Вы здесь

Вадамда мэнена не

Маня’’ яханана хусувэй по’ ненэцие’’ паднава сер’ нямна ялуна’’ танесеты’’. Тарця ялу’’ ӈэрм’ тенз’ ненэцие’’ серу’ тасламбада управлениена манзарана’’ хамадабсетыдо’.

Тюку по’ ненэця’’ паднава нямна вадина, серуна наӈгадя ирий ямбан ханярина миӈаць.

Округна школахана тоходанна’’ ӈацекына урокадо’ мэ’’ӈаць, хуркари мероприятиидо’ таняць. Тикахад’ маркана илена’’ хибярина манэ’’мэдо’ тянё ни’’ӈа’’.

Носиндалава ирийна маттамдэй яляхана этнокультурный центр’ мякана ма’’лёвава (вечер-памяти) танясь. Таняна паднана Василий Николаевич Ледков нямна лаханакурмам’ мэ’’ӈаваць. Саць савась. Округна толаӈгова’ хардахана манзарана’’нина’’ тюку яля’’ пиркана ӈарка манзаи’’ минре’’. Ӈарка пэвдэй ирийна хасуюдимдей толыркана маня’’ толаӈгова’ харад ӈэрм’ тенз’ ненэцие’’ отделкана ма’’лываць. Таняна манзарана’’ няхаюна’ Зоя Степановна Ивакилева, Надежда Николаевна Талеева вечер-портрет’ Роза Ивановна Канюкова нямна хамадаць.

Роза Ивановна округханана теневана хибяри. Пыда тюку по’ ты’’ ниць ирий самлязимдей яӈганя яляхана си’’ив ю’’ самляӈг пода’ панысь. Тикы яляхана сава няхана сейхад’ миндя вадина, Няръяна маркана яӈгованда нид’, телефонувна мэй’’наць. Пудана по’ Роза Ивановна Архангельск’ маркана иле. Таняна илебнанда’ ӈод харта со’’явы янда, харта саць мэнена ваданда нямна ида’ пилибт’ няркнасьты. Архангельск’ маркана ӈод хасенавам’ ехэра, пиликов’ манзаяда танесеты. Литературной музей директор’ Борисов няюв’ паднана Василий Николаевич Ледков хаевы манзаям’ «Калевалам» сертаӈаханзь, валакада тарця книга ӈадимда. Пудана’’ сян’ ирий’ ямбан тамна ӈопой манзаям’ сертабихи’. А.С. Пушкин падвы стихотворением’ «Я помню чудное мгновение» луца’’ вадахад’ ӈэрм тенз ненэцие’’ вадан’ сертамбавам’ ма’’ламбихи’. Тарця книгам’ сертамбихи’.

Мэта’ си’’ивна нюртей яляхана округна толаӈгова’ хардахана Роза Ивановна Канюковам’ теневана’’ хибяри’’ ма’’лэйдаць. Хусувэй ӈарка тохолкодан’ ихид’ миндя’’вадида хэтвась’ тось. Ма’’лёва лохонана тохолкода’’ таняць, хуний округна ӈэсыхы школахана ненэця’’ вадан’ ӈацекына тохоламби’’; тикахад’ ервуна тоць, «Ясавэй» ассоциациядана хибяри танясь, образование’, культура серм’ минрена нина’’ товыць. Тикахад’ Роза Ивановна со’’явы янда тер’ нида’’ таняць, хуний теда маркана иле.

Роза Ивановна е’’эмнянда’ хамандавы вечеркана яӈгусь. Пыда’няюв товы’’ хибяри’’ интернетм’ мэць лаханакурӈаць, скайп’ тя маня’’ Роза Ивановнам’ экранхана маниеваць. Пыда’ ӈани Архангельскхана мэсь сидна’’ мякнанда ӈамдёсь маниесь, нянана’’ тарем’ лаханась. Харта янда’ тер’’ маниесь инянда саць савархась, маймбись. Роза Ивановна хэтадась: ханзер’ теда иле, хурка манзаи’’ сертамби’’.

Няръяна маркад’ нянда вадам’ мэ’’мы нина’’ тянё ниць’ на. Сямянд’ нерде Алексей Иванович Ардеев ӈэрм тенз’ненэцие’’ серу’’ тасламбада управлениена ӈаркатаӈэ таранава лаханась. Пыда ӈока сейхад’ ӈэда вади’’ Роза Ивановна манзарава нямна мэ’’ӈась; ненэцие вадава нерня минрева е’’эмня нянда ӈарка вадам’ хэтась. Тикахад’ мась: нерняна товнда похона округханана тоходанна’’ ӈацекы’’ тамна ӈопой Роза Ивановна хамандавы манзаям’ ня’’амгу’’. Тарця юнм’ намдась, нява маиць.

Вадам’ мэ’’мы ӈокаць, поӈгнандо’ округна толаӈгова харад ервнэ тарана А. Кожурова.

Федосья Семеновна Кауц, Татьяна Петровна Гвоздухина, Валентина Артемьевна Ханзерова, Людмила Яковлевна Талеева. Тикахад’ Н.Н.Талеева ненэця вадавна Прокопий Явтысый падвы стих’’ толабись, луца вадан’ тарця стих’’ Р.И.Канюкова падвыдась – тикы падвы школа-интернатхана тоходанна’’ ӈацекы’’ толэйдось. Роза Ивановна Канюкова ед’ хамандавы вечеран’ товы’’ хибяри’’ ихиня ӈод тарця ма’’лёва савархась. Роза вановнам’ манэ’’ӈава, нянанда лаханакурӈаваць, вабцамда намдаваць. Со’’ яма ялянда ед’ сейхад’ миндя вадина нянда’ тэврэйнаць.