Вы здесь

Ӈопой яхана илена’’

Маня’’ яханана’’ хуркари тэнз’ мэта’’ ненэця’’ хыноси’ иле’’.

Нидо’ хуркари серкана хамадабидо’, тарабнанда нидо’ нядабасетыдо’, ӈобкана хэбидя яляха’’на’’ ма’’лёсеты’’.
Хуркари’’ тэнз’ ненэця’’ харто’ паӈгудо’ лэтбась нерня’ миӈа’’, харто’ вадамдо’ мэ’’ӈа’’, лэтби’’; харто’ культурамдо’ няхато’ манэ’’лабтбасетыдо’.
Хусувэй по’ носиндалава’’ ирий’ тетимдей яляхана хэбидя ялям’ мэ’’манзь округна’’ землячество’ ма’’люрцеты’’. Тюку по’ тарем’ серо’’пата тарця ялява’’ ӈани’’ ваераӈгу’’. Хуркари’’ тэнз’ хибяри’’ ӈобкана ныланаванзь тэвӈгуд.
Мале’’ ӈока по’’ ямбан округханана’’ иба’ яхад, Дагестанхад товы’’ хибяри’’ землячеством’ сертаць, тикахад ю’’ по’’ тяхана «Нюдя’ я» тарем’ нюмдевы землячеством’ Саляхад тарпы’’, таняна ӈока по’’ ямбан’ илевы’’, манзаравы’’ хибяри’’ ӈани’’ ма’’лаць.
Хор’’ ирий’ маттамдэй яӈганя яляхана этнокультурной центрхана манзарана’’ нина’’ сидя землячество’ ненэцие’’ ӈобкана ма’’лаць.
Яба’ я’ тер’’ хибяри’’, ӈэрм’ тер’’ ненэця’’ ӈобкана ныланаць. Няхато’ харто’ тэнздо’ нямна лаханаць, харто’ культурандо’ нямна лаханаць, харто’ вадавнандо’ стих’’ толабиць, тарабцодо’ няхато’ манэ’’лабтаць.
Тарем’ маниесь, яндаха’’на’’ илена’’ хибяри’’ нито’ илм’ теневаван’ харвадо’, нидо’ сава ихина ханярина ядтабсетыдо’. Тарця ваеравы ма’’лёвахана нито’ ил’ нямна ӈокам’ намдсеты’’.
Этнокультурной центрхана «Народная дипломатия» проект’ манзара.