Тюку по’ ӈарка пэвдэй ирийна самляӈг’ яӈганя толыркана ненэцие паднана Василий Николаевич Ледков сидндет ю’’ пом’ ядабтаӈгува’’. Мэбета паднана яӈгумахад’ маля по’’ ваера’’. Тарем’ ӈод тикы нява хусувэй хибярина ихиня иле. Илеванда ямбан ӈокавна манзаравы ненэць ӈэ’’ нисяв, пуданда хаювы падвы манзаида тянё ни’’ӈа’’. Падвэмнанда ӈацекына тоходана’’. Хари’’ вадавна толанзёда хибярина Василий Николаевич Ледков падвы манзаи’’ харвась’ толабасьтыдо’.

Няръяна маркана А.И.Пичков нювм’ нюбета толанзёва’ хардахана ( библиотекахана) манзарана’’ нина’’ ӈод паднана’’ ненэциена манзаи’’ сававна лэтбидо’. Манзарась’ хардаханандо’ хибяри’’ ма’’лабсеты’’, паднана’’ хибярина нямна лахарё’’ мэцьты’’. Нянэювна тарця манзаям’ ӈэрм’ тенз’’ ненэцие’’ отделкана манзарана’’ нина’’ минре’’. Тарця отдел’ серм’ пэртя Зоя Степановна Ивакилева, манзаямда теневана нява маля пон’ манзара. Нядаӈгода няда Надежда Николаевна Талеева ӈобтарем’ манзаяханда ив’ ер сырта некоця. Пыди’ сидяӈэ’ манзаямди’ нерняри’’ пэрӈади’. Василий Ледков со’’яма ялян’ библиотекахана манзарана’’ нина’’ маля’ хамяку’’. Надежда Талеева тарця вади’’ хэтась: – По’ пудана ирийхана ненэця паднана няна сидндет ю’’ пом’ пэртава’’. Тикы ялян’ маня’’ падвы’’ манзаита выставкам’ хамандаӈгува’’, паднана няна’ нямна лахарёна мэтава’’. Василий Ледков – ӈарка паднана, падвы’’ манзаида вындер’ ила’ нямна ӈа’’. Мань’ падвыда етри’ толабасьтын’, манзаида ивнан’ ӈа. «Ӈарканд ялянд нербя» книгада таня, ёльце сава манзая. Тикахана тет повесть’’ ӈобт’ ма’’лавы’’ – «Нярмодана хубта», «Мерюй ялэмд’’», «Ӈарканд ялянд нербя», «Сюнсэв пирибтя». Паднана падвы манзаи’’ толабась’ тара’’. Манзаида малӈэ’ ненэця’’ вадавна падвы, луца’’ вадавна падвы. Хари’’ вадавна падвы толабаб маймбцо. Библиотекахана турӈада’’. Тюкохона ӈока ивнянда ӈэда книгам’ хоӈгуда’’. Нянанда’ тарана книгам’ хось маня’’ сидда нядаӈгува’’.