Культура’ серкана манзарана’’ нина’’ хусувэй по’ мэкад’ серкана сеюна ядимдабсетыдо’. Хуркари’’ фестиваль’’, конкурс’’ по’ ямбан хамадабсеты’’. Маркана иленаӈэ’ маймбась тарця мероприятияха ядсетыва’’.
Маля ӈахакуд’ округханана «Аргиш надежды» нюбета фестиваль’ манзарасьты. Хусувэй сидя по’’ ваерась ненэциена тарця фестиваль’ ӈатесетыдо’. Округна еркы март’ харто’ манзаидо’ манэ’’лабтавась хуркари’’ яхад’ мядонда’’ тосьты’’. Тюку по’ ӈод Няръяна март’ «Аргиш надежды» фестивалян’ мядонда’’ тута’’. Вэба ирийна сидя юдимдей толыркана «Аргиш надежды» – «Енава мюд» фестиваль’ манзаямда нэӈгуда, тюку’ мэвахана Межрегиональный фестиваль театрального творчество ӈэӈгу.
Театральной творчества ӈарка сер’, ӈахы’’ похот’ минда сер’. Луца’’ поӈгана театр’ серкана саць мэбета режиссёр’ Константин Станиславский танясь, тамбир’ юнета хасава со’’ямахад юр’’ самляӈг ю’’ по’’ ваера. Пыда со’’яма ялянда ед’ тюку по’ фестивальва хамандавы. Театральный коллектив’’ манзаидо’ манэ’’лабтаӈгу’’.
Тюку по’ «Енава мюд» фестивальва ирий’ ямбан манзаравнда. Ирий’ ямбан ваеравнда сер’’ тянё ни’’ӈэӈгу’’. Хусувэй хибяри’’ нянанда таранам’ хоӈгу’’, манэ’’та’’.
Фестиваль манзаямда мэта си’’ивна самлязимдей яляхана пяӈгуда. Тикы яляхана «Арктикам’» нюбета КДЦ ӈарка концертный залхана «Берегиня» моноспектакль’ манэ’’лабтавы ӈэӈгу, ханяна Людмила Глухова сё’’ мэта. Нябю яляхана’ ӈод хусувэй харвана тикы не няюв’ манзараӈгу. Фестиваль’ манзарава ямбан ӈока выставка’’ танеӈгу’’, хуркари’’ мастер-класс’’ ваераӈгу’’.
Вэба ирийна сидя ю’’ нюртей яляхана «Арктикахана» – День семейного творчества ваераӈгу. Мел’’ манзарана’’ –«Город мастеров» ярмарка-выставкам’ нэӈгу’’. Архангельск, Мурманск маркад’, Удмуртия, Ӈысми’’ яхад’ товы’’ ӈудидо’ мэта’’, мел’’ хибяри’’ харто’ мэбебцодо’ манэ’’лабтаӈгу’’.
Вэба ирий’ сидя ю’’ няхарамдэй яляхад’ хор’’ ирий сидя ю’’ нябимдей толыр’’ ӈэсонд округна театральный коллектив’’ харто’ манзаидо’ манэ’’лабтабаӈгу’’. Вискахад, Тельвискахад, Макаровоход театрхана сянакода’’ манзаидо’ март’ тэвраӈгу’’. «Илебц» театр’, тикахад Ненэцие аграрно-экономический техникум’ театральной студияхана сянакода’’ нина’’ манзаи’’ манэ’’тава’’.
Фестиваль’ пудана неделяхана Архангельск’ маркад товы’’ кукольный театр, театр драмы сянакода’’ манзаи’’ манэ’’тава’’. Пыдо’ нюртеймэвна Няръяна март’ тута’’.
