Хойхана мюсерта’’, хойхана манзарана’’ ненэциена маня’’ яханана тены’’ похо’’на сацьри ӈока ни’’ӈа’’. Округханана тянембёвна ёнаркад ва’’ӈа’’. Ӈокаювдо хасава’’, тены похо’’на хойхана мюсерта’’ не’’ тянё’’. Ӈарка яхана, Канин няна некоця’’ хасавидо’ нядабась вымна тамна мюсерӈа’’. Ханяӈы яхана тамна нянэй мякана иле’’, нюкцидо’ тоходанвась хэвандо’ ӈэсонд’ хэвханандо’ вадюдана’’.

Выӈгана илена’’ ненэциена’’ хуркари нумӈгана харто’ манзаидо’ пэрӈа’’ – ты’’ лэтби’’. Ты’’пэртя’’ манзаяхад’ маркы’ лавкахана ӈамза’’ танева’’ нянэювна пере’’. Ӈока по’’ ямбан маркана иленаӈэ ӈамзасю’’ нисьтыва’’. Ты’’ ӈамза лавкаханана нисьтынё сусаӈга’’. Тарця сер’ ты’’пэртяхат миӈа. Няндо’ ӈарка вадам’ хэтбабна’’ тара’’нив’. Ты’’ пэртина ялэ’’, пий’’ ямбан’ тыдо’ лэтбась хойхана илевамдо’ мэ’’ӈадо’. Хуркари нумӈгана манзаидо’ нисьтыдо’ хаембю, ханяӈэна ныланавам юрась манзарасьты’’. Тэтнава’’ ялудо’ ӈод танесеты’’. Ты’’ ниць мальӈгана, тыто’ толыр’’ тасламбавахана манзаядо’ ӈадя’’ ӈокамзеты, тикахад’ забой’ това’’ сер’ ненэця’’ ӈани нисьты’’ нылана’’. Тарця манзаидо’ ты’’ пэртина маля ӈэрёйӈэ’ тось пясьтыдо’. Теда маля февраль’ ирийна еркы яляхана тэвотына’’ ты’’ хабарпава’’ манзая’’ округханана тамна миӈа’’. Ненэциена ханярина тыдо’ забойкан’ янамбовна тэврамбидо. Сяӈок тым’ хабарта’’, сян ӈамзам’ ня’’амгу’’, мирдата’’ тикахад’ нерняна илевадо’ переӈгу’’.Тюку ялян таслась ӈокаюв сельскохозяйственный кооперативхана, семейно-родовой общинахана забой манзаидо’ ёльцембидо’. «Красный Октябрь», «Ижемский оленевод», «Ненецкой агропромышленной компания», «Харп», «Ерв», «Канин», «Восход», «Заполярье», «Няръяна ты» забой манзаидо’ маля’ пуняна’’ хаи’’. Ты’’ ӈамзи янамбовна округна еркы март тэврамбидо’, ӈамза комбинатан’ мипидо’. Таняна манзарана’’ маля ӈамзахад’ хуркари’’ ӈавар’’ сертабаӈгу’’, хуний тикахад по’ ямбан лавкахана мирдапаӈгудо’.

Тамна сян’’ яля’’ ваерась забой манзая’’ яханана ёльцевы’’ ӈэӈгу’’. СПК «Колгуев», «Путь Ильича», «Дружба народов» тамна тыдо’ хабарпи’’. Мэта ирийна юдимдей ялян’ таслась: ты’’ӈамзам ня’’амва план’ хасуюр’’ процентан’ пандавы. Ӈамзан’ таслась няхар’’ ю’’ тонна’’ ӈэӈгу. Ӈокханда округханана няхар’’ ю’’ няхар’’ тонна’’ ты’’ӈамзам’ ня’’амбато’ тара’’. Тикы тет ю’’ ёнар’’ ты’’.

Несэй ӈамзам’ округна еркы маркана илена’’ хибяри’’ лавкахана маля тэмдаби’’. Хаювы пона’ забойка яханана валакада ёльцевы’’ ӈэӈгу. По’ ямбан ӈамзасавэй иленгува’’.