Я’ сяр ниня тадебя’’ ханярина илевы’’, толырто’ таслава сер’ ни’’ ӈа’’. Норвегия ӈэрм няӈэна Тромсё маркана маля няхарамдэймэвна Исогайса нюбета хэбидя ялям’ мэ’’ ӈаць. Тарця ялядо’ хусувэй по’ вэба ирийхана ваерасьты.
Саам’’ невхы хэбидя яхана тарця ялу’’ мэ’’ман’ хибяридо’ торумы’’. Тюку мэвахана Норвегияхана я’ сяр ниня танеда’’ тадебя’’ ма’’лыць. Ӈока яхад’ товы’’ табедя’’ пензер’ мун’ сян яля’’ ямбан соць. Норвегия ӈэрм ян’ тет’’ ю’’ сидя яхад тадебя’’ товыць, Индонезияхад, Малазияхад, Аляскахад индеец’’, эскимос’’ таняць, Гренландияхад инуит’’ табедя’’ товыць, Россияхад’ товы поӈгана чукча’’, бурят’’, ӈысма’’, саам’’ табедя’’ таняць. Таӈок яхад’ товы’’ тадебя’’ ӈобкана ма’’ лась таславы’’ серудо’ ӈокаць.
Тюку’ по ваеравы Исогайса фестивалян’ маня’’ яна’ тер’’ нина’’ тэворӈаць, тикы «Ханебцё» фольклорный театрхана сянакода’’ не’’,тамна яханана теневана тадебярка ненэць Николай Талеев. Тамбир’ хэбидя ялян’ товы’’ хибяри’’«Самбдавам’» манэ’’лабтабто’ тарась, тикахад «Круглый столхана» лахарё мэ’’эмдаць.
«Ханебцёхона» хынота’’, сянакода’’ нина’’: Федосья Кауц, Людмила Булыгина, Анастасия Помылева, Ксения Явтысая, Александра Выучейская Левангеран’ тобнандо’ «Самбдавам» сянакова серӈэ мэмдаӈэ’ тасламбидось. Ненсянда ӈани нянэй самбадава сер’ ӈэвысь. Тет’’ ю’’ сидя яхад’ товы’’ табедя’’ нянэй самбадавам’ манэ’’ лабтаць. Манэ’’ мэмдо’ маня’’ нина’’ саць ӈарка серӈэ’ тасламбидо’, хусувэндо’ тарця сер’ нямна харта ибедормада.
Маня’’ нина’’ Норвегияхад’ то’’омахадандо’ редакцияхана турӈаць, ваде’’ӈадось: хурка сер’ ӈахы’’ яхана ваеравысь, хибям’ таняна ядабтавыць, хурка я’ тер’’ тадеби’’ няюв ӈобнзер манзаравыць.
Федосья Семеновна Кауц маля ӈармбэй не, илевахананда манэ’’мэда ӈока. Я’ сяр ниня’’ илена’’ тадебя’’ тамбир’ ма’’лёвам’ нертеймэвна тэворӈась. Тарця вади’’ мэ’’ӈась: – Норвегияхана манэ’’мэва’’ тамна пон’ ихинян’ илеӈгу. Табедя’’ ханярина илевы’’,- тикым’ теда сэвхана манэць’ теневав’. Нюртей яляхана маня’’ мунзипой’ ядэрцетыва’’, вадам’ ехэрава’’, сидна’’ таняна ехэра’’. Тикахад’ маня’’ ёльцява’’ тэвыць, спектаклява манэ’’лабтаваць. «Самбдава» спектакль’ӈока хибяри’’ ма’’лась. Ханзер невхы’’ похо’’на табедя’’ выӈгана хаӈгурта’’ хибяри’’ савумдабиць, тикым спектаклява ваде’’ӈа’’. Тарцям’ манэць, ханярид’ товы’’ пысаць. Тикы’ пуд пумнана ядэрта’’ ӈока ӈэсьты’’, хой’ тадебя’’ нямна хонарковадо’ пили’ танесеты. Маня’’ округхадана Николай Талеев ядэрӈась, тикы’ хасавам’ маркана иленаӈэ’ савовна теневадо’. Маня’’ тадебява. Пыда ныхыда’ таня, тикым’ ӈани’ я’ тер’’ тадебя’’ хамададось. Пумнанда ядэрта’’ ӈокаць. Николай тадебя’’ нида’’ тохолабись, хаӈгурта’’ хибяри’’ някунда турцеты’’. Хань’ ныхыда’ таня, ирида Нюдя’ я’ тадебясьнё.
Булыгина Людмила тарця вади’’ хэтась: – Тюку ян’ ӈэдалёбнана енаваць: ӈока несэй, мэкад ӈамгэм’ манэ’’тава’’. Ненсянда’ ӈод тарцясь – манэ’’мэхадана хар’’на’’ пысава’’. Таня’’ товы’’ поӈгана перенясна’’ хова’’. Аляскахад’ товы’’ эскимос’’, Иркутской областьхад товы’’ бурят’’ няюв’ ибедормава’’ ӈопой, ӈоб’ то’’олсава’’ ӈэвэва’’.
Спектакльва манэ’’лабтава’’ мальӈгана хэвханана ӈока тадебя’’ малэйдаць. Ехэрадм’ ӈамгэ’ тарця ӈэвакы, хадри’ тадебява ныхытакы.
Саць’ сававна ӈэдалёрӈаваць, манэ’’мэва ӈока. Маня’’ пуняна ниваць’ мэ’’.
