Тюку по’ ӈока’’ теневана’’ нина’’ ӈарка со’’яма ялудо’ мэ’’ ӈаць. Хибяхова’ самляӈг ю’’, хибяхова’ мат’’ ю’’, хибяхова’ си’’ив ю’’, сиднтет ю’’ помда ядабтась, хибяхова тикахад’ ӈокарка подо’ паныць. Хусувэй округна тарця хибярихи’ ихид’ ӈэда’’ вадина’’:

Няръяна маркана маля сян’ юд’ мян по’’ ямбан Серафима Петровна Дуркина иле’’, манзара’’. Округна хибяри’’ тикы’ нем’ сававна теневадо’. Пудана’’ юкад’ вата’’ по’’ ямбан манзаяда культурахад’ пере’’, этнокультурный центрхана «Илебц» театрана манзаям’ нерня минренаӈэ’ тара. Харта ӈод’ театрхана маля’’ нюртей яляхад’ сянаку, хынокад’ нява’’, мел’’ неӈэ’ нюмдебива’’, ӈудида’ мэта нява’’. Пыда сэдвы’’ паныда’’ ӈока’’ не’’ мэйдо’, ӈока’’ не’’ ядэрӈа’’.

Серафима Петровна маня’’ округханана ёнар’’ хасуюёнар’’ самляӈг ю’’ самлязимдей по’ хор’’ ирий’ ӈоб’ яӈганя яляхана Ӈарка явна мюсерта’’ ненэця’’ мякана соявысь. соявысь. Нися’ хасава Пётр Кузьмич илеванда ямбан тыбэртяӈэ’ манзарась, «Харп» колхоз’ ты’’пэрмысь. Небяда’ вэсакомда’ нядабась вымна мюсермысь, мал’’ нюда’’ хойхана вадыць. Теда  ӈод’ хасава’ нюди’ тыбэрма’ серкана манзара’’. Иринато’, нисянато’ манзаям’ нерня минредо’. Серафима Петровна ӈод’ школан’ хэванда ёльцянд’ нянэй мякана илесь. Небянда’ хэвхана хуркари’’ не’ пэрманда манзаян’ тоходанась. Школан’ хэва ӈарӈэ’ хэсь тоходанвась’ пядась. Тохолковамда ханяна нисяда минре’’. Чёрной, Варандэй, Оксино, Няръяна маркы’ нябимдей школахана тоходанвысь, Нюдякоданда Серафима тохолкодаӈэ’ тохован’ харвавысь, ӈодьбянда школанда пуд’  педучилищен’ тоходанвась’ товысь. Сян’ по’’ ваерась манзарась пядась. Тохолкодаӈэ’, воспитательӈэ’ манзаравысь, тикахад’ сян по’’ ямбан окружком’ партии мякана манзарась. Тарем’ янамбовна манзаравась культуран’ тэвыць. Не ӈацекы ӈэванда ёльцяӈгана Серафима Петровна «Хаяр» ансамбльхана тарась, хыно’’ӈась. Тарця сер’ пилибт’ ивнянда ӈась’. По’’ ваерась «Илебц» театрхана нянэювна сянакось’ пядась. Теда маля театр’ манзаям’ нерня’ минренаӈэ’ тара’’. Пыдо’ нито’ няюв’ ненэцие’’ культурава’ тю’’у минре’’, вадава нерняри’ пэрӈа’’, вадюданна’’ ӈацекы’’ тохолаби’’. Илеванда’ ямбан Серафима Петровна сертавэда тянё ни’’ӈа’’, нерняна манзарась’ тамна ӈока сава сер’’ няданда минда’’. Илевада сававна миӈая, сенз’ ӈэя, ябда илея.

Едэй пом’ ядабтавахана нянда’’ вади’’ мэ’’ӈа’’: - Едэй похона мал’’ серуда сававна миӈая’’. Товнда’ пова хэвы’ поход’ саварка ӈэя. Ӈока сава сер’’ яхана’ тэврая. Хибярина’’ яханана ябда’ илея’’, сенз’ ӈэя’’, хусувэндо’ манзаядо’ таняя’’.

Хар’’на’’ яханана  ервӈэ’ илехова’’, ява’ мэнехова’’, нина’’ сахарамбахава’’, хар’’на вадава нерняри’ минрехова’’, вадава яханана ханярина соя’!

2016 пом’ сава ихиня’ ядабтара’’!