Округханана cиднтет ю’’ самляӈг по’’ ямбан «Няръяна вындер» газетава таня. Таӈок по’’ ямбан ӈока паднана’’ хибяри’’ тюкона манзараць. Ненэцие’’ вадавна паднана’’ пилибт’ таняць. «Ялумдава» ненэцие’’ вадавна падбада’’ страницава маля сидя’’ самляӈг по’’ ямбан ӈадимберӈа. 1989 по’ февраль ирийхана нюртей ӈадимясь. Маня’’ страницава ӈадимдевы Валентина Артемьевна Ханзерова, округханана теневана хибяри, тохолкода, паднана.

Тюку ирийна сиднтетимдей яляхана округна библиотекахана отдел Севера манзарана’’ няхаюна’’ ненэцие’’ вадавна паднана’’ нито’ е’’эмня ма’’лёйм’ хамандаць. Таня хибяри’’ тоць, хуний «Ялумд» страницахана сяӈгова манзараць. Тарця ма’’лёвам’ Зоя Ивакилева нэдась, пыда «Ялумдана» историям’ ваде’’ӈась. Пуданда вадам’ Валентина Артемьевна Ханзерова минресь. Пыда тарця вади’’ хэтась: – «Няръяна вындер» газетахана 30-40 похо’’на хэ’’ли’ ненэця вадавна падвы’’ танесеты’’, валакада тарця падбэй’’ луци’’ вадахат сертавы’’ ӈэсьты’’. Отечественной сайнорма’ мальӈгана ненэця’ вадавна падвы’’ яӈгумаць. Сайнорма’ пуд самляӈг’ юдимдей по’ пуданаха’’на ненэця’ вадавна падвы’’ ӈадибелыдаць, ханяӈэна наӈгадя’’ страница’’ ӈо’’ танелъядаць. Тамальӈгана газетахана Евдокия Ноготысая манзарась, пыда ненэця’ вадавна паднась. Ёнар’’ хасую’’ ёнар’’ мат’’ ю’’ няхарамдэй похона Окружком партия’ бюро’ табадяр’’мана ненэця’ вадавна падбади’ мадаръядонзь. Валакада сидя ю’’ матад’ по’ ваерахава’ страница несэювна ӈадимясь.

1989 похона нертей газета’ редакцияхана ма’’лэйнаць: П.А. Явтысый хаса, И.Е. Ледков, М.Н. Ледкова хаса, А.С. Ардеева, мань, тамна хибяхова’’ таняць. Страницана нюмдамда ми’’ӈаваць, редакторӈэ’ си’’ми’ тэраць. Тикы яляхад’ юд по’ ямбан «Ялумд» страницахана манзарамась. «Няръяна вындер» – общественно-политической газета, ӈадьбянда «Ялумд» страницахана ӈод’ округханана ӈэда’’ хуркари’’ ӈарка серо’’ нямна падвы’’ танесеты’’: ассоциация съезд’’, выбор’ ӈэя’’, конференция’’; ханзер’’ вындер’’, марад’ тер’’ ненэця иле’’, манзара’’… Хуркари’’ рубрика’’ таняць. Страницан’ ненэця’’ паднасьты’’. Отпускан’ хэба’’н, тадан М. Талеева, С. Дуркина, М. Хатанзейская, П. Вылка, Ю. Талеева манзарасьты’’. Мань’ пудан П. Явтысый, О. Терлецкая, О. Латышева страницава хамадамбиць.

«Ялумд» страницава’ сертабась сибиць нись’ӈа’’, манзарамась, нядаӈгодин’ танесеты. Теда газетава таня, тад нерня’ тамна пон’ ненэця’ страницава’’ илея, паднана’’ таняя’’.»

Валентина Артемьевна 1989-1997 по’’ ямбан сертавы’’ «Ялумд» страницы’’ ма’’лавыдась, тикы манзаи’’ библиотекана Отдел Севера манзаранаха’ мийдась.

Сидя ю’’ самляӈг по’’ ямбан «Ялумдхана» манзаравы’’ хибярина ӈока’’ ниць’ ӈа’’. Пудана сиднтет по’’ ямбан мань’ газетава сертабив’. Небой по’ неняӈг’’ ирийхад’ сидя страницам’ ненэця’’ вадавна падбидм’. Теда ӈод’ нядаӈгодин’, газетан’ паднанин’ танесеты’’. Саць нядаӈгода’’, нянэювна вадава нерня’ танева е’’эмня ибедортина’’ М.И. Талеева, Р.И. Канюкова, С.П. Дуркина. «Ялумдана» пудана похо’’на манзаравам’ ма’’лавы’’ хибярихи’ мань’ ваде’’ӈавась. Теда ӈод’ манзаява нерня миӈа’’, хибярина падна’’, газетава ӈатедо’. Тарем’ еримбнанда, харвабнанда нерняна товнда похона хар’’на газетава ӈадимда. Тарця сер’ нямна ибедорӈава’’, манзарава’’.