Нюдя’ пэвдэй ирий сидя юдимдей’ толыр’’ маня’’ округханана хэбидя яляӈэ’ таславы. Тикы яляхана сидя ёнар’’ няхарамдэй’ яӈганя поход’ оленно-транспортный батальонхана сайнормы’’ хибярина тензебтеванзь’ ма’’люрцетыва’’. Тюку по’ ӈани’ тарцясь. Памятник’ хэван ӈока’’ хибяри’’ турӈаць, поӈгандо’ Михаил Тимофеевич Ледков’ хаса перена’’ таняць.
Тамальӈгана Фаина Харитовна Ледкова тарця вади’’ хэтась: - Мань’ вэсакон’ нися Ледков Михаил Тимофеевич. Нюдя яхана 1919 по’ носиндалава ирий’ 7 яляхана соявысь. Илеванда ямбан тыбэртяӈэ’ манзарась. Сайнормы ненэцясь’. Саю’’ по’’ нерцю тэ’’на мэсь, сайнормахад’ то’’омахаданда ӈани’’ тэхэ’’ танэяць. «Выучейской» нювм’ нюбета колхозхана манзарабэй. Нельмин Саляхана илесь, семьяда нюдя нись’ӈа. Армиян’ хаясь, Карельской фронтанхана’ мэсь, оленно транспортный батальонкана хаясь. Пыдо’ харто’ тэхэ’’нато’, тыдо’ ханась хаяць. Реккесиха станция ӈэсонд’ хаяць, тамна нерня Архангельскан тэвыдаць, Мурманск ӈэсонд’ ту’ӈанона тэввыдаць.
Карельский фронтхана сайнорӈась. Ты’’ мэтаӈэ’ таравысь, боеприпас’’ тэвобавыць; хусувэй тарана ӈамгэм ядэлавыць. Пенделевы’’ хибяри’’ бойхад’ нэкалпавыць.
Нянэй сехэры’’ тамальӈгана яӈгуць, ёря сыравна тэр’ ядэрць пир’’ӈадава. Ты’ хуркари явна ваерась пир’’ӈадась.
Сайнорць’ нита’’ няюв Норвегия ӈэсонд’ тэввыць, Киркенесс мар’ ӈэсонд’. Наградыда тарцяць «За оборону Советского Заполярья», «За победу над Германией». Сайнорма’ пуд то’’омахаданда хойхана манзарась, сававна манзарана хибярись, сава тыбэртяӈэ’ пилибт’ толысь. ВДНХан’ ядэрцеты’’. Сававна манзараванда е’’эмня ня’’амвы медальта ӈани’’ танець.
Михаил Тимофеевич сава хибярись, нацекыда нисямдо’ саць мэнедось, нюта ню’’ ӈод иримдо’ теневадось, сяӈадось. Халям’ нямбасеты, халядава тасьты. Ханева серм’ мэнесь, ӈока ханисэй тэврасьты. Ӈока ӈацембой ненэцям’ хойхана манзарась, тыбэрць тохолась. Тандая хоян’ манзаравась тэввы’’ хасава ӈацекы нядабасьты, тарана серт’ тохолабсеты.
Неда Анастасия Ивановна Ледкова. Теневана, я’’авлада несь. Падарм’ теневана некоцясь. Счетовод Настяӈэ’ пэрцетыдо’. Няхар’’ нюдись, сидя хасава нюди’ Иван Михайлович Ледков мань’ вэсаков’, Тимофей Михайлович Ледков, не нюди Лидия Михайловна Ледкова, теда Талеева, я’’авдала не. Ирина ӈацекыда мал’’ сава’’хибяри’’, илан’ мэёвна сырта’’. Ирива’’ пилибт’ тенеӈгува’’.
