Ӈарка пэвдэй ирийна няхарамдэй яляхана «Арктикам’» нюбета КДЦмякана этно-культурный центрана ненэцие’’ отделкана манзарана’’ нина’’ ӈани’’ сидна’’ ма’’лаць. Ненэцие’’ культурам’ савовна теневана’’ хибярина нямна «Я воспеваю свой народ» вечер хамандаць.
Тикы яля’ пэвсюмбы’ пеляхана ненэцие’’ культурам’ тю’’у минрена’’ нина’’ нямна ӈока ихид’ миндя’’ вада’’ таняць. Маня’’ округханана тарця хибярина тянё вани’’ӈа’’. Хусувэдо’ манзараванда мальӈгана культурана’ нямна ида ядэрӈась, вадава нерня’ пэрӈаць. Ненэцие’’ вадана нерня мима’’, илева’’, танева’’ е’’эмня ӈарка манзаям’ Роза Ивановна Канюкова сертабись, теда ӈод’ вадана’ нямна пыда манзара. Илеванда ямбан Роза Ивановна ӈока нянэй вадам’ пэртя тохолкодина’’ нядабись, тохолкодина манзаяхана тарана’’ ӈаву’’ падбасьты. Образование’ манзаяхана манзараванда мальӈгана округна ӈэсыхына танеда школаха’ тэворцеты’’, тохолкоди’’ нядабасьты’’. Теда пыда – «Отличник народного образования», сидя ёнар’’ сиднтетимдей похона «За особые заслуги перед НАО» медальм’ ня’’амась.
Ваеравы ма’’лёвахана Роза Ивановна манзара’’мита нямна лаханась, падвы’’ манзаида’’ манэ’’лабтась.
Тамна ӈопой мэбета нява Матрена Ивановна Талеева. Ненэцие’’ вадава нерня’ пэртя, тохолкодаӈэ’ тет юкад’ вата по’’ ямбан манзара. Тохоламбавы’’ ӈацекыда ханярина иле’’, ханяӈыдо’ вадам’ пэртяӈэ’ тара’’. Ма’’лёвахана Матрена Ивановна нянэй вадавна лаханась, тарця вади’’ мэ’’ӈась: – Няхата’’на тоходанава’’. Роза Ивановна сидна’’ тохолаби, тохолкодава. Манзарась нюрте’ пябнан’ пилибт’ някунда ядсетыдм’. Пыда сими’ нядабасьты, тохолабсеты, табадабсеты, сяйлабтабасьты. Ся’’ня маня’’ педучилищана тоходанаваць, тамальӈгана Валентина Артемьевна сидна’’ тохолабись. Тикахад’ маля институтхана тоходанбан’ Мария Яковлевна Бармич сими’ тохолабись. Хусувэй ӈарка хибярин’, сидна’’ тохолабвэн’ ӈарка вада. Кочевой школахана манзаравана’’ мальӈгана перепись’ сертабиваць. Тикы ӈани’ тарана сер’ ӈэдарха’. Кочевой школахана пудана’’ похо’’на манзараваханана нюдяко’’ ӈацекы’’ няюв манзараваць, школан’ сиддо’ хамадабинаць. Саць мэкадась манзарась. Тикахад’ тохолкода’’ масьты’’: няно’’ саванё, школан’ хамадавы’’ ӈацекы’’ няна’’ турӈа’’.
Тены’’ по’’ нямна тарця вади’’ хэтван’ харвадм’: Роза Ивановна едэй книжкада’ тарпыць, Мария Яковлевна едэй книгада’ таня. Едэй книга’’ ӈадиберӈа’’ ихиня саць сава. Валакада тикада ихиня нинарха’ сава ӈа’’, лаханана’’ ӈацекына саць тянё’’. Тикы нерцюна сидна’’ Холговхад’ товы’’ ӈацекы’’ нядабасьты’’, теда таняхад’ самлязимдей классан’ товы’’ ӈацекехэт’ӈобкартадо’ ни’’лахана’’. Хамадабдахарт’, масьты: нива’’ хамадабю’’.
Вадава нерня таневан’ ныхына’’ масьтебнана тара. Ненэцие’’ театрава таня, тикы ӈарка сер. «Ямб’ тохона» манзара’’мина нямна книгам’ пададамзь, ханзер’’ манзараваць, хибярина ханзер’’ тоходанаць мал’’ падавась.
Федосья Семеновна Кауц ӈока по’’ ямбан Саляхана совет’ серу нерм’пэртяӈэ’ манзаравы. Манзараванда мальӈгана вымна ӈэдалёрцеты, хойхана мюсерта’’ ненэцие’’ илм’ сэвхана маниесь теневадась. Пенсиян’ тарпась, март’ илелъяць. Тюкохона ӈод’ серци’ нисьты мэ’’. Ненэцие’’ культура серу’’ тасламбада поӈгана манзарась, «Илебц» театрхана сянакусь, теда «Ханибцёхона» хыно’’ӈа. Сэдорась ӈод мел’’ не. Пыда сэдвы манзаида маркана танеда конкурсхана маниесьтына’’.
Тикахад’ ненэцие’’ ма’’лёвандо’ мальӈгана культура серкана ӈарка манзаям’ сертабавы нидо’ тензебтембиць. А.Ф. Михайлова, А.И. Выучейской нямна лахананина’’ таняць. Тикы няхаюна манзарава нямна вадина ӈани’ яляхана падгуна’’.
