Вы здесь

Сава вадам’ намдувнда’’

Тюку ирий’ нюртей яля’’ мальӈгана сян по’’ ямбан ӈарка ялям’ мэцьтыва’’, тикы ӈармбэй хибярина е’’эмня таславы’’ яля’. Тарця ялям’ мэць маля торомава’’. Ӈармбэй хибярина ханярина иле’’.

Хибяри’’ хуний илевандо’ ямбан харто’ манзаидо’ пэрць ив’ ер манзараць, ямдо’ сахарамбиць, нюдо’ вадабиць. Теда ӈокаюв’ тарця хибярина ӈарумы’’ нюто’ ню’’ вадабась нядаӈгу’’. Тены’’ похо’’на ӈармбэй хибярина тарем’ таслась илевадо’ сибиць нись’ ӈа’’. Ӈокаювдо’ сайнормав’ манэ’’мы’’, сайнорма по’’ пуд сибиць ванься’ ӈа’’. Ханяӈыдо’ евакоӈэ’ вадюданаць, нисянадо’ сайнормахана яӈгумы’’, ӈока маям’ мэнэ’’мы’’. Тарем’ ӈод, ӈокаювдо’ сава хибяриӈэ’ вадыць. Ӈокаювдо’ теда’ ӈод, ӈарка хибяриӈэ’ хэсь, ӈопой яхана хасенавам’ ехэра’’. Ханяӈы’’ тамна манзара’’, ханяӈы’’ общественной манзаи’’ пэрӈа’’, ханяӈы’’ ӈудидо’ мэць хуркари’’ паской ӈавори’’ сертамби’’. Тамна тарця хибярина таня, хуний хыно’’манзь ма’’люрцеты’’. Нянэй ненэця’’ поӈгана тарця хибярина тянё ни’’ӈа’’. Маня’’ ӈармбэй некоцина хасенавам’ ехэра’’. Маркана иленина’’ «Илебц» нюбета театрхана сянаку’’, ханяӈына «Ханебцё» фольклорный группахана хыно’’ӈа’’. Тарця нина’’ округна ӈэсыхына’ ӈод таня, Краснойхана, Несьхана, Саляхана, Хонгурейхана, Харутахана.

Тюку яля’ вадин’ сидя тарця няна’’ нямна падбидм’. Тикы няхаюна’ Валентина Ивановна Тайбарей нябю Фаина Харитоновна Ледкова. Сидтэ’ теда Няръяна маркана илеӈаха. Пыди’ варёмди’ ненэцие’’ театрхана сянакоӈаха, сёди’ мэта некоцяха. Театрхана сянакода’’ нито’ няюв’ ненэцие’’ культурава манэ’’лабтамба ханяримна ӈэдалёрцетыхы, тарабнанда ӈопойлад’ ядэрцетыхы’.

Валентина Ивановна Тайбарей Ӈарка яхана соявы не. Нисяда илеванда ямбан ханенаӈэ’ таравысь. Невхы похо’’на тикы’ хасавар’ мэбета ханена ӈэвысь, сававна манзаравада газетахана падсеты. Ӈарка я’ ханена’’ поӈгана нердесьты. Не нюда’ ӈод сава хибяриӈэ’ вадысь. Валентина Ивановна школамда ёльце’’махаданда педучилищехэна тоходанась. Пыда – тохолкода. Ӈока по’’ ямбан Варандэй’ ӈэсыхына илена’’ нюдяко ӈацекы’’ паднась, толанзёсь, толаӈгось тохоламбись. Манзараванда’ ямбан тохолавы’’ ӈацекыда маля малӈэ’ харто’ ӈарка хибяри’’. Ӈокаювдо’ тенад’ тохолкодамдо’ тенедо’, ихиня сомбой юнм’ тохолкодахандо’ ӈэдарабсеты. Валентина Ивановна Тайбарей нюмда нянэй хасаваӈэ’ вадась, хуний тохолковамда ёльцесь харта манзаянанда харвась манзара. Ненда няюв хасава нюкцямди’ вадабихи’, небямда ӈод пыда нисьтыда юрбю.

Валентина Ивановна ӈахакуд’ ни’’ манзара, тарем’ ӈод манзаяда ӈока ӈэсьты. Нида’’ хуркари’’ серкана нядамби’’, тикахад’ «Илебц» театрхана сянаку, хыно’’ӈа. Сертавнда манзаяда тянё нисьты’’ӈа, маркана ядабтабат’ пиликов’ ханяхова парумбась ядсеты.

Тамна ӈопой хасенавам’ ехэрана не – Фаина Харитоновна Ледкова. Пыда со’’явы яда’ ӈани’ Нюдя я’, Нюдя я’ тер не. Нельмин’ Саляхана нюдякоданда вадюданась, маркана школам’ ёльце’’махаданда ӈобтарем’ педучилищехэна тоходанась. Валакада, небянда хаӈгурма’ нид тохолковамда нивэдась ёльце. Харта со’’явы яханда ӈэдалавыць, Саляхана манзарась’ пядась. Тарем’ ӈарка хибяриӈэ’ хэсь харта ӈэсынанда илесь. Хуркари’’ пэртя’ манзаяханда ив’ ер сырта некоцясь. Тикы’ хавна тамна илеванда’ ямбан ӈэсынандо’ танеда «Маймбавам’» нюбета ансамбльхана’ тарась, тикахад’ нянэй не’’ няюв фольклорный группана пилибт’ хыно’’ӈась.

Саляхана хаюпа’ хаясь, нюда’’ вадась, нюта’’ ню’’ вадабась нядаӈгу. Сидя не нюда маркана илеӈаха, пыди’ сидди’ нядабась Фаина Фаритоновна’ ӈод маркана иле. Харта ӈэсыхында мядондадрев’ валакада таӈы’ ирийхана тэворцеты. Ил’ тарця.

Илеванда ямбан ансамбльхана таравы, хыно’’мы не тарця серт’ торомы нив’ӈа. Маркана илесь, ненэцие’’ театран’ ядэрць’ пядась. Таняна сянакода’’ нина’’ малӈэ’ маля ӈарка хибяри’’. Пыдо’ тарана манзаям’ пэрӈа: ненэцие’’ культурава, вадава тю’’у минредо’; нядандо’ нянэй ненэця’’ таневам’ ӈока яхана теневадо’.

Пилю’’ ирийхана округханана ты’’ ялям’ мэ’’ӈаваць. Тюку’ мэвахана ваеравы ты’’ яля’’ мальӈгана маня’’ артистана’’ пуняна ниць’ мэ, хоюмна ӈэдалёрӈаць. Валентина Ивановна Тайбарей, Фаина Харитоновна Ледкова «Харп» ӈэсыхы’ тэворӈахась, таняна манзарана’’ ты’’пэртя’’ нито’ е’’эмня хыно’’ӈахась.

Ӈармбэй нина’’ ӈарка ялям’ ядабтабась мададм’ – тад’ нерня’ варёмда мэць илевамда минрера’’, сензда ӈада; ӈоб’ нерня хари’’ тенз’ вадава, культурава тю’’увкури’ минрера’’. Сава сёнзяхана хусувэй ялям’ ядтамбида’’, нюда’’ сидда’’ нёя’ юрбю’’.