Маля ӈахакуд’ округханана «Илебц» театрава таня. Таняна сянакода’’ хибярина малӈэ’ харто’ вадамдо’ мэ’’ӈа’’, харто’ культурамдо’ теневана’’. Нянэй не’’, хасава’’, ӈацекы’’ ӈока’’ ихиня сомбой программам’ хамандаць.
Масьтевы’’ манзаидо’ манэ’’лабтавась округна ӈэсыхы’ тэворцеты’’, тикы’ хавна ӈани’’ ян’ ӈэдалёрмадо’ ӈод танесеты. Пыдо’ манзаидо’ маниесь’ ӈани’ я’ тер’’ хибяри’’ нянэй ненэця’’ вадам’ намдурцеты’’, нянэй ненэця’ культурам’ торомдабсеты’’. Ханяри’’ тэвормахана маня’’ нина’’ ив’ ер’ сянаковам’ манэ’’лабтабасьты’’. Сиддо’ ӈод хуркари’’ я’ тер’’ хибяри’’ сава ихиня ханярина ядтабсеты’’. «Илебцхана» сянакода’’ нина’’ сюртевы’’ ядо’ тянё ни’’ӈа’’. Хор’’ ирийхана Ярославль’ март’ тэвормадо’ танясь. Таняна ваеравы театр’’ фестивалькад’ Диплом I степени, Диплом « За лучшую режиссёрскую работу и художественную аутентичность в воплощении обряда» тэвраць. Маня’’ нина’’ пэдоваць, няндо’ ӈарка вада’’! «Илебц» театрана манзаям’ нерня минренаӈэ’, маля сян ирий’’ ямбан нида’’ нерня пэртяӈэ’ Надежда Талеева манзара, режиссёрӈэ’ таранадо’ Светлана Горностай.
«Охочие комедианты» нюмдевы Всероссийский фестиваль фольклорных коллективов Ярославль’ маркана ваерась, таняна маля няхарамдэймэвна тарця ма’’малёвам’ хамадаць. Тюкумэвахана Москва, Санкт-Петебург, Рыбинск маркад, Московской, Ленинградской, Саратовской, Владимирской, Архангельской областьхад’ театральный манзаи’’ манэ’’лабтада’’ коллектив’’ ма’’лабиць. Яндахат’ товы’’ хибяри’’ харто’ программыдо’ тэвравыць, масьтевы’’ манзаидо’ малӈэ’ саваць. Маня’’ округва манэ’’лабтавась ненэцие’’ «Илебц» театр’ хан’’ӈась. Тюкумэвахана маня’’ нина’’ тамбир’’ ӈарка фестивалян’ ненэця’ паднана Прокопий Явтысый падвы пьесавна’ масьтевы манзаямдо’ тэвраць. Таняна «Самбдава» манзаямдо’ манэ’’лабтаць.
Ненэцие’’ театр’ ханярина саць савовна ядтабидось. Маня’’ нани’’ӈод ӈока ныхымдо’ манзаяхандо’ масьтебиць. Сцена’ ниня нянэювна сянакуць. Паской паныдо’, пибидо’; яхакодрев’ лохортако’ вададо’ тикы яля’’ мальӈгана ӈока хибяри’’ сею’’ ядимдась. «Самбдавам’» маниевы’’ хибяри’’, ненэця’’ вадан’ инзелевы’’ тарем’ лаханавыць: манзаямда харта вадаривнанда манэ’’лабтабира’’, луца’’ вадавна нёда’’ лахана’’. Маня’’ сидда’’ саць со’ хамадабива’’! Сававна масьтевы’’ манзаяхана, вадам’ ехэрартась нямд’ хамадаӈгур.
«Илебцхана» хибярина харвась манзара’’, харто’ вадамдо’, культурамдо’ тю’’ури пэрӈадо’. Ярославлькана ваеравы фествиалькад’ сава юнм’ тэвравы’’ нина’’ Валентина Чупрова, Валентина Тайбарей, Фаина Ледкова, Нина Баркулёва, Михаил Бобриков, Сергей Кычин, Александ Ледков, Светлана Горностай. Ӈоб’ нерня, тарем’ ӈэя, «Илебц».
