Маня’’ яханана хусувэй по’ ӈэрёй това сер ненэцие’ паднава сер’ нямна таславы ялуна мэцьтыва’’. Тюку по’ ӈод тарця ялуна’’ округханана миӈа’’. Носиндалава ирийна маттамдэй’ яӈганя толыркана нэйнаць.

Ирий’ ямбан ненэцие’ паднава сер’ нямна ӈока’’ сян’ тенз’’ мероприятия’’ таневнда’’. Нянэювна ӈацекына няюв’ манзарава’’ ханярина танеӈгу’’. Хусувэй ненэця’ вадам’ минрена’’ школахана, садикхана хуркари’’ конкурс’’, викторина’’ ваераӈгу’’; классной часхана ненэцие’ культура, вада нямна лахарё’’ танеӈгу, ӈока’’ мэкад’ урок ваераӈгу’’. Хари’’ я’, хари’’ вада’, хари’’ культура’, мэбета хибяри’ нямна ӈацекына несэй вади’’ намдаӈгу’’. Харто’ вадамдо’ намдурта’’, харто’ вадавнандо лаханаӈгу’’.

Ненэця’ вадам’ минрена’’ тохолкодина’’ Няръяна маркана ма’’лаӈгуд’. Тохолковамдо’ мэта’’, нито’ урокха’ тэворта’’, семинаркана ненэця’ вадам’ нерня минрева’’ серудо’ ӈобкана ма’’лась’ таслабгудо’. Округна музейхана, толаӈгода’ хардахана ма’’лёва’’ танеӈгу’’. Тюку по’ Антон Петрович Пырерко юр’’ ю’’ помда ядтабива’’, тамбир’ ӈарка ненэця’ нямна лахарё’’ танеӈгу’’.

Ненэцие’ паднава серу’’ таславась, хари’ вадана нямна лаханавам’ товы ирийна еркы’’ яля’’хана мэтава’’.