана’’, нито’ хамандавы’’ тэмдабидось.

Тикахад’ хибяри’’ ихиня сомбой сё’’ намдаць. Мядоманзь’ товы’’ хибяри’’ е’’эмня «Нянэй сё» коллектив’ хыно’’ӈась, Краснойхана илена хынокад’ хасава Валерий Ледков сён’ инзелець. Пыдо’ хавнандо’ культура’ хардахана хынота’’, тарана’’ хибяри’’ тянё ниць’ӈа’’. Ӈысма яхад’ товы’’ мядонда’’ фотовыставкам’ тэвравыць, пыдо’ яханандо’ илена’’ ӈацекы’’ падтавы’’ манзаи’’ манэ’’лабтабиць. Сыктывкар маркана финно-угорский центр’ мякана манзарана’’ мел’’ хибяри’’ манзая’’ таняць: сянако’’, ӈухуко’’, плат’’. Хусувэй харвана ивнянда ӈэда’ сянаком’ тэмдась пир’’ӈась. Тамна, хибяри е’’эмня мастер-класс’’ манзараць. Мел’’ не’’ манэ’’лабтабидось – сувенир’’ ханзер’ сертабада’’; харвана’’ ӈысма’’ ӈухуком’ – Акань сертабась тоходанаць.

Яля’ ямбан Нина Конькова Несь’ ӈэсыхыд, Наталья Пырерка Краснойхад ӈока хибярим’ хэвханди’ ма’’лаӈаханзь. Пыди’ хусувэй харванам’ пена’, хоба’ пускахад, тохоця’ хаю’’мяхад’ сувенирком’ сертась тохолабихинзь.

Яля’ пуданахана хибяри’’ концертан’ ма’’лэйдаць. Ханяна мел’’ ӈэвамдо’ маркад’ товы’’ хибяри’’, Краснойхана иленина’’, Андегхад, Тельвискахад, Хорейверхад товы’’ мядонда’’ манэ’’лабтаць. Хуркари’’ вадавна хыноти’’ ёльце’ сававна ядабтабидось.

«Заполярная финно-угория» – таремъюв’ нюмдевы финно-угорский тензхад’ перена’’ хибяри’’ ма’’лёва нябимдеймэвна ваерась. Ихиня сомбой ма’’лёва пон’ тамна Краснойхана илена’’, мядоманзь’ турмы’’ хибяри’’ ихиня илеӈгу. Тарця ма’’лёвам’ хамандавэхэ’ сейхад’ ӈэда’’ вада’’.