Я’малкана илена’’ ненэциена ваеравы’’ яля’’хана Саля’хардахана ма’’люрӈаць. Хусувэй маркад’, хусувэй районхад’ товы’’ хибяридо’ тянё ниць’ӈа’’. Тюкумэвахана пыдо’ округандо’ еркы март’ «Ямал потомкам’» нюбета ассоциацияндо’ ӈарка ма’’лёйм’ мэ’’манзь’ тоць.

Тарця ялям’ мэ’’мась ӈани’’ яхад’ товы’’ мядондидо’ таняць, хуний «Ямал потомкам» ассоциацияна манзаранаха’ харто’ хэтувнда вадидо’ тэвраць. Таймыркад’ товы’’ таняць, Ханты-Мансийск’ маркад’, Няръяна маркы ненэця’’ таняць, Тюмень, Тобольск, Санкт-Петербург’, Москва маркад’ хибяри товыць.

Носиндалава ирийна сидя ю’’ сиднтетимдей яляхана «Ямал потомкам» ассоциация’ ма’’лёй манзарась. Ямалкана сидя ю’’ самляӈг по’’ тяхана ӈэрм’ тенз’ мэта ненэця’’ ӈобт’’ ма’’лась, харто’ ныхыто’ енась яндо’ е’’эмня манзарась пядось. Тамальӈгы похо’’на ассоциацияндо’ нюмда ӈадимясь. Тарця организацияна манзарана’’ ненэця’’ сидя ю’’ самляӈг по’’ ямбан сертавэдо’ маля ӈока’’. Тюку ялян’ хэтась: ассоциацияндо’ отделения’’ хусувэй маркана, хусувэй районной центрхана таня’’. Таняна манзарана’’ яханато’ илена’’ нидо хуркари’’ серкана нядабидо’, вынд’ тэворцеты’’, халяда’’ ненэцието’ илм’ тенева’’. Тикахад’ таӈок по’’ ямбан толырто’ тянё ненэциедо’ ерв’’ поӈгана манзара’’, депутатӈэ’ сиддо’ тэрамби’’. Ямалкад’ сидя нянэй ненэць’ РФ депутатӈэ’ манзараӈаха’, тикы Григорий Ледков нябим’ Дмитрий Хороля.

Ваеравы яля’’хана Саля’харда-хана тамна лэвна’’ маторана’’ ненэця’’ ма’’люрӈаць. Тарця манзаи’’ сертабада хибяри’’ ӈобтарем’ яндахат’ товыць. Маня’’ округхадана таняна манзаравы Филипп Никитич Ардеев, Виктор Михайлович Вылка. Пыди’ ӈод харти’ манзаиди’ манэ’’лабтаӈаханзь.

Ханзер’’ нина’’ хаювы яля’’на Саля’хардахана манзараць, хурка серу’’ ӈобкана ма’’лась таслаць? Тикы нямна вадина нерняна таневнда газетахана падвы’’ ӈэӈгу’’.